CORINTH
Hamadefal
Metamol babior we yael Paulus ngalir Kristianol Corinth ila ye teftaf bo yebe haposoloh weres kowe yesa holar yarmat irel kofael Kristiano mo tugulul ladep mo irel eklesia we Paulus ye chapidah mo woal Corinth. Irel yodla ngo Corinth ila sew haplomol Greece le ye palleng, ngo ila haplom la ye tamol le lamliyel Roma mo woal Achaia. Ye ffos idel haplom le irel mala kamdidiyal mo irel pallengel liliyel chuway iyang, mo yael yarmat ma toa faor maltemay ngo ye cholop rerel taliw iyang.
Mala ye kkel yael Paulus merah iyang ila yar harere yarmat mo yar Kristiano ma faor maltemay. Iwe mo irel meka kofal llepder mal mo fefel, mo kofal habulupoy, iwe mo hafelfelel halesiya mo kefang kala yael Espritu Santus mo molow tefael mo irel maes. Irel yael Paulus medaf mele yela yoh ngali le ye hamdefa sew kasiy ka mo irel Hapatpat Momay we.
Momol 13, we ye kapta kofael hachangcheng, le ila kefang la ye hartael kamdidiy mo luwul kefang ka yael Deus ngalir meka lol, ila sew momol le ye ffos idal mo lal babior le.
Palpal Meka Yadol Babior Le
Hamadefal 1:1–9
Yal harere Eklesia 1:10—4:21
Kaptal llepder mal mo fefel mo igegel yar be mel chol sew mo sew family 5:1—7:40
Rechoka re Kristiano mo rechoka rete Kristiano 8:1—11:1
Igegel yal mel Eklesia mo igegel mepel 11:2—14:40
Yael Kristus mo rechoka ye tugul lal deper molow tefael mo irel maes 15:1–58
Salpiy we re hateyili resa fang bo hammaler Kristiano kowe re mel woal Judea 16:1–4
Kofal iy llufulyal mo mala haygul loh 16:5–24
1
Metamol Babior We Yael Paulus Ngalir Kristianol
1 Babior le ila ye budoh mo irel Paulus we Deus ye dipli bo yebe mel bo lol Kristus Jesus apostel, ngo ye wol budoh mo irel Sosthenes we bisich.
2 Babior le ila ye loh ngalir yarmetael eklesia la yael Deus wol Corinth, mo panger rechokla resa ffesangur bo rebe mel bo lol Deus le rebe santus, le rechokla Deus sa lamlir bo resa sew chog mo Kristus Jesus. Iwe ngo resa wol sew chog mo panger yarmat lal faileng le, le rechokla rema hasrowu Samol la yach Jesus Kristus, le yar Samol ngo wol yach gich. Ac 18:1
3 Deus le Temach mo Samol Jesus Kristus rebe fang ngalugmi haradiya mo hapos.
Deus Ye Holbuwagich Irel Jesus Kristus
4 Pangal yad ngo ima kangalu Deus la yai, yal hachigchig bo yaglugmi le fal haradiya la ye holahmi mo irel Jesus Kristus. 5 Bo hasa mmal irel pangal formel, mo pangal hapatpat, mo pangal repiy, le fael mala hasa sew chog mo Kristus. 6 Molwe kaptael Kristus we sa tugul long lal yami luluwal ila 7 tor sew yolbuw kala iyang le ye tohlahmi irel yodle ha wiwidi yodla Samol la yach Jesus Kristus yebe budoh iyang. 8 Yebe wol tipngugmi yebe kel chog dipmi yee, yela hola miril faileng, ralla bela tefaldoh Samol la yach Jesus Kristus ngo hasa mel le ha hartael momay ngo tor dermi. 9 Deus mele be tugul depach irel. Ila Deus la ye ffesangugmi bo habe sew chog mo Jesus Kristus le Lol ngo yach Samol.
Eklesia Le Yesa Hamehal
10 Fael mala idel Samol we yach Jesus Kristus ngo ibe hafal pechehmi pangmiloh rewol bisiy bo habe hasewa chog yami luluwal irel mekla hama sor, ila ngo ha towe rol hamehal. Habe mel le habe sew chog, ngo yebe sew chog yami luluwal mo mekla habe ma hatugulu. 11 Hami rewol bisiy, ye mel tot yarmat mo irel family we yael Chloe le re kangalu hamayiyey le hami hama rol hachocho fengal. 12 Mala ngang isosor ila mala semal hami ngo semat mele ye sor. Semal be sor bo, “Ngang choluwal Paulus”, ngo semal sa sor bo, “Ngang choluwal Apollos”, ngo semal sa sor bo, “Ngang choluwal Pedrus”; ngo semal sa sor bo, “Ngang choluwal Kristus.” Ac 18:24 13 Ye hal sew holongol Kristus, le ila mele eklesia le towe yoh le sibe hamhela. Hare Paulus mele ye mes wol krud bo yaglugmi? Hare ha Baptismus bo habe mel bo re dabeyel Paulus?
14 Ima kangalu Deus yal hachigchig le tor semal hami le ibaptismusgili bo halachog Crispus mo Gaius. Ac 18:8; Ac 19:29; Ro 16:23 15 Ila tor semal le yebe sor bo hasa baptismus bo re dabeyey. 16 (Iwol baptismusgili Stephanas mo choal family la yal. Iwe ngo itay gola hare chil yor le iwol baptismusgili hare tayor.) 1 Co 16:15 17 Kristus yete fangwey ngang iremi bo ibe baptismusgilugmi. Ye fang ngang bo ibe kangalugmi Hapatpat Momay we. Iwe ngo ibe kapta ngalugmi le itowe teptap meka repiyach yarmat bo yede torloh kelel yael Jesus Kristus la mes wol krud.
Kristus Le Iy Mele Repiyal Mo Kelel Deus
18 Bo kaptael kofael yal mes Kristus woal krud ila torloh pelal mo lal yar luluwal rechokla resa mwael loh. Iwe ngo ila mala kelel Deus mo irech gich ika siya daor. 19 Babior we ye santus ye sor bo,
“Iy bele hachuyaloh repiy la yar rechokla re repiy,
ngo iy bele hachuyaloh yar medaf rechokla sa tagiyet yar skun.” Is 29:14 (LXX)
20 Ila ngo meda mmaler rechokla ye palleng repiyer mo ikla ye palleng yar skun, hare rechokla re sallap irel hapalilil hapatpat? Deus ye kawraloh le mala repiyer yarmetael faileng le ila ye tor loh pelal. Job 12:17; Is 19:12; 33:18; Is 44:25
21 Bo irel mala repiyel Deus, ngo iy Deus yesa foru le towe yoh bo yarmat rebe gola iy Deus mo irel chog repiyer. Irel Hapatpat Momay le yarmat rema sor bo tor loh pelal mele Deus yesa hatugulu le yebe hadorar rechokla re chepar iyang. 22 Jews re faeg kemal bo yar tugul ngo Greeks re faeg repiy. 23 Iwe ngo gich ila si kekapta kofael Kristus we re krudu, le sew hapatpat le Jews rete dipli, ngo tor pelal mo lal yar Gentiles luluwal; 24 iwe ngo rechokla Deus yesa ffesangur, le Jews fengal mo Gentiles, ila hapatpat le mele Kristus, le iy mele repiyal mo kelel Deus. 25 Meka yarmat re sor bo ye buch Deus iyang, ila ye palleng repiy iyang mo imol meka repiyach yarmat; ngo meka yarmat re sor bo ye tayikel Deus iyang, ila ye kel mo imol meka kelach yarmat.
26 Ha memangi chog rewol bisiy mokwe igegmi rallakowe irel yodwe Deus ye ffesangugmi iyang. Irel yach gich yarmat wiri ngo te cholop hami le ha repiy hare yor kelmi, hare ha tagiyet. 27 Deus ye spegil duwley mekla re faileng re sor bo tor pelal, bo fael mala yebe hamaalir rechokla re sor bo re repiy. Ye duwley mekla re faileng re sor bo tor kelal bo fael mala yebe hamaalir rechokla ye palleng keler. 28 Ye duwley mekla re faileng re tolpagili ngo rete dipli mo ikla re sor bo tor pelal, bo yebe hachuya loh mekla re faileng re sor bo ye palleng pelal. 29 Ila fal le tor semal le be yoh le yebe habos mo fael metal Deus. 30 Ngo ligdi bo Deus mele sa hasugmi bo habe rol sew chog mo Kristus Jesus, ngo Deus ye foru Kristus bo yebe mel bo repiyach. Kristus mele yesa hafelgich bo sibe fel mo irel Deus, ngo si mel bo lol Deus le si santus le iy mele sa hadoragich. 31 Ila molwe babior we ye santus ye sor bo, “Te tugul semal le ye dipli le be habos, ngo yebe habos irel mekla Samol yesa foru.” Jr 9:24