1 Neꞌeŋa a Yesu one a David yaaŋ, ka a Abraham yaaŋ la yaanam yela. 2 Abraham duꞌa Isaak. Ka Isaak duꞌa Jakob. Ka Jakob duꞌa Juda, ne o bieya ne o pitib. 3 Ka Juda duꞌa Perez ne Zera, ka ba ma yuꞌur a Tama. Ka Perez duꞌa Heziron. Ka Heziron duꞌa Ram. 4 Ka Ram duꞌa Aminadab. Ka Aminadab duꞌa Nason. Ka Nason duꞌa Salmon. 5 Ka Salmon duꞌa Boaz, ka Rahab aa o ma. Ka Boaz duꞌa Obed ka Ruf aa o ma. Ka Obed duꞌa Jese. 6 Ka Jese duꞌa naꞌab David.

Ka David duꞌa Solomon. O ma da ane Uria poꞌa. 7 Ka Solomon duꞌa Rehoboam. Ka Rehoboam duꞌa Abija. Ka Abija duꞌa Asa. 8 Ka Asa duꞌa Jehosafat. Ka Jehosafat duꞌa Joram. Ka Joram duꞌa Uzia. 9 Ka Uzia duꞌa Jotam. Ka Jotam duꞌa Ahaz. Ka Ahaz duꞌa Hezekia. 10 Ka Hezekia duꞌa Manase. Ka Manase duꞌa Amos. Ka Amos duꞌa Josia. 11 Ka Josia duꞌa Jekonia ne bisieba. Saŋkan la ka ba gbanꞌe Israel dim n more ba keŋ Babilon la.

12 Ka ban keŋ Babilon la, li nyaꞌaŋ, ka Jekonia duꞌa Sealtiel. Ka Sealtiel duꞌa Zerubabel. 13 Ka Zerubabel duꞌa Abiud. Ka Abiud duꞌa Eliakim. Ka Eliakim duꞌa Azor. 14 Ka Azor duꞌa Zadok. Ka Zadok duꞌa Akim. Ka Akim duꞌa Eliud. 15 Ka Eliud duꞌa Eleazar. Ka Eleazar duꞌa Matan. Ka Matan duꞌa Jakob. 16 Ka Jakob duꞌa Josef, Meeri sid, one da a Yesu on ka ba buon Kiristo la ma.

17 Neꞌeŋa paꞌal ye Abraham n ti paae David ane yaanam konꞌob konꞌob piinanaasi. Ka David n ti paae saŋkan ka ba more Israel dim keŋ Babilon la ane yaanam konꞌob konꞌob piinanaasi. Ka saŋkan ka ba more ba keŋ Babilon la n ti paae Kiristo la da ane yaanam konꞌob konꞌob piinanaasi.

18 Yesu Kiristo duꞌam daa ane nwa. O ma Meeri daa ane Josef poꞌaꞌeliŋ. Ka Josef daa nan pu baŋ o la, ba nye ka o mor ne poog lin a Winaꞌam Siig Suŋ la din. 19 Ka o sid Josef ane dau kane a sida sob, ka pu bood ye o diis Meeri nyan nidibinee, ka gbanꞌe o potenꞌerin ye o suꞌa bas Meeri.

20 Ka on daa tenꞌesid yelbama o suunrin la, ka Zugsob malek kenn o saꞌan na zaansuŋin. Ka malek la yel o ye, “Josef, David yaaŋa, da ke ka dabiem kpenꞌ uf ne fun na diꞌe Meeri ka o niŋ fu poꞌa, bozugo biig kan poog ka o mor la, ane Winaꞌam Siig Suŋ la din. 21 Ka o na duꞌa biribiŋ. Ka fu na pud o yuꞌur ye Yesu, bozugo o na faaenn o nidib ba tuumbeꞌedin.”

22 Yelbama wusa daa niŋ ne ye Zugsob la da ke ka o nodiꞌesidib la yel siꞌel la niŋ ameŋa ye, 23 “Gosima, poꞌasadir kane ziꞌ dau la, na tuk poog n duꞌa biribiŋ, ka ba na pud o yuꞌur Emanuel, lin gbin ane ye, Winaꞌam be ne ti.”

24 Ka Josef nie gbeemin n niŋ wuu Zugsob malek la yel o siꞌem la, ka piꞌe o poꞌa kul. 25 Amaa o daa pu baŋ oo, hale ka o ti duꞌa biribiŋ la. Ka o pud biig la yuꞌur Yesu.