6
Lia ata no naꞌin
1 Ata mak fiar baa Naꞌi Yesus musti nakneter naꞌin. Hodi nunia, ema seluk la netan lia krarain atu dale nahaat Naꞌi Maromak naran no itakaan hanorin. 2a Naꞌin mak fiar baa Naꞌi Yesus, niakaan ata sia musti nakneter nia bei-beik, masik sia hotu-hotu manesak iha Naꞌi Maromak oin. Ata sia musti naliku naꞌin nia diꞌak liu tenik, tan sia hotu-hotu fiar bele-bele baa Kristus. Sia hotu-hotu moos musti moris nadomi malu.
Ema mak nanorin kaleꞌuk no ema mak rotus osan
2b Timo! Manorin lia neꞌe sia hotu-hotu modi makbiit ema sarani sia, nebee sia nalo tuir. 3 Itakaan hanorin loos neꞌe, dadi tatuur baa moris dalan mak tuir Naꞌi Maromak hakaran hotu-hotu. Ema mak nanorin seluk, dudu sees Naꞌi Yesus Kristus hanorin loos. 4 Sia loko aan, mais mamuk! Sia toe mamuk. Siakaan hahalok nunia nalo ema hirus malu, ema nakaat malu, ema dale nahaat ema seluk naran, no ema naneo aat baa ema seluk. 5 Sia tokar lauk bei-beik. Siakaan kakutak dois. Sia la titu lia loos. Sia naneo sala naꞌak, kalo sia madinas tuir Naꞌi Maromak hakaran, sia bele soi.
6 Tebes! Kalo ita moris tuir Naꞌi Maromak hakaran hodi horan toꞌo no saa mak iha, ita hetan sotir boot hanesan ema maksoin.
7 Oras ita moris, ita mai mamuk. Oras ita mate, ita moos fila mamuk. 8 Surak, noo haan no tais, toꞌo tiꞌan!
9 Ema mak nakara soi, maus kona sokur, toꞌo monu baa kuak oi-oik, tan naneo soi dei. Hanoin oin nunia nahoris dinu no nadodok moris. 10 Aꞌaat oi-oik moris tan ema rotus osan. Ema balu nabuꞌa osan nunia, toꞌo sia sees nela siakaan fiar mak loos no nadodok siakaan moris duꞌuk.
Kaer metin hanorin mak o simu tiꞌan
11 Timo! O neꞌe, Naꞌi Maromak niakaan. Tan baa nia, o musti moris nuneꞌe: Moris moon, dook mosi lia aat hotu-hotu. Tuir Naꞌi Maromak hakaran hotu-hotu. Fiar baa Yesus Kristus bei-beik. Madomi ema hotu-hotu. Materus aan mo susar. Moris furak mo ema hotu-hotu. 12 Marui aan tebe-tebes atu malaꞌok hanorin hotu-hotu mak ita fiar. Naꞌi Maromak foo moris nima-nimak baa o tiꞌan. O katak sain tiꞌan okaan fiar nunia iha ema lear oin. Dadi kaer metin moris nima-nimak nia. 13-14 Oras neꞌe, haꞌu kusu o mamate menon maꞌak, o tuir Naꞌi Yesus ukun hotu-hotu. Keta makur ukun ida moos, nebee ema la netan okaan salan. Tuir tebe-tebes, toꞌo loron itakaan Naꞌi Yesus Kristus namaan aan mai nikar. Haꞌu kusu o mamate menon nunia iha Naꞌi Maromak oin. Tan Nia mak foo kmalar bodik makmoris hotu-hotu. Haꞌu kusu o moos mamate menon nia iha Yesus Kristus oin. Tan Nia moos katak lia loos iha Gubernur Pontius Pilatus oin.✡ Yohanis 18:37
15 Naꞌi Yesus boot kaliuk, beran kaliuk!
Naꞌin baa naꞌin hotu-hotu.
Ulun baa ulun hotu-hotu.
Toꞌo niakaan oras,
lia neꞌe sia hotu-hotu naksain.
16 Nia mesan mak la mate.
Nia moris iha kroman mak ema raiklaran la bele terus.
La noo ema raiklaran ida kois mak bele titu nola Nia.
Sera kneter hotu-hotu baa Nia nima-nimak!
Nia kaer beran hotu-hotu iha liman nima-nimak!
Nunia tebes!
Lia ema maksoin
17 Timo, katak baa maksoin raiklaran neꞌe maꞌak, keta loko aan no keta hakrai aan baa sasoin. Tan sasoin hotu-hotu atu lakon mohu. Diꞌak liu, hakrai aan baa Naꞌi Maromak mak moris. Tan Nia mak fakar tuun hotu-hotu bodik ita, nebee ita bele horan moris furak. 18 Katak baa sia nebee sia nodi sasoin nalo lia diꞌak. Nebee, sia madinas natudu hahalok diꞌak. Nebee, sia laran maluak baa ema. Nebee, sia faꞌe matak-malirin mak Naꞌi Maromak foo baa sia. 19 Hodi nunia, sia nariik moris mak folin, tan sia babilan kedan bodik moris baa awan-wainrua.
Paulus narohan hakerek
20-21 Timo! Daka diꞌa-diꞌak Manfatin hotu-hotu mak Naꞌi Maromak rai baa o. Ema balu naneo naꞌak sia mesan mak matenek. Mais siakaan ‘matenek’ nia, la noo tatuur, tan sia fiar hanorin kaleꞌuk. Keta manesa lia fuan mo sia. Keta kahur ho bosok teen sia. Keta dale lia mak la tuir Naꞌi Maromak beer.
Haꞌu kakroꞌan nebee, Naꞌi Maromak natudu laran diꞌak baa o.
Nunia dei.
Dame,
Paulus