1  * Mat 23:13-15, 15:14; Luk 11:46; Jon 10:10; 1Ti 6:5; 2Pi 2:1 Yawetä ŋode yäyak; Wa! Juda äbotken nanik yawak ämawebenayeta watä irani uwä api waŋ moreneŋ! Watä äma uwä ämawebenaye däpmäŋpäŋ yäwat kireŋpewä ämetpeŋ kuŋtäŋpä kuk täkaŋ unita.

2 Unita Isrel täŋo Anutu Yawe unitä yawakiye täŋo watä ämata ŋode yäyak; Yawe näkä bureni ŋode yäŋahäŋpäŋ täwetat; Inä yawaknayeta watä säkgämän nämo itkaŋ täŋgaŋa-gaŋa täŋirä eruk ämet täŋpä kuŋkuŋo unita waki ude täŋkuŋo unita näkä kowata komi piä api tamet. 3 Ude täŋkuŋopäŋ yawaknaye komeni komeni täŋpewa kuŋtäŋpä kuŋpäŋ kumäŋ moreŋkuŋo kokoki ittäŋ kukaŋ u näkŋa äneŋi yämagut päbä ini yewaken äbot kubägän api yepmaŋpet. Ude täŋpakaŋ yeriniye ahäŋ bumbum api täneŋ. 4  * Sam 78:72; Apos 20:28-29; 1Pi 5:1-4; Jon 10:27-30 Ude täŋirä watä äma yabäŋ ahäŋpäŋ yepmaŋpa watäni säkgämän it yämiŋirä umunkät nämo kuŋarirä uken nanik kubätä jop nämo api paorek. Yawe näkä ude yäŋkehärom täyat.

5 Täŋpäkaŋ Yawe näkä äneŋi ŋode yäkgän täŋpa; Äma siwoŋi kubä Devittä äbotken nanik iwoyäŋpäŋ tewa kwawak ahäwekta kadäni kubä iwoyäŋkuro itak. Äma unitä intäjukun äma ude itkaŋ nadäk kädet siwoŋi täga terak ämawebe api yämagurek. 6  * Jer 33:14-16 Täŋpäkaŋ unitäŋo kadäniken Juda äbottä säkgämän irirä Isrel ämawebe bänep kwini terak api itneŋ. Täŋkaŋ unitäŋo wäpi ŋode api yäwetneŋ; Yawe siwoŋi irit kuŋat-kuŋat täŋo mähemnin bureni-inik.

23 Yawe näkä ŋode yäyat; Jide? Näk Anutu tuängän irani yäŋ nadäkaŋ? Nämo, näk banken imaka, it täyat. Näk uken-uken kudup it täyat. 24  * Stt 16:13; Sam 139:7-16 Täŋpäŋ äma kubätä kome kubäken käbop ireko uwä näk täga nämo kaŋ-ahäwek yäŋ nadäkaŋ? Ude nämo, näk kunum kenta kome käwuri käwuriken kudup it morek täyat.

25 Nadäkaŋ? Profet näk wäpna terak u ba u api ahäwek yäŋ yäk täkaŋ upäŋkaŋ jop man yäk täkaŋ. U däpmonken kaŋkumäŋ yäŋ yäk täkaŋ. Upäŋkaŋ nämo, näk jop man yäk täkaŋ u nadäk täyat. 26 Profet u man jop man iniken nadäkken nanik yäpmäŋpäŋ yäŋahäŋirä näkŋo ämawebenaye jop yäŋ-yäkŋat täkaŋ u jidegän api peneŋ? 27 Uwä imaka däpmonken kaŋpäŋ näwetgäwet täŋpäŋ ämawebenayeken yäŋahäŋpäŋ ŋode nadäk täkaŋ; Ude täŋitna ämawebetä Anutu mäde kaŋ ut imut, äbekiye oraniyetä mäde ut imiŋpäŋ anutu jopi Bal u iniŋ oret täŋkuŋo udegän yäŋ nadäk täkaŋ.

28  * 1Ko 3:12-13, 4:2; 2Ko 2:17; Hib 4:12 Unita profet kubätä imaka däpmonken käweko uwä ŋode yäŋahäwek; U däpmonkengän kat, u bureni nämo käwep yäŋ yänaŋi. Täŋ profet kubä näkŋo man bureni mena jinomken nanik yäpeko uwä näkŋo man u nadäk kubäkät nämo awähutpäŋ burenigän yäŋahäwek. Unita jide nadäkaŋ? Rais gupi pidämi u naŋpä tägawek, ba rais bureni naŋpä tägawek? 29  * Luk 24:32; Apos 2:37; 2Ko 2:16, 10:4-5 Yawe näkä ŋode täwera nadäwut; Näkŋo man bureni uwä kädäp mebet bumik, ba noŋ-gemäntä mobä däpmäŋ kokoyäk täkaŋ ude bumik yäk.