19
1 Yeésu wɛɛdɛ́ tɔ́mwá tɩḿ wɩlɩ́ɩ nɛ́, waalɩ́ɩ Galilée laadɔ́ɔ‑daá ɩɖɛ́ɛ Yuudée laadɔ́ɔ‑daá na yɔrɔdáánɩ buwá‑dɛ́ɛ fúu lí ńgɩ. 2 Zamɔ́ɔ kʊ́bɔńgɩ woovu yɩ, ngɛ waawáázɩ wɛ ńna. 3 Ńna gɛ woogódúu ɩjɔ́ sɩ bayɩ́ yɩ kɔdɔká, ngɛ bɔbɔ́ɔ́zɩ yɩ sɩsɩ: «Ɖɛ́dɛ́ɛ Mará waava nɩ́bááwʊ sɩsɩ ɩrʊ́ ɩɖɔ́ɔ ɩɖɛɛlʊ́ báa we gɛ waalá nɛ́ bʊrɔ?» 4 Yeésu woobúsi sɩsɩ: «Mɩ́dákála wentí baaŋmáa Ɩsɔ́ɔ‑dɛ́ɛ tɔ́m tákarɩɖá‑daá nɛ́ gɛ? Baaŋmáa gɛ sɩsɩ: "Bɩgabaazɩya alʊ́ na abaalʊ́ gɛ Ɩsɔ́ɔ waalá wɛ. 5 Ngɛ wɔɔdɔ́ sɩsɩ: bʊrɔɔzɩ́ gɛ abaalʊ́ wánlɩɩ́ ɩgɔɔ na ɩjaa bɛdɛ́ɛ ɩ́na ɩɖɛɛlʊ́ bɔcɔ́ɔ, na bɛlɛ́ɛ́nɩ babɩ́sɩ tɔnʊʊ́ kʊ́ɖʊmʊ́ʊ. 6 Ńna nɛ́, bodokúti bɛgɛ́ɛ nɔwɔ́lɛ, amá tɔnʊʊ́ kʊ́ɖʊmʊ́ʊ." Bɩlɛ́ nɛ́, ɩrʊ́ ɩkátára wenbí Ɩsɔ́ɔ waadá nɛ́.» 7 Ngɛ wɔbɔ́ɔ́zɩ Yeésu sɩsɩ: «A bɩlɛ́, wé rɔɔzɩ́ gɛ waazɩ́ɩ́zɩ sɩsɩ a ɩrʊ́ sɩ ikízi ɩɖɛɛlʊ́, aséé weejéle yɩ wasɩ́ɩ́ka kɩ́nwɩlɩ́ɩ sɩsɩ weegízi yɩ nɛ́?» 8 Ngɛ Yeésu woobúsi wɛ sɩsɩ: «Mɩ́dɛ́ɛ wenbi‑ɖóni‑rɔ gɛ Múúsa waava mɩ́ɩ nɩ́bááwʊ sɩsɩ íkízi mɩ́dɛ́ɛ aláa. Amá bɩgabaazɩya nɛ́ bɩdɛkɛ́ɛ bɩlɛ́ gɛ bɩvʊ́nwɛ. 9 Ménveerím mɩ́ɩ toovonúm sɩsɩ a naárʊ wɔɔɖɔ́ɔ ɩɖɛɛlʊ́ bɩdɛkɛ́ɛ́na sɩsɩ alʊ́ waalɩ́ɩ ɩwɔ́rɔ́ ibó ɩ́na naárʊ bafɩ́nɩ, ngɛ wɔɔgbɔ́ɔ alʊ́ kɩ́falʊ́, waalá wásángarɩ́tɩ.»
10 Ńna gɛ Yeésu‑dɛ́ɛ wanbaaráa wɔɔdɔ́ yɩ sɩsɩ: «A bɩlɛ́ gɛ bɩjɔɔ́ ɩrʊ́ abaalʊ́ na ɩɖɛɛlʊ́ bɔlɔwʊ́táa, a ɩrʊ́ tɔkpɔ́ɔ alʊ́ bɩjɔɔ́ɔ sóńcí.» 11 Ngɛ Yeésu woobúsi wɛ sɩsɩ: «Ɩráa rɩ́ŋa téndísi, asée wenbá Ɩsɔ́ɔ waava wɛ bɩdɛ́ɛ yíko nɛ́. 12 Ɩramáa nɛbɛ́rɛ wɛ bɔdɔkpɔ́ɔ aláa nɛ́, ɖoo balʊrʊ́ʊ wɩ́rɛ gɛ bɛdɛkɛ́ɛ abaaláa; nɛbɛ́rɛ nɛ́ ɩráa waalaná wɛ; nɛbɛ́rɛ nɛ́ ‑rɔ gɛ baabɩsɩná badɩ ɩramáa. Weení wéndisí tɔ́m mááŋmátɩ tɩ ɖɔ́ nɛ́, ítísi.»
13 Bɩlɛ́ bʊwɔ́rɔ́ gɛ ɩráa wɔɔgɔná Yeésu bíya sɩsɩ ɩtɩ́nɩ nʊ́ʊ́zɩ bɔrɔ na ɩsʊ́lʊ bɔrɔ. Amá Yeésu‑dɛ́ɛ wɔɔɖɔ́ɔ wɛ. 14 Ngɛ Yeésu wɔɔdɔ́ ɩwanbaaráa sɩsɩ: «Iyéle bíya ɩkɔ́nɩ mɔ́jɔ́. Ɩ́kɔ́tɔ wɛ nɩ́bááwʊ, káma wenbá baalɩ́ɩ wɛ nɛ́ badɩɩná .» 15 Waadɩ́nɩ nʊ́ʊ́zɩ bɔrɔ bɩtɛ́ nɛ́, ngɛ waalɩ́ɩ ɖɩdáarɛ ɖɩḿ ɖɩdaá.
16 Bɩlɛ́ bʊwɔ́rɔ́ gɛ abaalʊ́ naárʊ woogódúu ɩjɔ́ ɩtɔ́ yɩ sɩsɩ: «Kʊ́bɔ́nɩ, kazɔ́ɔ ńbɩ wenbí gɛ bɩ́nbɔɔzɩ́ sɩsɩ mála na moyuú weezuú kɩdɛ́ndɛḿ nɛ́?» 17 Ngɛ Yeésu woobúsi yɩ sɩsɩ: «Wé‑rɔ gɛ nyɔ́nbɔɔzɩ́ ma kazɔ́ɔ ńbɩ tɔ́m? Kʊ́ɖʊḿ gɛ kazɔ́ɔ ńnɩ́. A nyɔ́zɔ́ɔlɛ́ɛ nÿuú weezuú kɩdɛ́ndɛḿ nɛ́, la wenbí Mará wɔɔbɔ́ɔ́zɩ nɛ́. 18 Ńna gɛ afobú ɩmʊ́ wɔɔbɔ́ɔ́zɩ Yeésu sɩsɩ: «Mará weená?» Ngɛ Yeésu woobúsi sɩsɩ: «Ndángʊ́ʊ ɩrʊ́; nyána naárʊ ɖɛɛlʊ́ yáá naárʊ waalʊ́ mɩ́dánvɩ́nɩ; ndánŋmɩ́ɩ́lɩ; ndánlɩzɩ́ seríya tɩtɛ ńgɩ. 19 Ɖʊ ngɔɔ na njaa gírímá na nzɔ́ɔ́lɩ nyɔ́rɔwʊ́ nyazɩ nyádɩ́tɩŋa.» 20 Ńna gɛ afobú ɩmʊ́ sɩsɩ: «Máálá bɩlɛ́ ɩmʊ́ bɩrɩ́ŋa. Wé gɛ bɩɩga ma sɩ mádásɩ malá.» 21 Ngɛ Yeésu sɩsɩ: «A nyɔ́zɔɔlɛ́ɛ nzɩ́ɩ́zɩ bɩrɩ́ŋa bɩdaá, bo nÿá wenbí rɩ́ŋa nyɔ́wɛ́ná nɛ́ nva kadanbʊrʊ́sɩ na nÿuú ɖɔ́ɔ́lɛ ɩsɔ́ɔ́dáá. A nyáálá bɩlɛ́ bɩtɛ́, na ngɔ́nɩ nvu ma.» 22 Afobú ceení waanɩ́ɩ bɩlɛ́ nɛ́, ngɛ waazʊ́ʊ kaanɩŋá ɩɖɛ́ɛ dɛfɛɛ káma ɩbá ɩgɛ́ɛ ɖɔ́ɔ́lɛ‑dʊ́ʊ.
23 Ngɛ Yeésu wɔɔdɔ́ ɩwanbaaráa sɩsɩ: «Ménveerím mɩ́ɩ toovonúm sɩsɩ bɩ́nlám káálɛ na dɔ́ɔ́lɛ‑dʊ́ʊ iyuú . 24 Máádásɩ ménveerím mɩ́ɩ sɩsɩ bɩvɛ́yɩ raakúḿ káálɛ sɩsɩ kɩsʊʊná ɩjɔ́wʊ bɔyɔ́ɔ bɩtála ɖɔ́ɔ́lɛ‑dʊ́ʊ ɩsʊ́ʊ ‑daá.» 25 Wanbaaráa waanɩ́ɩ bɩlɛ́ nɛ́, ngɛ bɩɩbá bɩlá wɛ bítí: «Bɩlɛ́ nɛ́ weení wónÿuú kʊ lɛ́ɛ́dɩ Ɩsɔ́ɔ‑jɔ́?» 26 Ngɛ Yeésu wɛɛbɛ́ɛ́m wɛ ɩtɔ́ wɛ sɩsɩ: «Wenbí ɩráa tánbɩ́ɩ́zɩ nɛ́, bɩvɛ́yɩ́ Ɩsɔ́ɔ káálɛ.» 27 Ńna gɛ wɔɔdɔ́ Yeésu sɩsɩ: «Ɖɔ́ɔ́ ɖééyéle bɩrɩ́ŋa difú nya nɛ́, nŋɩ́nɩ́ gɛ ɖɛ́ndɛnáa?» 28 Ńna gɛ Yeésu wɔɔdɔ́ wɛ sɩsɩ: «Ménveerím mɩ́ɩ toovonúm sɩsɩ ɖúúlínya kɩ́falʊʊ́ Ɩsɔ́ɔ sɩ ɩlá nɛ́‑daá, wɔ́njɔwʊ́ʊ ɩdɛ́ɛ asicé kowuro‑gbelé‑daá nɛ́, mɩ́nyɔ́ɔ́ wenbá míívú ma nɛ́ ɖʊɖɔ mɩ́njɔwʊ́ kowuro‑gbelá fuú na náálɛ‑daá ɩfʊʊná agó fuú na náálɛ. 29 Ngɛ bɩlɛ́ gɛ weení rɩ́ŋa weeyéle ɖɛ́ɛ́zɩ, koobíya abaaláa, aláa, caáwʊ, kɔɔ́wʊ, bíya yáá fɔɔ́ máyɩ́ɖɛ‑rɔ nɛ́ wóngoyuú bɩdɛ́ɛ nɩɩ́nʊ́wá na ɩtásɩ iyuú weezuú kɩdɛ́ndɛm nɛ́. 30 Amá ɖabata wenbá lɛlɛɛɖɔ́ bɛdɛ́ɛ nɩ́bááwʊ nɛ́ béngbiirí; bɩka ɖabata wenbá beegbííri lɛlɛɛɖɔ́ nɛ́, bɛtɛ nɩ́bááwʊ.»