1 Upäŋkaŋ ŋode jop yäk täkaŋ; Yäke! Nin Yawe dubiniken äneŋi kuna yäk. Uwä nin nidäpmäŋpäŋ täŋpän waŋkuŋo upäŋkaŋ nadäkamäŋ; U jibi meni äneŋi api uwäktäŋ nimek yäk. 2 Bureni, kepma yarä ba yaräkubä täreŋirän unitä api nipmaŋpän tägane. Ude täŋirän ukät äneŋi bänep kubägän täŋpäŋ api it yäpmäŋ ärone yäk. 3 Eruk, Yawe nadäŋ imina. Unitäŋo mebäri ket nadäkta epäni gwäk pimiŋpäŋ täna! Ude täŋitna kome dapuritä tamimaŋ tamimaŋ bureni api äbäk täŋpek yäŋ nadäk täkamäŋ, ba iwäntä iwän kadäniken bureni tak täyak yäŋ nadäk täkamäŋ udegän Yawetä bureni api ahäŋ nimek yäŋ nadäkamäŋ.

4 Ämawebetä ude yäŋirä Yawetä ŋode yäwetkuk; Wära! Isrel äbot, jide api täŋ tamet? Ba Juda äbot, in imaka, jide api täŋ tamet? Näka gäripi nadäŋ namik täkaŋ uwä tamimaŋ täŋo gubamtä ahäŋpäŋ bäräŋeŋ äbutkuk täkaŋ ude. Ba guk näburum edaptä äbä täpuri iŋirän paot täkaŋ ude. 5 Mebäri unita näkä profetnaye ätu peŋ yäwerira inken päŋku mena jinom yäŋahäŋpäŋ täwetkuŋo unitä in tadäpmäŋpäŋ madäŋ jukut-jukut ude täŋkuk. Bureni, täwetpäŋ yäpä-siwoŋtak mannatä ahäŋ tamiŋpäŋ kädet näkä gäripi nadäk täyat u yäŋ-kwawataŋ tamiŋkuk, yäpätä kwinitpäŋ peŋyäŋek täyak ude. 6  * Sam 50:8-13; Ais 58:6; Mat 5:7, 9:13, 12:7; 1Jo 2:3, 3:6 Nadäkaŋ? Näk gupe käbäŋi nikek ijiŋ namikta nämo nadätat. Nämo, intä ämawebeta nadäŋ yämikinik täŋpeŋ kuŋatta nadäk täyat. Ba tom madäŋpäŋ ijiŋ namikta nämo, Anutu näkŋo mebäri nadäwä tärekta nadäk täyat.