Ⅰ Yĩ, Paulo kĩ bido nɛ kɔla nɛ Kristo Yesu sũ, mɔ boe ɔwaɛ̃ Timoteo sɛkɛ̃ ovoli kĩĩ to. Bɔtsɛlɛ ye bɔama nɔ, Filemon boe ɔkɔba adzuma ɔkɛnanɛ kĩ bɔawɛ kalɛ paa. Ⅱ Bɔtsɛlɛ ye lɛmɛ bɔama batɛ badonɛ a kĩ batsɛna nɛ nɔ tɔtɔ kamɛ, mɔ boe ɔwaɛ̃tsole Apia, mɔ boe ɔkɔba paa Arkipo kĩ yakɛna boe Ɔlate adzuma mɔ ɔsĩ mɔ ɔsĩ ndɛ sodzani aye a. Ⅲ Baguma boe Ɔlɛga mɔ boe Ɔlate Yesu Kristo bɛmɔ mi kɔnya, bɛkpa mi lukudɔ lɛmɛ.

Ⅳ Nwaɛ̃ Filemon, lɔkɔ nyɛ lɔkɔ kĩ mabɔa mpaɛ ni, mate anɛ nɛ nɔ akũ, ade manyɛ Baguma kɔlɛ nɛ nɔ lɔlɔ, Ⅴ kitonɛkĩ nnu ayekĩ awɛ Baguma bati kalɛ, mɔ ayekĩ ɔtɛ boe Ɔlate Yesu odo a sũ. Ⅵ Mabɔa mpaɛ kĩ ɔmɔa a kĩ bɔakɛna ndɛ batɛ badonɛ aye a ɛna ɔsĩ ebu, ayekĩ bɔ́apuli bunu fɔtsa wĩ flee a kĩ fudeĩ nɛ ɔmɔa kakɛna mɔ Kristo kayɔ a dzununuunu. Ⅶ Nwaɛ̃, mmɔ́ kawɔlɛ ade ɔwɔlɛ ka edzi yĩ a, kitonɛkĩ nɔ ɔdɔ a kĩ odeĩ ɔkpa Baguma bati a fɔ̃ bɛna kawɛya.

Ⅷ Nɛ fukĩĩ sũ, yĩ ndɛ awaɛ̃ nɛ Kristo kamɛ aye a, maapuli nkɔa otumi mbi nɔ kĩ kɛna lɛtsa a kĩ kɛnɛ kĩ kɛna. Ⅸ Lɛmɛ kĩ mawɛ nɔ kalɛ sũ ni, nkɔa kudulike makpa nɔ mbom. Makɛna fukĩĩ midi kĩ yĩ, Paulo, Kristo Yesu fɔtɔ ɔnyanɛ, nwaa kɔla nɛ ye sũ. Ⅹ Nɛ foesũ nkɔa kudulike makpa nɔ nɛ Onesimo lɔlɔ. Ɛnyɛ yĩ mɔawɛ obi nɛ Kristo kamɛ. Ndani hũhũ kamɛ kɔlɛga nkpa ye nɛ lɔkɔ a kĩ nwaa kɔla a. Ⅺ Titɔ kĩ ye dĩ kayɔ nyɛ nfasɔ malo a, kɔkɔɛ a, ɔtána ye akũ nfasɔ adima, lɛmɛ finyaakĩĩ a, ye akũ deĩ nfasɔ ɛkpa bɔmɔ nɔ flee.

Ⅻ Nfɔ̃ emuniki yaya nɛ nɔ sɛkɛ̃, ade fɔakɛna yĩ ndɛ yĩ ɔwɔlɛ flee tomɔ ye a. ⅩⅢ Kĩ nwaa kɔla nɛ Kalɛ Wĩ a sũ ni, nwɛ kĩ ɛkahɔ nɛ yĩ sɛkɛ̃ nɛ awĩ kufɛ, ɛkaabumɔ yĩ adzuma nɛ nɔ kadokɔ̃. ⅩⅣ Lɛmɛ ntáwɛ kĩ mahɛ nɔ kĩ kpa yĩ kabumɛna, mbom mawɛ kĩ kɛna foe futo nɔ ɔwɔlɛ kamɛ. Foesũ nláakɛna lɛtsama mbɔɛntɛ otunɔ nɛ foe akũ.

ⅩⅤ Ɔsa Onesimo dzakũ nɛ nɔ sɛkɛ̃ nɛ lɔkɔ lukũ kamɛ, ayekĩ yaabuki emuniki ɛya nɛ nɔ sɛkɛ̃ ɛyaadzi flee. ⅩⅥ Finyaakĩĩ nnɛ́ ɔsate odi ebuki yanɛ, mbom ɛnyɛ oti kĩ ɛbɛ̃ ɔsate kɔlaa. Ɛnyɛ ɔwaɛ̃nyole kĩ maátunɔ ye kalɛ nɛ Kristo kamɛ. Dã ayekĩ ɛtɛ kɔya ɛkpa yĩ! Lɛmɛ yaabuki ɛtɛ kɔya ɛkpa nɔ ɛba ndɛ ɔsate aye, ade yaabuki ɛnya ɔwaɛ̃nyole nɛ boe Ɔlate dĩ akũ a.

ⅩⅦ Foesũ ntɛ ɔbɔɛ yĩ ndɛ nɔ ɔkɔba adzuma ɔkɛnanɛ aye ni, tɛ ye mɔ kawɔlɛ ndɛ ayekĩ aatɛ yĩ. ⅩⅧ Ntɛ edi nfumusu adi nɛ nɔ akũ, ĩye edzimɔ nɔ kɔtɔ kudi malo ni, bu foe akũ akunta kakɔa kakpa yĩ. ⅩⅨ Yĩ Paulo mɔawɛ lɛkɔa awɛ matsɛlɛ kĩ maase nɔ kɔtɔ. Lɛmɛ ntáwɛ kĩ mate nɔ anɛ kĩ nɔ mɔawɛ a odzimɔ yĩ nɔ nkpã kɔtɔ. ⅩⅩ Foesũ nwaɛ̃, mawɛ kĩ kpa yĩ kabumɛna kĩĩ nɛ boe Ɔlate sũ. Nɛ Kristo sũ kɛna foe ayekĩ ɔwɔlɛ aaka edzi yĩ.

ⅩⅪ Ntsɛlɛ ovoli kĩĩ mamɛna nɔ, ade matɛ kado kĩ aakɛna nɛ lɛtsa a kĩ mavia nɔ a akũ a. Ĩnyina pefee kĩ aakɛna ɔkpa yĩ fɔba ayekĩ nvia nɔ malo.

ⅩⅫ Fukĩ fubu nyɛ kĩ wɛ kɔla kayi yĩ, kitonɛkĩ matɛ kado kĩ Baguma aatse mi flee mpaɛbɔ lɔkɔa etunɔ ĩya nɛ mi sɛkɛ̃.

ⅩⅩⅢ Epafra, kĩ bɔmɔ ye waa kɔla nɛ Kristo sũ a bo yawɔ̃na nɔ! ⅩⅩⅣ Ade ayea Marko, mɔ Aristarko, mɔ Dema, mɔ Luka, yĩ bakɔba kĩ babumɔ yĩ adzuma kĩĩ kakɛna a, awɔ̃na nɔ.

ⅩⅩⅤ Boe Ɔlate Yesu Kristo ɛmɔ mi hũhũ flee kɔnya.