2 KÖRIN
Manih po kiun vëh ne Pöl to kiun hah, ko vanö ke na a napan va po vaman va Körin, manih pa muhin va Mësadoniaꞌ. Körin eꞌ a vöön apuh va pa muhin va Akaëaꞌ, keꞌ, Grik.
O poen ne Pöl to kiun momoaan ke na a napan va Körin, eꞌ to pah soe viivi en pee, pareꞌ pah vanö poꞌ e Taëtus manuh pee, pan eꞌ se nat maꞌ pa taateꞌ pee, pareꞌ hah maꞌ ko soe tavus ke poan. E Taëtus to hah maꞌ, pareꞌ soe ke Pöl pan, ‘A napan va Körin to pënton ee pa soe pën, ko panih voh ee pa ma taateꞌ hat pee. Ivëhkëk, o upöm to koe ee, ko hikta iu teꞌ ne paan a tasun pën.’
Manih po kiun vëh, eꞌ to teꞌ non a taanaꞌ tah apuh. A tah vamomoaan ivëh pan, e Pöl to vaeö rakah me non o teꞌ varih to panih, pare koe a ma taateꞌ hat pee. Ka vapöök tah ivëh pan, eꞌ to vaato hah me raoe suk a ma kokoman va pa Soe Vih pe Ieesuꞌ Kristo. Ka vakön tah ivëh pan, eꞌ to vaato me raoe suk ee se heꞌ o teꞌ arus a ma tah nee to iu heꞌ akuk ne raoe vamanih po heꞌ pee. Ka vataanaꞌ tah, neꞌ to soe vamaaka ke raoe pan, eꞌeꞌ koman a aposol vamaman.
A ma kiun varih to tataki va ne manih pan.
A soe vaeö to nö non pa napan va Körin, me a soe vaeö manuh pe Sosoenën. 1:1-11
A napan va Körin to vatamak voh e Pöl, ivëhkëk, e Pöl to iu teꞌ vaꞌpeh me e non pee. 1:12-24; 2:1-13
A kiu vamaman pe Pöl ivëh, a soe tavus o vatömpoan voon pe Sosoenën vaꞌpeh me a napan. 2:14-17; 3:1-18; 4:1-18; 5:1-21; 6:1-10
E Pöl to soe tavus o haharaꞌ peꞌ manih pa napan va Körin. 6:11-18; 7:1-16
A taateꞌ va pa vamatop o heꞌ nee to he akuk suk o iu pee, to taneꞌ maꞌ pa ma kokoman koman pee. 8:1-24; 9:1-15
E Pöl to vatvus a ö no aposol to teꞌ suk me ne a ma vëknöm to nö vaꞌpeh me non a kiu pee. 10:1-18; 11:1-33; 12:1-21
O iu pe Pöl me a kiu vëhvaꞌ peꞌ pa rëh a napan pa vatet e Ieesuꞌ, me a soe ataaton peꞌ pa napan va Körin. 13:1-13
1
E Pöl To Soe Tavus A Kiu Ne Sosoenën To Heꞌ O Aposol
1 Eöꞌ e Pöl, eöꞌ e aposol pe Ieesuꞌ Kristo, po iu koman pe Sosoenën keꞌ kon a neoꞌ, köꞌ tavus e aposol peꞌ. Ko kiun vaꞌih ne kea peöꞌ Timotiꞌ to teꞌ vaꞌpeh me a non neöꞌ, köꞌ kiun ko vanö ka nös neöm, o kum teꞌ varih to vaman nem e Sosoenën manih Körin, me ra ma napan pe Sosoenën to teꞌ ne manih pa muhin va Akaëaꞌ.
2 Eöꞌ to hinhin noꞌ e Tamaara Sosoenën, me e Sunön pea Ieesuꞌ Kristo, pan ee se ururuan a ra, pare heꞌ a ra a taateꞌ moomo.
E Pöl To Soe Vavihvih Ke Sosoenën, Suk A Ö Neꞌ To Vatö A Ma Punis Peꞌ
3 Ea se vaeö para kë a ëhnan e Sosoenën Taman, eꞌ e Sosoenën e Taman e Sunön pea Ieesuꞌ Kristo. Eꞌ e Tamaara, me eꞌ a taneo in a ma taateꞌ uruan me a taateꞌ vatö a ma punis. Ke eꞌ e Sosoenën se nok a ma kokoman po teꞌ varih to teꞌ me ne a ma punis, kee töötö ee. 4 Ka ma punis kurus varih to tatavus ne manih pea, ne Sosoenën to vavaatö këh e non sih pea, ka onöt e no pa vatö o kokoman pa napan varih to tataum ne a ma vu punis, vamanih pa ö ne Sosoenën to vavaatö va i non sih a ma kokoman pemöm. 5 E Ieesuꞌ Kristo to teꞌ voh o kamis o pöh apuh rakah, kemöm me to haraꞌ me e nem po vu kamis pamëh. Ivëh, no a taateꞌ moomo pe Ieesuꞌ to puh suk non manih pemöm kuru. 6 Ko poen no a punis se taum a möm, a ma vu punis poë varih, to vaꞌaus ee peöm, keꞌ onöt po poen ne Sosoenën to kon taneꞌ hah en peöm pa ma punis poë varih. Suk ataeah, e Sosoenën to vaꞌaus a möm, ka ma kokoman pemöm teꞌ tö e ne. Ka tah pamëh vavaꞌaus a no neöm, ka ma teꞌ kokoman peöm teꞌ tö me e ne. Oman, o poen nöm to sun vakis nem paröm teꞌteꞌ nem a ma vu punis varih nemöm to teꞌteꞌ nem sih, e Sosoenën se vatö en pa ma kokoman peöm, kee tö ee. 7 Kemöm vaman vakis e nem, pan eöm se sun vakis rakah e nem, manih pa ö no a ma punis se tavus maꞌ. Suk ataeah, emöm to nat e nem, peöm se kamis vaꞌpeh me em pemöm. Ivëh, ke eöm me se kon vaꞌpeh me em pemöm po kokoman tö.
8 Kën kea, me ra kën vamen, emöm to iu nem a ö nöm se nat vavih nem pa ma punis varih to tavus voh a möm manih pa muhin va Esiaꞌ. A punis apuh pamëh to vöknah rakah voh en pemöm, ko onoah en pa ma teꞌ kikis pemöm. Ivëh, kemöm koman em pan, emöm se mëtmët em. 9 Oman rakah, manih pa ma kokoman pemöm, nemöm to haraꞌ vavoh e nem a ma vu punis poë varih, vamanih pa ö no a teꞌ pëpënton vahutët to soe ka teꞌ pepeat pan, “Eën se mët.” Ka tah pamëh to tavus me voh en manih pemöm, ko vaꞌnaöp en pemöm, pan emöm se nat nem koman hah nem o kikis pemöm. Ahik. Emöm se koman varoe ko nem o kikis pe Sosoenën to onöt non a kunkuin hah a nap mët. O kikis pamëh to antoen pet e non pa vaꞌaus a möm pa teꞌ a ma teꞌ punis pemöm. 10 Ka tah hat pamëh to onöt rakah e non pa ip vamët a möm. Ivëhkëk, e Sosoenën to kon hah en pemöm. Amot me, neꞌ se vaꞌaus hah en pemöm. Kemöm vaman vakis va e nem manih pan, e Sosoenën se vaꞌaus hah en pemöm, kemöm teꞌ vavih e nem. 11 Ivëh, ke eöm se hinhin vaꞌaus a no möm. Ke Sosoenën sih pënton a hin pa nap peo, pareꞌ vaꞌaus a möm. Ka tëëm no a nap peo se ep a ö ne Sosoenën to vaꞌaus va ka non möm, pare vavihvih me poë.
E Pöl To Hikta Pikpiuk Non A Napan Va Körin
12 Eöꞌ to soe vavaeö suk hah öꞌ pa tah vaꞌih. Manih po kokoman peöꞌ nöꞌ to nat va noꞌ manih pan, eöꞌ to nonok noꞌ a taateꞌ totoopin vih, me a taateꞌ man manih pa napan kurus, ee a ma taateꞌ ne Sosoenën to heꞌ voh a neoꞌ. Eöꞌ to hikta vatet maꞌ o nat ne ea a napan va po oeh vëh to vatet voh maꞌ. Ahik. O ururuan varoe ko pe Sosoenën to vaꞌaus voh a neoꞌ, pareꞌ heꞌ a neoꞌ a taateꞌ vaꞌih. Eöꞌ to nok vakis voh a taateꞌ pamëh po poen ne eöꞌ to teꞌ vaꞌpeh me voh a noꞌ neöm, a napan va Körin.
13-14 Ka ma poen nöꞌ to kiun ka nös neöm a ma kiun, eöꞌ to kiun a soe to onöt non neöm se ëh, ko maaka a pusun in a soe pamëh. Eöꞌ to hikta kiun ka neöm ta meh soe to matan ke non. Oman, a ma meh poen ne eöm to hikta se maaka vavih nem a ma soe kurus nöꞌ to kiun nös. Ivëhkëk, eöꞌ to iu rakah noꞌ a ö nöm se maaka vavih a pusun in a ma soe peöꞌ. Ka manih po vahutët apuh pe Sunön pea Ieesuꞌ, eöm se vaeö suk rakah em peöꞌ, vamanih pa ö nöꞌ to vavaeö va ka noꞌ neöm sih
15-16 Eöꞌ to vaman rakah e noꞌ peöm to haraꞌ vaeö suk e nem pa taateꞌ nöꞌ to nok, keꞌ a pusun in a ö nöꞌ to koman suk noꞌ pan eöꞌ se nö momoaan nös peöm, ko ep voh ka neöm. Eöꞌ se ep ateꞌ ka neöm, ko oah eoꞌ manuh pa muhin va Mësadoniaꞌ. O poen nöꞌ se këh hah maꞌ a muhin va Mësadoniaꞌ, eöꞌ to koman e noꞌ pa hah maꞌ pa ep a neöm. Manih pa taateꞌ pamëh ne Sosoenën se taneo en pa nok vavih a neöm pa vapöök tëëm. Me eöm me to onöt e nem pa vaꞌaus a neoꞌ, köꞌ nö eoꞌ manuh pa ö muhin va Jiutiaꞌ. 17 Eöꞌ to hikta nö momoaan voh nös pa ep a neöm. Ivëh, köm koman va poꞌ nem nih, eöm koman kës e nem pan, eöꞌ to nok o kokoman vaꞌih, marën a piuk a neöm, ha? Me eöm to koman kës nem pan, eöꞌ to nok akuk, paröꞌ panih ekeok a soe vaman pamëh, vamanih pa ö no a napan va po oeh vëh to nonok va ne sih, ha? Eöm koman kës nem pan, eöꞌ se soe, “oman”, me “ahik”, ha? Ahik rakah. 18 E Sosoenën to suksuk rakah non a soe koman peꞌ. Eöꞌ me se soe vamaman rakah keoꞌ peöm pan, a ma soe kurus nöꞌ to sosoe ka noꞌ neöm, to hikta teꞌ me ne a soe, “oman”, me a soe, “ahik”. 19 Eöꞌ, ke Saëlas, ke Timotiꞌ, emöm to soe tavus voh kem peöm pa soe vaꞌih, nemöm to vatvus voh ka neöm a soe koman pe Ieesuꞌ Kristo, e koaꞌ pe Sosoenën. Eöm to nat me e nem pe Ieesuꞌ to hikta onöt non a soe, “oman”, me “ahik”. A ma tamoaan ne Kristo to vavaonöt ro ko non sih a ma soe peꞌ pa soe, “oman”. 20 Eꞌ to teꞌ non a ma Soe vaman pe Sosoenën to teꞌ non. Ke Kristo to vavaonöt tamoaan non sih a ma soe vaman peꞌ manih pa soe, “oman”. Ivëh, ka se keh pënton a soe pe Sosoenën manih pa ëhnan e Kristo, ea se soe ee pan, “eꞌ o man rakah”. Ivëh, na to kë suk no sih a ëhnan e Sosoenën. 21 Eöm se nat va nem manih pan, e Sosoenën koman to vakikis a rora, ka vatös no manih pe Ieesuꞌ Kristo, para teꞌ vakis no, ke Sosoenën kon en pea a napan koman peꞌ. 22 E Sosoenën koman to vahoꞌ voh en po vëknöm peꞌ manih pea, marën a vataare vamanih pan, ea a napan koman peꞌ. Pareꞌ vahoꞌ a Tuvuh Vasioꞌ peꞌ manih pa komaara. A Tuvuh Vasioꞌ to teꞌ va non manih pa tah vamomoaan va pa ma tah vihvih, ne Sosoenën to kehkeh heꞌ a rora. Ea to kon voh ee pa Tuvuh Vasioꞌ, ivëh, ka se nat va no manih pan, oman rakah, amot na se kon ee pa ma tah vihvih poë varih, neꞌ to nok suk voh pa soe vaman peꞌ.
E Pöl To Hikta Nö Hah Manuh Körin
23 Eöꞌ se soe va keoꞌ peöm manih pan, manih pa ëhnan e Sosoenën, eꞌ a teꞌ va pa vaeh a ma soe peöꞌ. Ke eöꞌ soe vamaman rakah keoꞌ peöm, eöꞌ to hikta nö voh nös peöm maneom Körin, suk ataeah, eöꞌ to hikta iu heꞌ a noꞌ neöm a punis ko vakmis a neöm. 24 Eöꞌ to hikta soe vavoh manih pan, emöm to matop nem nös a ma vaman peöm. Ahik. O vaman peöm to sun vakis rakah voh en. Eöꞌ to kikiu vatös tamoaan me a noꞌ neöm sih pa vatvus o vaeö manih peöm.