‘Bodik ema sarani sia iha kota Efesus:

Hakerek neꞌe, nosi Haꞌu, mak Yesus. Haꞌu mak kaer fitun matan hitu iha liman kwana. Haꞌu moos laꞌo kasirin atu karee badut mean hitu nia ida-idak. Hanono haꞌu kdale neꞌe.

2 Karee tiꞌan emikaan moris iha kota Efesus. Emi haterus aan hodi serwisu susi ruin bodik Naꞌi Maromak. Oras ema aat mai iha emikaan klaran, emi dudu sai. Oras ema mai naktolek naꞌak, nia mak Haꞌukaan klosan, emi leno diꞌa-diꞌak niakaan moris, toꞌo hatene hola niakaan tolek teen. Hotu, emi dudu sai, la hanono nia. 3 Masik ema nasusar emi tan fiar Haꞌu, emi haterus aan, la hakiduk kois.

4 Mais, emi monu tiꞌan iha lia ida. Uluk, oras emi foin fiar Haꞌu, emi hadomi malu. Mais oras neꞌe, la nunia tiꞌan. 5 Tan baa nia, emi musti hanoin oras uluk nia hodi hanawa ona hosi sala nia, nebee hadomi malu hikar hanesan uluk. Kalo lale, atu kmai kola kikar badut mean nia nosi emi. 6 Masik nunia, Haꞌukaan neon sei diꞌak netik, tan emi la simu hanorin tolek nosi Nikolai eman sia. Haꞌu moos la simu hanorin nia.* Ema matenek lia Hakerek Moon sia naꞌak, Nikolai niakaan hanorin sia, ita la hatene.

7 Hanono diꞌa-diꞌak lia mak Maromak Kmalar Lulik katak baa ema sarani sia. Ema mak tuir Haꞌu toꞌo mate, Haꞌu kfoo leet baa nia atu naa nosi ai huun iha Naꞌi Maromak toꞌos etu. Tan ema mak naa ai huun nia fuan, netan moris namutuk no Naꞌi Maromak toꞌo nima-nimak.’ ”✡ Lia Uluk Fohon 2:9; Lia Raiklaran Falu Fila 22:2; Yeskiel 28:13, 31:8

‘Bodik ema sarani sia iha kota Smirna:

Hakerek neꞌe nosi Haꞌu, mak Yesus. Lia hotu-hotu huun nosi Haꞌu, hori uluk fohon toꞌo mohu. Uluk, Haꞌu kmate, mais oras neꞌe, Haꞌu kmoris kikar tiꞌan. Hanono Haꞌu kdale neꞌe.✡ Yesaya 44:6, 48:12; Lia Raiklaran Falu Fila 1:17, 22:13

9 Karee tiꞌan emikaan moris susar iha Smirna. Emi neꞌe, mukit iha ema raiklaran oin, mais, soi iha Naꞌi Maromak oin. Noo ema mak dale naꞌak, sia, Naꞌi Maromak eman. Mais, sia moos nadois emikaan naran. Tuir loos, sia lahoos Naꞌi Maromak eman. Sia tuir diabu ulun dei. 10 Dadi, hanono diꞌa-diꞌak. Lalika hataꞌuk hetan susar. Surak hatene, diabu ulun buka atu natama emi balu baa bui toꞌo loron sanulu laran, tan nia nakara nebee emi seꞌi kotuk baa Haꞌu. Masik emi kona hoꞌo, keta haluꞌa Haꞌu. Tan ema mak tuir Haꞌu toꞌo mate, atu kselu kikar nia kodi moris nima-nimak.

‘Bodik ema sarani sia iha kota Pergamus:

Hakerek neꞌe nosi Haꞌu, mak Yesus. Haꞌu mak kaer surik roꞌat matan ruak. Hanono Haꞌu kdale neꞌe.

13 Katene tiꞌan emikaan kota Pergamus nia. Makaer ukun iha nia, diabu ulun. Masik nunia moos, emi kaer metin Haꞌukaan naran, hodi fiar Haꞌu bei-beik. Uluk, Haꞌukaan ema ida iha nia, naran Antipas. Nia nanorin nalo loos nosi Haꞌukaan dalan moris, mais ema noꞌo nia. Masik nunia moos, emi la heli Haꞌu.

14 Mais, emi monu baa lia ida-rua, tan emi naꞌin hira tuir Balam hanorin kaleꞌuk. Uluk, Balam nanorin Balak atu sokur ema Israꞌel sia, nebee nakur Naꞌi Maromak beer, toꞌo sia naa hahaak mak sera baa aiꞌoi lulik no nakur biti-kluni.✡ Sura Renu Israꞌel 22:5, 7, 25:1-3, 31:16; Hanoin Hikar Dalan Moris 23:4 15 Emi naꞌin hira moos tuir Nikolai hanorin. 16 Dadi, emi musti hanawa hosi emikaan salan nia sia. Kalo lale, la kleur Haꞌu kmai karoe emi kodi Haꞌukaan lia fuan mak roꞌat hanesan surik.

17 Hanono diꞌa-diꞌak lia mak Maromak Kmalar Lulik katak baa ema sarani sia. Ema mak tuir Haꞌu toꞌo mate, Haꞌu kfoo leet baa nia atu naa tubi manna mak rai kedan tiꞌan nosi laleꞌan. Haꞌu moos atu foo fatuk mutin ida mak noo hakerek niakaan naran foun. Nia mesan mak natene naran nia. Ema seluk la natene.’ ”✡ Ema Israꞌel Sai Nosi Mesir 16:14-15,33-34; Yohanis 6:48-50; Yesaya 62:2, 65:15

‘Bodik ema sarani sia iha kota Tiatira:

Hakerek neꞌe nosi Haꞌu, Yesus, mak Naꞌi Maromak Oan! Haꞌukaan matan laka nuꞌu haꞌi. Haꞌukaan ain mean laak nuꞌu besi riti hamotu. Hanono Haꞌu kdale neꞌe.

19 Karee emikaan moris tiꞌan. Emi hadomi Haꞌu no fiar biit baa Haꞌu. Emi moos tuir Haꞌukaan ukun nohuun. Masik ema nasusar emi moos, emi haterus aan bei-beik. Haꞌu moos katene, oras neꞌe emi serwisu makaꞌas liu tenik bodik Haꞌu.

20 Mais, emi monu baa lia ida, tan emi simu feto naran Isabel nia. Nia naksaꞌek aan naꞌak, nia, Maromak makoꞌan. Hotu emi habusik nia bosok nola Haꞌukaan ema sia nodi hanorin kaleꞌuk, toꞌo sia nalo lia kfoꞌer no tuir naa haan mak sera baa aiꞌoi lulik. 21 Haꞌu kdeꞌan feto nia hei-hein tiꞌan, nebee laꞌo nela sala nia, mais nia la noꞌuk.

22 Mana diꞌa-diꞌak. Oras neꞌe Haꞌu kakotu tiꞌan atu kastikar nia kodi moras ida, toꞌo nia la bele laꞌo nela toba fatin. Nunia moos, baa ema mahalo lia kfoꞌer no nia. Kalo sia la laꞌo nela feto aat nia, la kleur ona Haꞌu moos kastikar sia. 23 Haꞌu moos atu koꞌo feto aat nia oan sia. Kodi nunia, emi makfiar hotu-hotu hatene haꞌak, Haꞌu katene ema raiklaran neon ain. Haꞌu moos atu selu baa emi tuir emikaan hahalok.✡ Kananuk Sia 7:10, 62:12; Yeremia 17:10

24 Mais, emi seluk sia iha Tiatira la tuir feto nia hanorin aat. Emi dudu fila hanorin funin nosi ema mak kaer ai tahan aat. Tan baa nia, Haꞌu lalika deꞌan tenik emi, 25 surak kaer metin emikaan fiar toꞌo kmai kikar. 26-27 Haꞌu atu kfoo beran bodik ema mak tuir Haꞌu toꞌo mate. Beran nia, beran boot, manesak no beran mak Haꞌu ketan kosi Haꞌukaan Ama kodi ukun ema klubun hotu-hotu iha raiklaran. Kalo ema sakar Haꞌu, Haꞌu kodi beran nia, Haꞌu ksakar kikar sia, hanesan kodi knoꞌan besi, taꞌe karoe sasanan rai.✡ Kananuk Sia 2:8-9 28 Haꞌu moos atu foo fitun naꞌin baa emi.

29 Hanono diꞌa-diꞌak lia mak Maromak Kmalar Lulik katak baa ema sarani sia.’ ”