27
Ema nodi Yesus baa Gubernur Pilatus
(Markus 15:1; Lukas 23:1-2; Yohanis 18:28-32)
1 Seisawan oan, ema hotu-hotu mak iha moon-metan Yahudi nia, kabuar lia atu noꞌo Yesus. 2 Hotu sia kesi Nia nodi baa gubernur Pilatus, tan sia nakara nebee gubernur taa ukun mate baa Nia.* Baa oras nia, ema boot Yahudi sia la noo beran atu taa ukun mate baa ema. Tan lia nia, sia nodi Yesus baa Gubernur Pilatus, tan nia kaer ukunrai Roma iha nia.
Yudas mate nisa aan
(Kristus Klosan Lian 1:18-19)
3 Baa oras Yudas natene naꞌak naꞌilulik ulun sia no fukun adat sia nakotu atu noꞌo Yesus, nia neon monu baa niakaan salan, tan nia mak faꞌan lakon Yesus baa sia. Hotu Yudas baa nasoru sia atu foo nikar siakaan osan murak tomak tolu nulu nia. 4 Nia katak naꞌak, “Haꞌu kalo sala tiꞌan, tan haꞌu klatan baa emi ema mak la noo sala sa-saa.”
Mais sia nataa naꞌak, “Hoi! Ami la hatene o ona! O musti matiu duꞌuk sala nia.” 5 Hotu Yudas soe lerek osan nia iha Uma Hamulak Huun laran. Hotu nia sai, baa nisa aan toꞌo mate.
6 Rona nola lia nia, naꞌilulik sia libur nola osan nia hotu dale naꞌak, “Ita la bele hatama hikar osan neꞌe baa osan sera fatin, tan osan neꞌe kadoor tiꞌan. 7 Ita rona badaen sasanan ida atu faꞌan niakaan rai. Diꞌak liu ita hodi osan neꞌe baa sosa hola rai nia. Hodi nunia, ita bele halo rai nia dadi rate fatin bodik ema matak sia, kalo sia mate iha Yerusalem neꞌe.” 8 Hotu sia nodi osan nia, baa sosa nola rai nia. Toꞌo baa oras neꞌe, ema sei temi rai nia naꞌak, ‘Rai Raa’.✡ Kristus Klosan Lian 1:18-19
9 Lia neꞌe natoꞌo saa mak Maromak makoꞌan Yeremia nakerek kedan hori uluk naꞌak,
“Hori uluk aan ema Israꞌel sia nodi osan murak tomak tolu nulu atu sosa nola ata ida.
Tan lia nia, sia nola osan murak tomak tolu nulu
atu sosa nola rai rohan ida.
10 Rai nia, sia sosa nola nosi badaen sasanan,
tuir saa mak Naꞌi Maromak naruka tiꞌan baa haꞌu.”✡ Sakarias 11:12-13; Yeremia 18:2-4, 19:1-11, 32:6-15
Yesus iha Gubernur Pilatus oin
(Markus 15:2-5; Lukas 23:3-5; Yohanis 18:33-38)
11 Ema nodi Yesus toꞌo gubernur baa tiꞌan, gubernur nusu Yesus naꞌak, ‘ ‘Ema neꞌe sia naꞌak O neꞌe, Naꞌin Yahudi. Tebes ka lale?”
Yesus nataa naꞌak, “Tebes. Ama dale nia loos.”
12 Hotu naꞌilulik ulun sia no fukun adat sia tula lia waꞌin baa Yesus, mais la nataa kedan.
13 Hotu gubernur nusu nikar naꞌak, “O la rona sia dale nia ka? Sia tula sala waꞌin baa O tiꞌan. Tan saa O la mataa?!”
14 Mais Nia la nataa kedan, toꞌo gubernur moos benar.
Gubernur Pilatus taa ukun mate baa Yesus
(Markus 15:6-15; Lukas 23:13-25; Yohanis 18:39—19:16)
15 Sura tinan, natoon baa ema Yahudi nadahur Paska, gubernur nabusik ema bui ida tuir ema lear boi. 16 Baa oras nia, noo ema bui ida naran Barabas.† Hakerek Moon lia Yunani balu naꞌak, ‘Yesus Barabas’, balu tenik naꞌak ‘Barabas’ dei. Ema hotu-hotu natene nia, tan nia ema aat basuk. 17 Baa loron nia, ema lear moos baa gubernur Pilatus atu nusu nebee nia nabusik sai ema bui ida, tuir siakaan adat. Rona nunia, Pilatus nusu baa sia naꞌak, “Diꞌak! Mais haꞌu atu kabusik see? Iha neꞌe, Barabas no Yesus mak ema temi naꞌak Kristus. Haꞌu kabusik mak nabee? Emi naꞌin boi duꞌuk.” 18 (Gubernur dale nunia, tan nia natene tiꞌan naꞌilulik ulun sia nodi Yesus baa nia, tan sia rai hirus baa Yesus.)
19 Oras gubernur sei tuur leno lia nia, niakaan feen solok lia baa nia naꞌak, “Ama sintidu! Keta taa ukun baa Yesus nia, tan Nia ema moon. Hori fonin aan haꞌu kmeꞌi la diꞌak. Toꞌo oras neꞌe moos, haꞌu ksei koran la diꞌak.” 20 Mais naꞌilulik ulun sia no fukun adat sia sasuku bei-beik ema lear nia, nebee sia nusu gubernur nabusik Barabas no taa ukun mate baa Yesus. 21 Tan baa nia, gubernur nusu tenik baa sia naꞌak, “Nosi ema naꞌin rua neꞌe, haꞌu kabusik ida nabee?”
Sia moos nataa bele-bele naꞌak, “Barabas! Mabusik Barabas dei!”
22 Hotu gubernur nusu tenik naꞌak, “Kalo nunia, haꞌu kalo nunabee baa Yesus neꞌe, mak ema temi Kristus?”
Sia hotu-hotu moos nahii bele-bele naꞌak, “Hoꞌo Nia dei! Hedi Nia baa ai karuus!”
23 Hotu gubernur nusu tenik naꞌak, “Mais Nia sala saa? Haꞌu kleno Nia tiꞌan, mais la ketan sala kois!”
Masik nunia moos, sia hotu-hotu nahii makaꞌas liu tenik naꞌak, “Hoꞌo Nia! Hedi Nia baa ai karuus ona!”
24 La kleur falik, gubernur natene naꞌak nia la bele nalo saa tenik, tan ema lear nia atu krakat toꞌo nakfetik. Tan lia nia, nia nola wee nodi fasi liman iha siakaan oin. Nia moos katak baa sia naꞌak, “Haꞌu la katiu ema neꞌe niakaan mate! Emi hotu-hotu mak hatiu!”✡ Hanoin Hikar Dalan Moris 21:6-9
25 Ema lear nia moos nahii nodi nataa naꞌak, “Soꞌin baa! Habusik ami ho amikaan bein oan sia mak hatiu hola Niakaan raan!”
26 Rona nola nunia, gubernur dale naꞌak, “Loos emi dei.” Hotu nia nabusik Barabas tuir siakaan hakaran. Mais nia naruka ema noꞌat Yesus nodi oe besi tarak.‡ Sondadu Roma sia nodi oe mak nalo nosi tali kulit lolon hira sia. Hotu, sia kesi ruin meik, lale, makdadi meik, baa tali kulit nia rohan sia. Kalo hoꞌat rua-ruan hodi oe nia, isin kulit nakluꞌas mohu. Ema Yahudi tau hoꞌat kladik toꞌo isin haat nulu dei. Mais, sondadu Roma sia la sura. Sia noꞌat bei-beik. Noꞌat notu, nia latan Yesus baa sondadu sia, nebee sia nodi baa atu nedi noꞌo baa ai karuus.
Sondadu sia naleuk nakdiuk Yesus
(Markus 15:16-20; Yohanis 19:2-3)
27 Nunia hotu, sondadu sia dada nodi Yesus baa siakaan fatin iha gubernur tofatik. Hotu sia bolu nola mai siakaan mamaluk sia hotu.§ Sondadu siakaan fatin nia, sia temi nodi lia Latin naꞌak, praetorium. Fatin nia, sondadu siakaan fatin duꞌuk iha ukunrai tofatik. Hakerek Moon lia Yunani naꞌak, sia bolu siakaan mamaluk speira ida. Speira ida nia, manesak no sondadu naꞌin atus neen. 28 Sia kolu Yesus Niakaan tais no natais nikar Nia nodi faru klobor ida. Faru nia ilas mean asuaten,* Tuir loos; Mateus nakerek naꞌak faru nia ilas ‘mean lakan’. Markus mak nakerek naꞌak ilas ‘mean asuaten’. hanesan naꞌin sia natais. 29 Hotu sia nola ai tarak lain, noman nalo baa sabeo tarak. Hotu sia tau sabeo nia baa Yesus ulun nodi naleuk nakdiuk Nia, hanesan sia foti naꞌi foun nodi sabeo naꞌin. Sia moos nakaer ai knoꞌan ida baa Yesus liman kwana, hanesan knoꞌan ukun. Sia nakniꞌa seꞌi oin baa Nia, nodi naleuk naꞌak, “Tabe, Naꞌin Yahudi.” 30 Sia moos soe kaban baa Nia. Sia nola knoꞌan nia nosi Yesus liman, nodi taꞌe nakdiuk Niakaan ulun. 31 Naleuk nakdiuk Nia notu, sia kolu faru klobor nia, hotu natais nikar Niakaan tais baa. Hotu sia nodi Nia sai baa kota Yerusalem luan atu nedi noꞌo Nia baa ai karuus.
Sia nedi Yesus baa ai karuus
(Markus 15:21-32; Lukas 23:26-43; Yohanis 19:17-27)
32 Oras sia dada nodi Yesus baa, sia nasoru nola ema naꞌin ida iha dalan klaran. Ema nia naran Simon. Nia nosi kota Kirene. Hotu sondadu sia seten nia natiu Yesus Niakaan ai karuus. 33 Hotu sia laꞌo toꞌo fatin ida naran Golgota. (Naran neꞌe naꞌak, “fatin ulun ruin”.) 34 Iha nia, sia atu naroo Yesus nodi anggor ween kahur ai moruk, nebee Nia bele terus moras. Yesus norut oan ida, hotu dudu fila.✡ Kananuk Sia 69:22
35 Hotu sia nedi Nia baa ai karuus, hotu taman ai karuus nia. Hotu sondadu sia suut liman atu nodi natene see mak netan Yesus farun.✡ Kananuk Sia 22:19 36 Hotu sia tuur daka iha nia. 37 Sia moos nakerek baa ai kabelak ida naꞌak,
“NEꞌE YESUS, NAꞌI YAHUDI”
Hotu sia nedi kedan ai kabelak nia baa ai karuus iha Yesus ulun leten, nebee ema bele natene lia krarain taa ukun mate baa Nia.
38 Iha nia moos, sia nedi noꞌo ema madauk teen naꞌin rua. Ida iha Yesus sorin kwana, ida tenik iha sorin karuk.
39 Ema hotu-hotu mak laꞌo tuir nia, titu-naree Yesus. Sia nakmulis ibun nodi naleuk Nia.† Hakerek Moon lia Yunani naꞌak sia ‘kiku ulun’. Ema Yahudi sia kiku ulun nodi naleuk ema, nuꞌu ita hakmulis ibun hodi haleuk ema. ✡ Kananuk Sia 22:8, 109:25 40 Sia nahii baa Nia naꞌak, “Hoi! O maꞌak O bele maroꞌon Uma Hamulak Huun, toꞌo baa wainrua mariik mikar tiꞌan. Tebes ka? Kalo O tebe-tebes Naꞌi Maromak Oan, sori aan tuun mosi ai nia ona.”✡ Mateus 26:61; Yohanis 2:19
41 Nunia moos, naꞌilulik ulun sia, manorik ukun sia, no fukun adat sia naleuk Nia naꞌak, 42 “Nia bele sori ema seluk, mais la bele sori aan duꞌuk. Uluk Nia katak naꞌak, Nia ema Israꞌel siakaan naꞌin! Kalo nunia, diꞌak liu Nia tuun nosi ai nia lai, foin ita fiar Nia. 43 Kalo Nia tebe-tebes Naꞌi Maromak Oan, habusik nebee
‘Nia naloon baa Naꞌi Maromak.
Kalo Naꞌi Maromak beer Nia,
habusik Naꞌi Maromak mak sori Nia.’ ”✡ Kananuk Sia 22:9
44 Ema madauk naꞌin rua nia moos tuir naleuk Nia nunia.
Yesus mate
(Markus 15:33-41; Lukas 23:44-49; Yohanis 19:28-30)
45 Nunia hotu, nakukun luri taka nola rai nia nosi loro natetu toꞌo tuku tolu loro malirin. 46 Kreꞌis tuku tolu loro malirin, Yesus nahii nodi siakaan lia Aram naꞌak, “Eli! Eli! Lema sabaktani?” (Lia isin naꞌak, “Haꞌukaan Maromak! Haꞌukaan Maromak! Tan saa Ama taliꞌur laꞌo mela Haꞌu nuneꞌe?”)✡ Kananuk Sia 22:2
47 Ema naꞌin hira mak kreꞌis ai karuus nia rona nola Yesus lian maliak nia. Sia moos dale naꞌak, “Hoi! Rona lai. Nia bolu Elia, mak Maromak makoꞌan uluk nia!” 48 Hotu ema ida nalai kedan baa nola wee teen, loban tama baa tua siin. Nia tuu wee teen nia nodi ai knoꞌan rohan, hotu lolo soruk baa Yesus ibun, nebee Nia norut.✡ Kananuk Sia 69:22
49 Mais ema seluk tenik dale naꞌak, “Hein lai! Ita haree kokon! Elia atu mai sori Nia ka lale?”
50 Hotu Yesus nahii tenik nodi lian makaꞌas. Hotu nawan kotu.
51 Iha Uma Hamulak Huun noo tais odamatan boot ida mak neli Naꞌi Maromak Keꞌan Lulik Kaliuk. Natoon baa Yesus nawan kotu, tais odamatan nia naksira faꞌe baa rua, nosi leten toꞌo raik. Baa oras nia moos, rai kakekuk toꞌo fatuk boot nakfera.✡ Ema Israꞌel Sai Nosi Mesir 26:31-33 52 Rate sia moos nakloke. Naꞌi Maromak eman sia mak mate tiꞌan, Nia nalo balu moris nikar. 53 Baa oras Yesus moris nikar tiꞌan, sia sai mai nosi siakaan rate tama baa Yerusalem. Ema lear moos naree nodi matan duꞌuk.
54 Iha Golgota, sondadu ulun no niakaan ain-liman sia daka Yesus Niakaan ai karuus. Baa oras sia naree rai kakekuk no lia hotu-hotu mak dadi nia, sia nataꞌuk basuk. Sia dale naꞌak, “Adeei! Ema neꞌe, Naꞌi Maromak Oan tebes!”
55 Feto naꞌin hira moos titu Yesus mate nosi dook. Sia tuir Nia tiꞌan nosi Galilea, tan uluk sia mak naliku Yesus no Niakaan ema sia. 56 Iha feto nia sia, noo Maria nosi leo Magdala, Maria ida tenik (mak Yakobus no Yusuf inan), no Sebadeus feen (mak Yakobus no Yohanis inan).✡ Lukas 8:2-3
Sia nakoi Yesus
(Markus 15:42-47; Lukas 23:50-56; Yohanis 19:38-42)
57 Yesus mate nia, kona baa loron lima. Awan, kona baa ema Yahudi siakaan loron hamulak, mak loron hanawa serwisu. Iha nia noo ema ida naran Yusuf. Nia ema maksoin nosi leo Arimatea. Nia moos tuir Yesus hanorin kleur tiꞌan. Baa oras loro atu monu baa loron lima nia, Yusuf buka dalan atu natuun kedan Yesus maten nosi ai karuus, tan loron hanawa serwisu atu toꞌo ona. 58 Tan baa nia, loro sei la monu dauk, Yusuf baa Gubernur Pilatus atu nusu Yesus maten. Gubernur moos nakara, hotu latan maten nia baa Yusuf. 59 Hotu Yusuf baa Golgota, natuun nola Yesus maten nosi ai karuus. Nia falun diꞌa-diꞌak nodi tais foun mak folin todan. 60 Baa oras nia, ema foin baꞌat notu fatuk kuak atu nadiꞌa kedan rate bodik Yusuf no familin sia. Hotu Yusuf no niakaan ema sia natama Yesus maten baa kuak nia. Hotu sia dudu nola fatuk belar boot ida nodi taka kuak nia. Hotu Yusuf sia fila nikar.
61 Baa oras nia, Maria nosi Magdala no Maria ida seluk nia moos tuir toꞌo nebaa. Sia tuur nodi mana baa kuak nia.
Gubernur naruka makdaka rai baa daka Yesus raten
62 Awan, kona baa ema Yahudi siakaan loron hamulak, naꞌilulik ulun sia no ema Farisi sia baa nasoru gubernur. 63 Toꞌo baa, sia katak naꞌak, “Ama Gubernur, ami hanoin hori hirak nia, baa oras ema tolek teen nia sei moris, nia katak naꞌak nuneꞌe, ‘Haꞌu nanis mate, mais baa wainrua, Haꞌu kmoris kikar.’✡ Mateus 16:21, 17:23, 20:19; Markus 8:31, 9:31, 10:33-34; Lukas 9:22, 18:31-33 64 Tan baa nia, Ama tulun maruka daka diꞌa-diꞌak rate nia, toꞌo wainrua. Hodi nunia, Niakaan maktuir sia la bele nanaꞌo nola Niakaan maten, hotu tolek ema naꞌak Nia moris nikar tiꞌan. Tan kalo sia tolek nunia, hahalok nia aat liu tan siakaan hahalok uluk nia baa oras sia dale naꞌak, Nia mak Kristus.”
65 Rona nola nunia, gubernur nataa naꞌak, “Diꞌak! Hodi makdaka rai baa daka diꞌa-diꞌak fatin nia.”
66 Hotu sia baa fatin nia nodi makdaka rai. Toꞌo nebaa, sia nanit mate rate nia odamatan.‡ Ema matenek Hakerek Moon naꞌak, sia marak rate nia nodi tau kabas baa fatuk no kuak kadidin, nodi nanit satan leur nola fatuk nia. Hotu naruka makdaka rai sia daka bei-beik, nebee ema keta mai nanaꞌo nola maten nia.
*27:2 Baa oras nia, ema boot Yahudi sia la noo beran atu taa ukun mate baa ema. Tan lia nia, sia nodi Yesus baa Gubernur Pilatus, tan nia kaer ukunrai Roma iha nia.
✡27:8 Kristus Klosan Lian 1:18-19
✡27:10 Sakarias 11:12-13; Yeremia 18:2-4, 19:1-11, 32:6-15
†27:16 Hakerek Moon lia Yunani balu naꞌak, ‘Yesus Barabas’, balu tenik naꞌak ‘Barabas’ dei.
✡27:24 Hanoin Hikar Dalan Moris 21:6-9
‡27:26 Sondadu Roma sia nodi oe mak nalo nosi tali kulit lolon hira sia. Hotu, sia kesi ruin meik, lale, makdadi meik, baa tali kulit nia rohan sia. Kalo hoꞌat rua-ruan hodi oe nia, isin kulit nakluꞌas mohu. Ema Yahudi tau hoꞌat kladik toꞌo isin haat nulu dei. Mais, sondadu Roma sia la sura. Sia noꞌat bei-beik.
§27:27 Sondadu siakaan fatin nia, sia temi nodi lia Latin naꞌak, praetorium. Fatin nia, sondadu siakaan fatin duꞌuk iha ukunrai tofatik. Hakerek Moon lia Yunani naꞌak, sia bolu siakaan mamaluk speira ida. Speira ida nia, manesak no sondadu naꞌin atus neen.
*27:28 Tuir loos; Mateus nakerek naꞌak faru nia ilas ‘mean lakan’. Markus mak nakerek naꞌak ilas ‘mean asuaten’.
✡27:34 Kananuk Sia 69:22
✡27:35 Kananuk Sia 22:19
†27:39 Hakerek Moon lia Yunani naꞌak sia ‘kiku ulun’. Ema Yahudi sia kiku ulun nodi naleuk ema, nuꞌu ita hakmulis ibun hodi haleuk ema.
✡27:39 Kananuk Sia 22:8, 109:25
✡27:40 Mateus 26:61; Yohanis 2:19
✡27:43 Kananuk Sia 22:9
✡27:46 Kananuk Sia 22:2
✡27:48 Kananuk Sia 69:22
✡27:51 Ema Israꞌel Sai Nosi Mesir 26:31-33
✡27:63 Mateus 16:21, 17:23, 20:19; Markus 8:31, 9:31, 10:33-34; Lukas 9:22, 18:31-33
‡27:66 Ema matenek Hakerek Moon naꞌak, sia marak rate nia nodi tau kabas baa fatuk no kuak kadidin, nodi nanit satan leur nola fatuk nia.