Tawúratɩ na Injiila dɛ́ɛ fɔɔlɩ́nɩ MAATÉWU 7

1 «Ɩ́káfʊʊná naárʊ, na badánvʊʊná mɩ́ɩ́; 2 káma wenbí mɩ́ɩ́vʊ́ʊ́ná mɩ́ránáa nɛ́ gɛ sɩ bafʊʊná mɩ́ɩ́, bɩka kɩ́máazʊʊ́ wenkí mɩ́ɩ́máázɩ́ná mɩ́ránáa nɛ́ gɛ sɩ bamaazɩná mɩ́ɩ́. 3 Ngbaalá gɛ nyɛ́bɛɛ́na keyiká kɔwɛ nyɔ́rɔ́wʊ́ ɩzɩ́rɛ‑daá nɛ́ bɩka ńdánnáa ɖaagbetumuú kʊwɛ nyɛ́dɛ́ɛ‑ńɖɛ‑daá nɛ́? 4 Nŋɩ́nɩ́ gɛ nyánbɩɩzɩ́ ndɔ́ ngoobú sɩsɩ: «yele malɩzɩ́ keyiká kɔwɛ nyáázɩ́rɛ‑daá nɛ́,» bɩka ɖaagbetumuú gɛ nyɛ́dɛ́ɛ‑ńɖɛ‑daá. 5 Munáávikí, lɩzɩ́ ɖaagbetumuú nyáázɩ́rɛ‑daá naanɩ́ na bʊcɔ nya nna kazɔ́ɔ nlɩzɩ́ keyiká kɔwɛ ngoobú ɩzɩ́rɛ‑daá nɛ́.

6 Ɩ́kɔkpɔ́ɔ wenbí baalɩzɩ́ bɩ basɩ́ɩ Ɩsɔ́ɔ nɛ́ ɩfa fáázɩ; Ɩ́kɔkpɔ́ɔ kejísi ɩlɔ afawá na tɩ́kɔ́kɔ́nɩ tɩnʊ́m sɩ bɩka fáázɩ ɩfaná mɩ́ɩ́ ɩzá sɩnyásɩ mɩ́ɩ́.»

7 «Ɩbɔ́ɔ́zɩ, bánváa mɩ́ɩ́; ɩjáa mínÿuú; ɩgɔ́tɩ bándʊlʊ́ʊ mɩ́ɩ́ tará. 8 Káma weení ɩrɩ́ŋa wɔ́nbɔɔzɩ́ nɛ́ bánváa yɩ, weení wánjáádɩ nɛ́ wónÿuú bɩka bándʊlʊ́ʊ weení wɔ́ngɔtɩ́ nɛ́ tará. 9 Mɩ́dáá naárʊ wɛ a ibú wɔɔbɔ́ɔ́zɩ yɩ kpɔ́nɔ́, wánváa yɩ bʊ́ʊ́rɛ? 10 Yáá a wɔɔbɔ́ɔ́zɩ yɩ tińɖe, wángbáa ɖoḿ icéle yɩ? 11 Na bɩrɩ́ŋa mɩ́dáávé nɛ́, mɩ́nyɩ mɩ́nváa míbíya wenbí bɩjɔɔ́ɔ kazɔ́ɔ nɛ́. Bɩ́nlám nŋɩ́nɩ́ na mɩ́jáa weení ɩwɛ nɛ́ ɩdánváa ibíya kazɔ́ɔ ńbɩ wenbí bɔ́nbɔɔzɩ́ yɩ nɛ́?

12 «Ɩlá mɩ́ránáa wenbí rɩ́ŋa mɩ́zɔɔlɛ́ɛ sɩsɩ bála mɩ́ɩ́ nɛ́, káma bɩlɛ́ gɛ Múúsá‑dɛ́ɛ na baaganáa waawɩ́lɩ.

13 Ɩzʊʊná ɖaḿ wɔnɔɔ́ kadawála nɛ́, káma ɖaḿ wɔnɔɔ́ kaawála nɛ́, na nɩ́bááwʊ kɩɩwála kʊrɔɔzɩ́ fɛ́yɩ́ káálɛ nʊŋɛ́ nɛ́ wɛ́nɖɛɛ́ nimíni‑daá gɛ. Ngɛ kɩlɛ́ gɛ ɩráa ɖabata wánmʊnáa. 14 Amá ɖaḿ wɔnɔɔ́ kadawála nɛ́, na nɩ́bááwʊ kɩdawála kɩrɔɔzɩ́ cɔɔ́ɔ káálɛ nʊŋɛ́ nɛ́, wɛ́nɖɛɛ́ weezuú‑daá gɛ. Ɩráa cʊ́kɔ wɔ́ngbɔɔná kʊ kɩlɛ́.»

15 «Iguná laakáarɩ na bʊbɔtɩnáa. Bɔ́ngɔnɩ́ mɩ́jɔ́ nɛ́, bogozóóna gɛ nyazɩ . Amá badaá, káwʊ‑káwʊwá gɛ bɛgɛ́ɛ. 16 Balakásɩ gɛ mɩ́ndɩlɩ́ɩna wɛ, káma bɔdɔ́ngɔrɩ́ furúu bíya sɔzɔ́ɔ́zɩ‑daá, yáá kɩjɩcɩ́lʊ́ʊ bíya bʊvʊ́m‑daá. 17 Tɩɩwʊ́ kazɔ́ɔ ńgɩ wánɖʊ́ʊ bíya kazɔ́ɔ ńba gɛ, bɩka tɩɩwʊ́ kidaavé nɛ́ ɩɖʊ bíya badaavé nɛ́. 18 Tɩɩwʊ́ kazɔ́ɔ ngɩ tánbɩɩzɩ kɩɖʊ bíya badaavé nɛ́, yáá tɩɩwʊ́ kidaavé nɛ́ ɩɖʊ bíya kazɔ́ɔ ńba. 19 Tɩɩwʊ́ wenkí rɩ́ŋa kɩdánɖʊ́ʊ bíya kazɔ́ɔ ńba nɛ́, bɛ́nbɛlíɩ kɩ gɛ baɖʊ nimíni. 20 Bɩlɛ́ nɛ́ anɖébiwá bʊbɔtɩnáa, balakásɩ gɛ mɩ́ndɩlɩ́ɩna wɛ.»

21 «Bɩdɛkɛ́ɛ wenbá rɩ́ŋa bánÿaá ma sɩsɩ Ɖádʊ́ʊ, Ɖádʊ́ʊ nɛ́ sɩ basʊʊná Ɩsɔ́ɔ‑dɛ́ɛ ‑daá, amá wenbá bánlám majaa weení ɩwɛ nɛ́ ɩdɛ́ɛ sɔɔlɩ́m nɛ́ gɛ. 22 Tɔ́m fʊ́ʊ́dɩ wɩ́rɛ wándalɩ́ɩ nɛ́, ɖabata wɔ́ndɔ́m ma sɩsɩ: «Ɖádʊ́ʊ, mányɩ sɩsɩ na nyáyɩ́ɖɛ‑daá gɛ ɖááŋmátɩ ɩráa Ɩsɔ́ɔ‑dɛ́ɛ tɔ́m, ɖɩɖɔ́ɔ zííniwá ya. Na nyáyɩ́ɖɛ‑daá, ɖáálá maamááciwá ɖabata.» 23 Na mobúsi wɛ sɩsɩ: «Kɛtɛngɛrɛ mádátɩ́lɩ́ mɩ́ɩ́; ɩlaná ma bolíni, mɩ́nyɔ́ɔ́ wenbá mɩ́nlám bidaavé nɛ́.»

24 «Ɩrʊ́ weení waanɩ́ɩ tɔ́m mánŋmatɩ́ mɩ́ɩ́ tɩ ɖɔ́ nɛ́, ngɛ woovu ɩlá wenbí tɩ́nbɔɔzɩ́ nɛ́, cɔɔ́ɔ gɛ nyazɩ ɩrʊ́ áséńsi‑dʊ́ʊ weení waama ɩɖɔɔ́ bɩ́tángbalʊʊ́‑rɔ nɛ́. 25 Tɛ́ɛ́wʊ waanɩ́ɩ búúzi isu sɩyɛlɩ́, fefelimá kʊ́bɔná ɩfɛ́tɩ na ɖóni bɩrɩ́ŋa bɩkʊrʊ́na ɖɔɔ́ kɛḿ; amá ɖɔɔ́ kɛḿ kadasála, káma bɩ́tángbalʊʊ́‑rɔ gɛ baagáa kɛdɛ́ɛ adɛ‑bɔ́. 26 Amá ɩrʊ́ weeníɩ waanɩ́ɩ tɔ́m mánŋmatɩ́ mɩ́ɩ́ tɩ ɖɔ́ nɛ́, ngɛ ɩdalá wenbí tɩ́nbɔɔzɩ́ nɛ́ cɔɔ́ɔ gɛ nyazɩ ɩrʊ́ kʊjʊʊ́ fɛ́yɩ́‑dʊ́ʊ weení waama ɩɖɔɔ́ kanyɩ́ŋa‑daá nɛ́. 27 Tɛ́ɛ́wʊ waanɩ́ɩ, búúzi isu sɩyɛlɩ́, fefelimá kʊ́bɔná ɩfɛ́tɩ, ngɛ ɖɔɔ́ waazála konúúdi.»

28 Yeésu waaŋmátɩ́ tɔ́mwá tɩḿ bɩtɛ́ nɛ́, ngɛ ɩdɛ́ɛ wɩlɩ́ɩ waalá zamɔ́ɔ bítí. 29 Ɩdánwɩlɩ́ nyazɩ bɛdɛ́ɛ wánwɩlɩ́ɩ nɛ́, amá wánwɩlɩnáa yíko wenkí Ɩsɔ́ɔ weejéle yɩ nɛ́ gɛ.