1 Mpamerevere ty divay,

mpañotakotake ty toake,

vaho tsy mahihitse i nampivìhe’ey.

2 Ty fampangebaheban-kaviñera’

i mpanjakaiy,

le manahake ty firohafan-diona;

mamoe aiñe ty mitrabik’ aze hiboseha’e.

3 Havañona’ ondaty te miholiatse

añ-ali-drokoñe,

fe manjehatse avao o dagolao.

4 Tsy mitrabak’ asotry ty tembo;

ie famara-manta,

mangatake tsy mahazo.

5 Rano laleke ty fisafirian’ arofo’ ondaty,

fe mampiboak’ aze ty mahihitse.

6 Maro ty mihaboke ho mpiferenaiñe,

fa ia ty mahatendreke ondaty migahiñe.

7 Mañavelo an-kahiti’e ty vantañe;

haha o ana’e manonjohy azeo!

8 Tsongàe’ ty mpanjaka

miambesatse an-jaka ao am-pihaino’e

ze atao haratiañe iaby.

9 Ia ty mahafisaontsy ty hoe:

Fa nampikanitsoheko ty troko;

vaho malio tahin-draho?

10 Songa tiva am’ Iehovà

ty vato-pandanja vìlañe

naho ty kapoake vàlañe.

11 O sata’eo ro andrendrehañe i zatovo,

hera mikasokàsoke naho to i fitoloña’ey.

12 Ty ravembia mahajanjiñe,

naho ty fihaino mahaoniñe,

songa namboare’ Iehovà.

13 Ko manao hatea rotse,

tsy mone ho rarake;

Avotiriho o fihaino’oo

le ho eneñe mahakama.

14 Raty, raty, hoe ty mpivily;

ie mienga le isengea’e.

15 Eo ty volamena

naho ty vatosoa tsifotofoto;

fe safira ty fivimby nahatendreke hilala.

16 Rambeso ty saro’ ty nitsoak’ ambahiny, tambozoro ho antoke t’ie tsy fohiñe.

17 Mamy ty mofo niazo t’ie namañahy,

fa ho atseke faseñe aniany ty vava’e.

18 Tolo-kevetse ro mahajadoñe safiry,

Mañolots’ añ’aly ty fanoroan-kihitse.

19 Mampiborake tangogo

ty mpikanifoke mitsatsà;

aa le ko mirekets’ami’ty mpangaradadake.

20 Ze mamatse rae naho rene,

hikipeke an-kaieñe ao ty failo’e.

21 Ty lova tinaentaeñe am-baloha’e,

tsy ho tahieñe am-para’e.

22 Ko manao ty hoe: Ho valeko i ratiy; mahaliñisa Iehovà,

Ie ty handrombak’ azo.

23 Tiva am’ Iehovà ty vato-lanja tsy mira; vaho tsy vokatse o fandanjàñe vìlañeo.

24 Alaha’ Iehovà o lia’ ondatio; aia arè ty haharendreha’ ondaty i lala’ey?

25 Fandrike ty ikofofoaha’ t’indaty,

ty hoe: Masiñe! ie añe i fantay

vaho añontanea’e.

26 Manònga o lo-tserekeo

ty mpanjaka mahihitse;

le ampivarimbariñe’e ama’e ty larò.

27 Failo’ Iehovà ty arofo’ ondaty,

Fonga karaofe’e o añova’eo.

28 Mahafijadoñe ty fiferenaiñañe

naho ty hatò i mpanjakay;

tohaña’e am-patarihañe i fiambesa’ey.

29 Enge’ o ajalahio o haozara’ iareoo;

maroi-foty ty volonahe’ o androanavio.

30 Mamaopao-karatiañe

ty fofoke mamonotroboke,

naho mañalio o añova’eo ty lafa.