4
Diabu ulun koko Yesus
(Lukas 4:1-13; Markus 1:12-13)
1 Nunia hotu, Maromak Kmalar Lulik dada nodi Yesus baa fatin fuik ida, nebee diabu ulun koko Nia.✡ Ibrani 2:18, 4:15 2 Iha nia, Yesus nalirin aan loron haat nulu, kalan haat nulu. Nia noran salaen tebe-tebes, 3 hotu diabu ulun mai koko Nia naꞌak, “O neꞌe tebe-tebes Naꞌi Maromak Oan ka? Kalo tebes, maruka fatuk neꞌe sia dadi haan, nebee O maa.”
4 Mais Yesus nataa naꞌak, “Hakerek tiꞌan iha Hakerek Moon naꞌak:
‘Ema raiklaran la moris nosi haan dei.
Mais sia moos musti nanono Maromak Manfatin,
nodi nalo tuir Niakaan beer.’ ”✡ Hanoin Hikar Dalan Moris 8:3
5 Hotu diabu nia dada nodi Yesus baa kota Yerusalem, mak Naꞌi Maromak Niakaan kota lulik. Nia dada nasaꞌe Yesus baa Naꞌi Maromak Niakaan Uma Hamulak Huun fafuhun. 6 Hotu nia dale naꞌak, “Kalo O neꞌe tebe-tebes Naꞌi Maromak Oan, maksoit tuun kokon baa rai. Nanis O la metan susar, tan hakerek tiꞌan iha Hakerek Moon naꞌak,
‘Naꞌi Maromak naruka Niakaan makbukar laleꞌan sia,
mai daka O.’
Hakerek Moon moos naꞌak,
‘Sia atu tane nola O nodi siakaan liman,
toꞌo masik O ain atu sidi kona fatuk moos, lale kedas.’ ”✡ Kananuk Sia 91:11-12
7 Mais Yesus nataa naꞌak, “Hakerek Moon naꞌak,
‘Naꞌi Maromak nia, okaan Naꞌin.
Keta maruka Nia nodi Niakaan beran atu natudu kakaer naꞌak,
Nia mak tebe-tebes Maromak.’ ”✡ Hanoin Hikar Dalan Moris 6:16
8 Hotu diabu nia nodi tenik Yesus saꞌe baa foho dikin ida. Nia natudu naꞌi raiklaran hotu-hotu siakaan fohorai, no siakaan kabaas hotu-hotu. 9 Natudu mohu tiꞌan, diabu katak baa Yesus naꞌak, “Haꞌu klatan fohorai nia sia hotu-hotu baa O, surak O makniꞌa loꞌu-sudur baa haꞌu.”
10 Mais Yesus nakbehek naꞌak, “Hoi, Diabu! Sees mosi neꞌe! Hakerek Moon naꞌak,
‘O musti loꞌu-sudur baa Naꞌi Maromak,
no serwisu bodik Nia mesan dei.’ ”✡ Hanoin Hikar Dalan Moris 6:13
11 Rona nola nunia, diabu moos laꞌo nela Yesus. Hotu makbukar laleꞌan sia mai naliku Yesus.
Yesus nahuu nanorin iha Galilea
(Markus 1:14-15; Lukas 4:14-15)
12 Baa oras nia, Naꞌi Herodes natama Yohanis Mak Sarani Ema baa bui. Rona nola lia nia, Yesus fila baa Galilea.✡ Mateus 14:3; Markus 6:17; Lukas 3:19-20 13 Nia baa Niakaan leo Nasaret, hotu laꞌo liu baa nein iha leo Kapernaum. Leo nia iha debu boot Galilea tehen, iha ema Sebulon no ema Naftali rain.✡ Yohanis 2:12 14 Hodi nunia, Yesus natoꞌo saa mak Maromak makoꞌan Yesaya nakerek kedan hori uluk naꞌak,
15 “Rai Sebulon no Rai Naftali,
mak kreꞌis debu boot Galilea, iha mota Yordan loromonu.
Ema maktabar waꞌin nein iha nia.
16 Sia moris iha makukun laran,
mais oras neꞌe, sia naree Kroman tiꞌan.
Oras neꞌe, Kroman naksinak tiꞌan
bodik ema hotu-hotu mak sei la natene dauk Naꞌi Maromak.”✡ Yesaya 9:1-2
17 Nahuu baa oras nia, Yesus nanorin ema naꞌak, “Emi musti laꞌo hela emikaan salan, nebee moris loos ona! Tan oras neꞌe, ema hotu-hotu bele tama tiꞌan dadi baa Naꞌi Maromak eman.”✡ Mateus 3:2
Yesus bolu nola ema maktuun tasi naꞌin haat atu tuir Nia
(Markus 1:16-20; Lukas 5:1-11)
18 Baa loron ida, Yesus laꞌo iha debu boot Galilea tehen. Nia nasoru ema naꞌin rua, maun-alin. Maun naran Simon, mais loron-loron ema temi nia naꞌak Petrus. Niakaan alin, naran Andreas. Sia noꞌi tiha naꞌan tasi iha debu laran, tan sia naꞌin rua nia, ema maktuun tasi. 19 Nasoru tiꞌan, Yesus bolu sia naꞌak, “Hei, mai tuir Haꞌu ona! Loro-loron emi buka naꞌan tasi, mais oras neꞌe Haꞌu atu kanorin emi atu buka ema, nebee sia moris tuir Naꞌi Maromak.” 20 Rona nola nunia, sia rua laꞌo nela siakaan daitiha, hotu tuir kedas Yesus.
21 Laꞌo soruk tenik baa, Yesus naree ema naꞌin rua tenik. Sia, Sebadeus oan. Maun, naran Yakobus. Alin, naran Yohanis. Sia naꞌin rua noꞌi nadiꞌa daitiha bele-bele no siakaan ama iha bero laran. Yesus moos bolu sia naꞌin rua atu tuir Nia. 22 Rona nola nunia, sia moos laꞌo nela siakaan ama no siakaan bero, hotu tuir kedas Yesus.
Yesus nanorin ema nodi nadiꞌak nola ema moras
(Lukas 6:17-19)
23 Hotu Yesus laꞌo nasirin rai Galilea atu nanorin iha uma hamulak Yahudi. Nia nanorin Naꞌi Maromak Manfatin Diꞌak nodi nalore oin nunabee ema bele tuir Naꞌi Maromak ukun. Nia moos nadiꞌak nola ema nosi siakaan moras oi-oik.✡ Mateus 9:35; Markus 1:39 24 La kleur, lia nosi Niakaan hahalok nia keke lema rai Siria. Hotu ema nodi siakaan ema moras oi-oik mai baa Nia. Sia moos nodi ema mak diabu tekar, ema mak horak bibi maten, no ema mak ain asak. Nia nadiꞌak nola hotu-hotu.
25 Baa oras nia, ema lear mai tuir Yesus. Sia mai nosi rai Galilea, nosi rai Kota Sanulu mak ema temi naꞌak Dekapolis. Seluk sia mai nosi kota Yerusalem, nosi rai Yudea, no nosi mota Yordan sorin balu baa.
✡4:4 Hanoin Hikar Dalan Moris 8:3
✡4:6 Kananuk Sia 91:11-12
✡4:7 Hanoin Hikar Dalan Moris 6:16
✡4:10 Hanoin Hikar Dalan Moris 6:13
✡4:12 Mateus 14:3; Markus 6:17; Lukas 3:19-20
✡4:16 Yesaya 9:1-2
✡4:23 Mateus 9:35; Markus 1:39