Ukanikorongi u Kagita̱ u
Yahaya
Ukukpa̱ u kadyanshi
Yahaya korongu ta̱ ikanikorongi i kenu i kenu i tatsu ubana a asu ama kau‑kau. U na vi; wata, u kagita̱, u isa̱ ta̱ aza a uyan ka̱neshi vi mmuku n ne. Cinda Yahaya kasuki ka kpam makoshi ma Atoni a aꞌayin a nala yi, nala wenike ta̱ an ukanikorongi vi u Atoni u ɗa gba̱.
A ukanikorongi u na vi, Yahaya yan ta̱ kadyanshi ka tyoku ɗa uza wa rongo evu n Kashila̱. U yan ta̱ ka tyoku ɗa uza wa rongo evu n Kashila̱ ki icun ku re. Ure u kagita̱ u ɗa uza u rongo a katyashi ka Kashila̱. Ure u ire kpam u ɗa uza u rongo a uciga u Kashila̱.
Tagara̱da u na u yan ta̱ kadyanshi ka urongo a katyashi ka Kashila̱ u ɗa uza u rongo tyoku ɗa Kashila̱ ka ciga. Adama a nala ili iꞌa̱ kpam la iꞌya ya rongo usokongi a asu u ama n Kashila̱ kpam wa. Tagara̱da vi u yan ta̱ kpam kadyanshi ka uza u rongo a uciga u Kashila̱ u ɗa uza u cigi atoku pini na a likimba. A makorishi, u ciɓuga tsu ta̱ an tsa̱ri n utsa̱ra̱ u kaci u pige tsa̱ baci kaɓolo n Kawauwi.
Ili iꞌya iꞌa̱ri a tagara̱da u na vi
Udani u ɗa wa na̱ka̱ uma (1:1-4)
Kashila̱ ka katyashi, Yesu kpam aya iryoci i tsunu (1:5–2:6)
Kazuwamgbani ka savu (2:7-17)
Atokulalu a Kawauwi na̱ mmuku n Kashila̱ (2:18–3:10)
Uciga u Kashila̱ n uciga u tsunu (3:11–4:21)
Utsa̱ra̱ u kaci n likimba (5:1-21)
1
Akani a uma
1 Uza ɗa tun caupa wa̱ri pini a kagita̱ ki, aya uza ɗa tsu pana̱kai kpam tsu wenei. Tsu wene yi ta̱ n aꞌeshi a tsunu, tsu sawa yi kpam n akere a tsunu. Aya Yesu Kirisiti Kawauwi Udani u uma. 2 Uza ɗa u tsu na̱ka̱ uma, u tuwa̱ ta̱ ara tsunu! Tsu wene yi ta̱, kpam tsa tonuko ɗa̱ ili iꞌya tsu wenei vi. Gogo‑na ukuna u uma u ɗa bawu wa kotso u na u ɗa wa̱ri n Tata vi kpam u tuwa̱ tsu vi, u ɗa tsa tonuko ɗa̱. 3 Iꞌya tsu wenei kpam tsu panai iꞌya tsa tonuko ɗa̱, tsa̱ra̱ eɗa̱ dem i tsa̱ra̱ urongo u kaɓolo n a̱tsu u nala vi. Kaɓolo ka tsa̱ri n u ɗa n Tata n Maku ma ne Yesu Kawauwi. 4 Koronku ɗa tsa koronku ɗa̱ ili i na yi tsa̱ra̱ i shaɗangu n maza̱nga̱ kaɓolo n a̱tsu.
Kashila̱ katyashi ka
5 Udani u ɗa tsu panai ara Yesu Kawauwi u ɗa na, kpam u ɗa tsa tonusuko ɗa̱: Kashila̱ ka katyashi, kpam wa̱ri n karimbi wa, ko kenu. 6 Tsu da baci tsa̱ n uma kaɓolo n eyi, kpam tsu lyai kelime n urongo n uma u tsunu a asuvu a karimbi, aza a kaɓan a ɗa tsa̱ri, tsa tono ukuna u mayun wa. 7 Shegai tsa rongo baci a asuvu a katyashi tyoku ɗa Kashila̱ ka rongo a katyashi, tsa rongo ta̱ la vi kaɓolo n atoku. Kpam mpasa n Maku ma ne Yesu n wulukpe ta̱ unyushi u cingi u tsunu.
8 Tsu da baci tsa̱ n unyushi u cingi wa, kaci ka tsunu ka tsa yinsa̱, kpam ukuna u mayun wa̱ri a asuvu a tsunu wa. 9 Shegai tsu dana baci unyushi u cingi u tsunu, wa cimbusuka̱ tsu ta̱. Kpaci Kashila̱ ka tsu shaɗangu ta̱ kazuwamgbani ka ne, wa yan ta̱ ili iꞌya iꞌa̱ri mai. Wa wulukpe tsu ta̱ a asuvu a ukuna u cingi u ɗa tsu yain. 10 Tsu da baci tsu yan unyushi u cingi wa, Kashila̱ ka tsa isa̱ uza u kaɓan. Kpam tsa wenike kadyanshi ka ne a asuvu a atakasuvu a tsunu wa.