1 Man Paul ne Silvanus ne Timoti sobid gbauŋ kaŋa n tisid yanam Winaꞌam nidib bane be Tesalonika teŋin la n be ti Baꞌ Winaꞌam ne Zugsob Yesu Kiristo ni la.

2 Ti Baꞌ Winaꞌam ne ti Zugsob Yesu Kiristo na tisi ya yelsum ne sumalisim.

3 Ti baꞌabiise, yanam yadda niŋir ne ya yinni yinni noŋilim ne taaba n nobugid bedego la zug, ka li nar ka a suꞌum ye ti puꞌus Winaꞌam bareka saŋa wusa ya zug. 4 Ka linzug ka tinam meŋ nweꞌed nyoꞌog ya yela Winaꞌam nidibi laꞌased zinꞌig siꞌa wusa. Ti nweꞌed nyoꞌog ya modigir ne ya yadda niŋir ne Winaꞌam, mugusug ne namisug line paadi ya la zug.

5 Lina paꞌal ye Winaꞌam kad saria ne yelsida ye o maali ya ka ya nar ne ya nam be o soꞌolimin la, ka li ane yanam be o soꞌolimin la zug ka nidib namisidi ya. 6 Winaꞌam ane sida daan ka na namis bane namisidi ya la, 7 ka ke ka yanam bane namisid la vuꞌus ne tinam, saŋkan ka Zugsob Yesu na ti yi arazana ni leb na, ka kena ne o malek bane mor paŋ titaꞌar la, ne bugum pielim 8 ka namis bane ziꞌ Winaꞌam ne bane pu siak ti Zugsob Yesu labasuŋ la. 9 Ba na diꞌe namisug line a saꞌuŋ ka kaꞌ naare ka na yi Zugsob la saꞌan ne o naꞌam paŋ titaꞌar la ni daar kan ka o na kena la. 10 Saŋkan la ka ti na nye o, ka o na be o meŋ nidib ne bane wusa niŋ o yadda la ni. Ka ti na tis o naꞌasi. Bozugo yanam meŋi siak ti labaar la ka ya na ti bee ba saꞌan.

11 Linzug ka ti sosid Winaꞌam tisidi ya saŋa wusa ye o na ke ka ya nar ne yanam be o soꞌolimin la. Ka me sos o ye o paŋ na tisi ya popielim wusa line ka ya mor yaꞌamleog la, ka ke ka ya yadda niŋir tuuma na tum paae li ben, 12 ye ti Zugsob Yesu bee ya ni ka yanam me bee o ni. Ka ya zanꞌasa na nye zunꞌor. Li wusa yine Winaꞌam ne Zugsob Yesu Kiristo ni na.