Naɠuume
Ná-Sɛʋɛi
Wooi lɔɔzeigi
Naɠuume ná-sɛʋɛi ɠa Ninive wolo vai wosu ma yeeluɠɔ, Asiili nuiti ta-masadai ma laa wolai, nii Izelayɛle ɠɛni duɔlai ti ya. É zɛʋɛni Tɛɓese zo siɛgi laawu Asiili nuiti bɛ kona undɔzita puulɔzita maazu saʋagɔ (663) ma, aisa Yesu ʋa zɔlɔɔ eteai zu, ta Ninive wolo ziɛgi laawu Ɓaɓilɔne nuiti bɛ kona undɔzita puugɔ maazu felegɔ (612) ma, aisa Yesu ʋa zɔlɔɔ eteai zu.
Faa wola zeizu saʋagɔ ɠa è niima zɛʋɛi zu: Faa mɔungi ɠa faiti pɛ dɛɛzu é ti zu ɠɛ kala, ta é GALA ná-zobogi lɛ, é masadai ɠɛɛzu la kpɛtɛaniiti kpein unda, ta é eteai lukpɔɠaaleʋezu la (1:2-8). Fai velesiɛi ɠa zobogi naa ɠula ʋelei lɛɛzu kɛlɛma naama ziɛgi zu ɠundiɠilai ziɛ ʋelei zu, Naɠuume ná-foloi zu, Ninive taa wolai naa ɠoloɠolo fai zu, nii é ɠulani naa zu, naa ɠɛni ga Zuda nuiti fie fai (1:9-2:3). Fai saʋasiɛi ɠa Ninive zuɠoloɠolo pelei lɛɛzu, ta zobogi nu a pokɔɠɔ ma (2:4-3:19).
GALA ná-keelai ná-keela wooi la ɠɛni nɔ ga, é Ninive ɠoloɠolo fai nɔ laazeeli. Kɛlɛ Naɠuume ɠa náʋɛ ɠoloɠolo fai lɛɛzu ga, kɛɛʋɛ ga GALA ná-tukpɔɠaaleʋeai. Taa wolai, wasogi ta nu ʋaai ta koloɠologi su, Ninive ɠa ga nuɓusɛi ná-zobogi, kpɛtɛai faiti maazu, nii GALA ge la vaani bu. Naɠuume ná-sɛʋɛi ɠa lɛɛzu ga adeye, é ʋilɛ niizu vaiti ba, ga naama zobogi ma zii pɛ deveʋɛ ga gaaʋala ba.
1
Tukpɔ vai Ninive laai laalɔɠɔma
1 Keela wooi ɠa ga nii, é wosu Ninive * Ninive ɠɛni ga Asiili yooi ma masa taa wolai. ma. Naɠuume Ɛlekɔse nui ná-kulakɛlɛma zɛʋɛi.
2 Ɠɔoɠɔ GALAGI ɠa ga GALAGI nii toloai ta potokula nui.
Toɠa nɔnɔi ʋotokulazu, ná-ziiɠaawanai maayikiʋɛ gola,
toɠa ɗa nɔnɔi ʋotokula sakpeɲɔɠɔiti ma,
toɠa ɗa ná-ziiɠaawanai zei yiima sili nuiti daalɔɠɔma.
3 Ɠɔoɠɔ GALAGI yii la ɗa ga ɠula fala,
ná-zobogi zuwɔɔlɔʋɛ,
kɛlɛ é la ɗa ga faa ɲɔu ɠɛ nui zalalalai yɛ ga.
Fiilɛ wolai ɠa ɗa lokoleʋe, siɛgi zu é leʋesu da.
Tonaɓiingiti ka ti ga kɔɠɔa vufiligiti.
4 Toɠa ɗa zelii lo kpoloɗɛi ma, é fɔ su,
toɠa ɗa ziɛ wolaiti pɛ fɔ su.
Ɓasan ta Kaalemɛle lufaiti ti ɓɔikpɔi,
Liɓan lufa ʋuaiti ti ʋoolo. † Ɓasan, ta gulu ɓeleiti ti Kaalemɛle gizei ma, é ʋɛɛ Liɓan ɠizeiti ba, mináti ka aniiti ti ɓena wola ɓɛtɛ ná, naama yooi yɔɠɔzuʋɛ.
5 Siɛgi zu é wuzeɠezu la, gizeiti ta ɗa ɓali,
gize goiti ti ɗa ɲiikpi,
eteai zasu ɠa ɗa ɓali gaazu,
eteai é ɓɔ gaa anii pɛ ba.
6 Ɓɛ ɠa a zoo é lo tuɠɔ ná-ziiɠaawanai zu?
Ɓɛ ɠa a yɛ loni tuɠɔ, zii a ɠulana?
Ná-ziiɠulagi ɠa ɗa ɠɛ eɠɛ abui teʋegai,
anɛɛ kɔtu wolaiti ta ɗa vuka tuɠɔ.
7 Ɠɔoɠɔ GALAGI ʋagɛ,
toɠa ga nu lɔɔɠuzu kidaaʋili foloi.
Toɠa ɗa ɓaa naati maazu, zɔiti ti lɔɔɠuzu pɔ bɛ.
8 Toɠa Ninive ɠoloɠolo mɛtu ga ziɛvegi é ʋuuzu ya,
é sili nuiti daaʋili kpidii zu.
Nii ɠa wosu Zuda ma
9 Leeni ɠa wo ɠisiɛzu su Ɠɔoɠɔ GALAGI laalɔɠɔma?
Toɠa é faa zuɠoloɠologi ɠɛai mɛtu,
kidaaʋiligi ʋaala la ɠɛa fele!
10 Ti ɠɛɛʋɛ eɠɛ kpɔvɔi zu ɠaingiti ti velevelegai ɓɔɠɔ ma,
ti dɔɔi ɓɔlezu eyɛsu é ti zo.
Ta ɠala mɛtu eɠɛ tufa vɔɔi.
Nii ɠa wosu Ninive ma
11 È ʋɔ bɛ ɠa nu zeɠeai ná,
nii é ɠɛni ɠisiɛzu faa ɲɔi zu Ɠɔoɠɔ GALAGI laalɔɠɔma,
é ɗa nu ɲaka ɠisiɛi wo.
Nii ɠa wosu Zuda ma
12 Ɠɔoɠɔ GALAGI wooi ɠaa:
«Anɛɛ ni wo zili nuiti mɔinʋɛ, ti zuɓa,
ta ɲɛɛlɛ, gila kpalaa ge la yɛga ná.
Anɛɛ ni gè wo unfeni,
gè la mɔ naa taɠili kɛa pɛ.
13 Nà wo viesu niina,
gè wo ɠula wo zili nuiti ta-luɔlai zu,
gè wa-yɔlɔɠɔiti galeɠale, ti vie wo ma.»
Nii ɠa wosu Ninive masagi ma
14 Wɛlɛ nii ɠa Ɠɔoɠɔ GALAGI deveai è laalɔɠɔma:
«È la è-mavofoda zɔlɔɔga, è-laaseigi ʋa ʋɛɛ ti ʋa,
nà ɗa-ɠɔɔɠɔ ganigiti ti ga gului ɓa kɔlu ɠaawuungaiti kula ɗa-ɠalagi ná-pɛlɛi wu,
gè ti ɠoloɠolo.
Nà ɗa-ɠabayeɠei ɓɛtɛ,
mazɔlɔɔ nɔ̀un gaazu, wo la mɔ ga ani nɔpɛ.»