Gaalu Sɛʋɛi
Sɛʋɛi nii laaseigi ʋɛɛʋɛ ga gaalu sɛʋɛi, tɔɔzei toɠa Izelayɛle nuiti gaalu fai wosu ná zeizu mɔin. Izelayɛle nuiti kpegai ma ga tɔgiti kpein sɔlɔɔ, GALA ge feeni ti ya Sinayi gizei ma, ti ɠɛni ɠɛʋele ɓɛtɛzu ga ti ʋilɛ pelei zu, nii é liizu zooi zu, nii GALA ge ma minazeɠeni Izelayɛle nuiti bɛ (1:1--10:10). Ta-ziɛi ɠa dɛ liizu ga tiye Kadɛse-Ɓaalenea, nu lɔɔzuʋɛ ɓɔɠɔi zooi ná zu.
Kɛlɛ ti luani ga ti lɛɛ vai zooi ná zu, kɛni mu naazu ti kona ʋuunaanigɔ (40) ɠɛ teʋebai zu, ti ɠale ma, ti li ʋolu ga lɛkpɛma ʋelei nu yeezazuʋɛ, nii a kɛ ti Moaɓe yooi maazɔlɔɔ gaaɓelasu, ti kaku siɛ ɠoozagiti bo, kpoloɗɛi ʋɔ pelei folo ɠulazu ʋelei (10:11--21:35).
Gaaɠwɛsu ɠaaɓelagiti ta faiti ma ziiti dɛɛzu, niiti ti ɓogi zeiɗai Moaɓe yooi ʋa. Miná ɠa Izelayɛle a zoo é lɔ ga ná ʋelei Kanaan yooi zu (22:1--36:13).
Sɛʋɛi nii ɠa ʋilɛsu Ɛgezɔde ta Leevi nuiti ta-zɛʋɛi ti polu, é GALA ná-nuɓusɛiti kɛʋelei lɛ, ta-nuɓusɛlai zu, ʋɛ lada vai ta inɛinɛ faiti ti ná, ta iɲɔdɔɔi ta iɲɔteʋei, ta bɔɔlɔi ta unmaayei. Toɠa GALA ná-wooɠɛɠiladai lɛɛzu ɓalaa, nii é la latiga, é ʋa ɠɛ ga ma ɲɔu, ná-nuɓusɛiti tetema, wooɠɛɠiladai nii é la ná-to kpaangi ta ná-telebodai zeɠea ma.
Moize ɠa tosuʋɛ ná ɓaai Maliɠii ta ná-nuɓusɛiti zɔɠɔzu, GALA ná-faiti maaɓakpa fai, toɠa ga naama ɠeelai, ta nii nɛɛbɛ ɠilibalai su, toɠa losu tɔun kakala ɓalaa, é ɠɛ ga maalobo nui, nii é la ɓɔlɔa woovele nuɓusɛiti ta-vaa zu.
IZELAYƐLE NUITI KƐAI MA
SINAYI TEƲEBAI ZU
SINAYI TEƲEBAI ZU
1
(1:1--10:10)
Izelayɛle nuiti gaalu faa mɔungi
1 Ɠɔoɠɔ GALAGI ɓɔɛni Moize ʋɔ Sinayi teʋebai zu, GALA daaɠomi seɠe ʋɛlɛi wu, alugi velesiɛi ma volo mɔungi ma, ti ɠulaai ma Ezipete yooi ʋa, ma ɠonagi velesiɛi. É ɠɛni ma: 2 «À Izelayɛle nuɓusɛiti kpein gaalu, eɠɛʋelei ta-wolodamaiti ti la, ta ta-ʋɛlɛyeɠeiti, wo zunuiti kpein gaalu, 3 é zo kona ʋuufelegɔ (20) ma, é lɛ zeemaazu, nii dɔin seeliai kɔɔɠɔ vai ma Izelayɛle nuiti saama. Wa Aalɔn, wa ti ɠaalu ga kɔɔʋɛbɛi ɠɛʋelei.
4 «Zunu ɠilagila ka ɠɛ wo ʋa, é ɠula bolodai ɠilagilagi zu, zunui nii a ɠɛ ga pɛlɛyeɠe ɠundiɠii. 5 Wɛlɛ zunuiti daaseigiti ba, niiti ta ɓɔ wo ʋa:
Luɓɛn ʋɔ bɛ, Elisuul, Sedeyuul ná-doun zunui,
6 Simiyɔn ʋɔ bɛ, Selumiyɛle, Sulisadayi ná-doun zunui,
7 Zuda ʋɔ bɛ, Naason, Aminadaɓe ná-doun zunui,
8 Isakaal ʋɔ bɛ, Netaneyɛle, Suaal ná-doun zunui,
9 Zaɓulɔn ʋɔ bɛ, Eliaɓe, Ɠeelon ná-doun zunui,
10 Zozɛfe ná-doun zunuiti pɔ bɛ,
Efelayime ʋɔ bɛ, Elisama, Amiyude ná-doun zunui,
Manasee ʋɔ bɛ, Gameliyɛle, Peedaasuul ná-doun zunui,
11 Ɓɛnzamɛn ʋɔ bɛ, Aɓidan, Gideyɔni ná-doun zunui,
12 Dan ʋɔ bɛ, Ayiyezɛɛl, Amisadayi ná-doun zunui,
13 Asɛɛl ʋɔ bɛ, Pagiyɛle, Wɔkelan ná-doun zunui,
14 Gade ʋɔ bɛ, Eliazafe, Deyuwɛle ná-doun zunui,
15 Nɛfetali ʋɔ bɛ, Ayila, Enan ná-doun zunui.»
16 Naati ka ti ɠɛni ga nuɓusɛiti gaazuʋɛti, ti ti lolini. Ti ɠɛni ga ta-wolodamaiti ta-lotuɠɔiti. Tiya ɠa ti ɠɛni ɓalaa ga Izelayɛle ɠɔɔɓɔgi ma ɠundiɠiiti.
17 Moize ta Aalɔn ti zunui niiti kpɔni ɓɔɠɔ ʋa, niiti ziimazeɠegi ɠɛni ga tiye ga ti-laaseigiti. 18 Ti nuɓusɛiti pɛ gaalɛɛni ba, alugi velesiɛi ma volo mɔungi ma. Ti Izelayɛle nuiti kpein gaaluni, eɠɛʋelei ta-wolodamaiti ti la, ta ta-ʋɛlɛyeɠeiti. Ti zunuiti daaseigiti sɛʋɛni ga gilagila, é zo kona ʋuufelegɔ (20) ma, é lɛ zeemaazu, 19 eɠɛʋelei Ɠɔoɠɔ GALAGI ma levei veeni la Moize ya. Zekana Moize ta-ɠaalugi woni da Sinayi teʋebai zu.
20 Luɓɛn, Izelayɛle ná-doun zunu mɔungi, mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 21 Luɓɛn ná-bolodai zu nii gaaluni, naa ɠɛni ga zunu waaʋuunaani maazu lɔzita undɔɔlugɔ (46 500).
22 Simiyɔn mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 23 Simiyɔn ná-bolodai zu nii gaaluni, naa ɠɛni ga zunu waaʋuulɔɔlu maazu taaʋuu unsaʋagɔ (59 300).
24 Gade mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 25 Gade ná-bolodai zu nii gaaluni, naa ɠɛni ga zunu waaʋuunaani maazu lɔɔlu undɔzita puulɔɔlu (45 650).
26 Zuda mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 27 Zuda ná-bolodai zu nii gaaluni, naa ɠɛni ga zunu waaʋuulɔfela maazu naani undɔzita (74 600).
28 Isakaal mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 29 Isakaal ná-bolodai zu nii gaaluni, naa ɠɛni ga zunu waaʋuulɔɔlu maazu naani unnaani (54 400).
30 Zaɓulɔn mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 31 Zaɓulɔn ná-bolodai zu nii gaaluni, naa ɠɛni ga zunu waaʋuulɔɔlu maazu lɔfela unnaani (57 400).
32 Zozɛfe ná-doun zunui Efelayime mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 33 Efelayime ná-bolodai zu nii gaaluni, naa ɠɛni ga zunu waaʋuunaani undɔɔlu (40 500).
34 Manasee mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 35 Manasee ná-bolodai zu nii gaaluni, naa ɠɛni ga zunu waaʋuusaʋa maazu fele unfelegɔ (32 200).
36 Ɓɛnzamɛn mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 37 Ɓɛnzamɛn ná-bolodai zu nii gaaluni, naa ɠɛni ga zunu waaʋuusaʋa maazu lɔɔlu unnaanigɔ (35 400).
38 Dan mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 39 Dan ná-bolodai zu nii gaaluni, naa ɠɛni ga zunu waaʋuulɔzita maazu fele undɔfela (62 700).
40 Asɛɛl mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 41 Asɛɛl ná-bolodai zu nii gaaluni, naa ɠɛni ga zunu waaʋuunaani maazu ɠila undɔɔlugɔ (41 500).
42 Nɛfetali mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 43 Nɛfetali ná-bolodai zu nii gaaluni, naa ɠɛni ga zunu waaʋuulɔɔlu maazu saʋa unnaanigɔ (53 400).
44 Naati tiegɔi ɠa Moizeni ta Aalɔn ti gaaluni. Zunu puugɔ maazu felegɔiti (12) niiti ti ɠɛni ga Izelayɛle woloda ɠundiɠiiti, naati ti ɓɔni ti ʋa. 45 Izelayɛle nuiti saama, niiti kpein ti ti ɠaaluni, eɠɛʋelei ta-ʋɛlɛyeɠeiti ti la, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ, 46 ti ɠɛni ga zunu waaundɔzita zunu waasaʋagɔ undɔɔlu puulɔɔlu (603 550).
Leevi nuiti ta-vai
47 Leevi nuiti ta-wolodai zu, ti-ɠɛɛ ʋɛlɛyeɠeiti bu, ti ɠaa la ɠɛni luni ti zaama. 48 Ɠɔoɠɔ GALAGI ɓɔɛni Moize ʋɔ, é ɠɛ ma: 49 «Mina Leevi nuiti ta-wolodamaiti gaalu, mina ti ɠaalu Izelayɛle nuiti saama ɲɛgɛlɛin. 50 Seɠe ʋɛlɛ ɲadegai, nii zeele woo ɠesui bu, naa ma wotii ve Leevi nuiti zea, ta ma zɔɔlaiti kpein, ta nii kpein é ga naama vai. Ta seɠe ʋɛlɛi zeɠe, ta ná-sɔɔlaiti kpein, ti ná-botii ɠɛ, ti ʋu seɠe ʋɛlɛ ɲadegai maaɠoolii zu. 51 Siɛgi zu seɠe ʋɛlɛ ɲadegai a ɠɛna zeɠea la losuʋɛ, é ʋa li ada ɠili, Leevi nuiti ta kulakula ba, ti to ʋolu ga niinɛ, ʋɛ ta ɠɛ zeizu ná. Zɔi nɔpɛ a maaɓuɠana ná ʋa, nii é la ga Leevi ná-bolodai zu nui ta, ta naama nui ʋaa. 52 Izelayɛle nuiti ta ʋu ti-ʋuuzuʋɛ ti ɠilagilagi, ná-bolodai ná-poogi ɠobaʋɛ. 53 Kɛlɛ Leevi nuiti ta ʋu seɠe ʋɛlɛ ɲadegai maaɠoolii zu, nii zeele woo ɠesui bu, naa ɠa a kɛ nà-ziiɠaawanai mina vuka Izelayɛle ʋɛbɛi ma. Leevi nuiti ta ɠɛ seɠe ʋɛlɛ ɲadegai makɛsu.»
54 Izelayɛle nuiti ti ɠoloni, ti deveiti kpein so, niiti Ɠɔoɠɔ GALAGI ti veeni Moize ya.