1 Zao o fangem-pañaveloa’ o ana’ Israeleo te niavotse an-tane Mitsraime añe am-pivovoran-dahindefoñe ambane’ ty fehe’ i Mosè naho i Aharoneo. 2 Sinoki’ i Mosè o fiorotan-dia’ iareo ki-fange-fange’e ami’ ty lili’ Iehovào; le zao o fange’eo ty amo toe-piengà’eo. 3 Nenga’ iareo ty Ramesèse ami’ ty volam-baloha’e, ami’ty andro faha folo-lime’ ambi’ i volam-baloha’ey; ami’ty andro nanonjohy i Fihelañ’ Ambone’ o ana’ Israeleoy ty niavota’ iareo an-kavokavoke am-pahaisaha’ o nte-Mitsraime iabio, 4 naho nandeveñe o tañoloñoloña’e iabio o nte-Mitsraimeo, o nipaohe’ Iehovà añivo’ iereoo, vaho nametsaha’ Iehovà zaka o ndrahare’ iareoo.

5 Aa le nienga i Ramesese o ana’ Israeleo naho nitobe e Sokòte; 6 nienga i Sokòte vaho nitobe Etàme añ’olo’ i fatrambeiy. 7 Nionjoñe boak’ Etàme le niolake mb’e Pihakiròte atiñana’ i Baale-Tsefòne mb’eo vaho nitobe marine i Migdòle. 8 Ie nenga i Pihakirote, le nisoroke i riakey naho nañavelo telo andro am-patrambey Etame vaho nitobe e Marà. 9 Nenga’ iareo ty Marà le nipotìtse e Elime ao; aman-drano manganahana folo roe-ambi’ ty Elime naho satrañe fitompolo vaho nitobeañe. 10 Ie nienga i Elime le nitobe añ’ olo’ i Ria-Binday, 11 nienga i Ria-Binday le nitobe ampatrambei’ i Sine, 12 niavotse i fatrambei’ i Siney le nitobe e Dofkà, 13 nienga i Dofkà le nitobe e Alòse, 14 nienga i Alòse vaho nitobe e Refidìme, f’ie tsy aman-drano ho kamae’ ondatio. 15 Ie nienga i Refidime le nitobe am-patrambei’ i Sinay, 16 ni­enga i Fatrambey Sinay vaho nitobe e Kibròtatahavà. 17 Ie nienga i Kib­ròtatahavà le nitobe e Katseròte, 18 nienga i Katseròte le nitobe e Ritmà, 19 nienga i Ritmà le nitobe e Rimòne Pèretse, 20 nienga i Rimòne Pèretse le nitobe e Libnà, 21 nienga i Libnà le nitobe e Risà, 22 nienga i Risà le nitobe e Kehelàta, 23 nienga i Kehelàta le nitobe e Vohi-Sèfere, 24 nienga i Vohi-Sè­fere le nitobe e Karadà, 25 nienga i Karadà le nitobe e Makelòte, 26 nienga i Makelòte le nitobe e Tàkate, 27 nienga i Tàkate le nitobe e Tèrake. 28 nienga i Tèrake le nitobe e Mitkà, 29 nienga i Mitkà le nitobe e Khasmonà, 30 nienga i Khasmonà le nitobe e Moserà, 31 nienga i Moserà le nitobe e Benè’ià’akàne, 32 nienga i Benè’ià’akàne le nitobe e Kore Hagid’gàde, 33 nienga i Kore Ha­gidgàde le nitobe e Iotbàta, 34 nienga i Iotbàta le nitobe e Ebranà 35 nienga i Ebranà le nitobe e Etsiòne Gèbere, 36 nienga i Etsiòne Gèbere vaho nitobe am-patrambei’ i Tsine, atao ty hoe Kadàse. 37 Ie nienga i Kadàse le nitobe e Vohi-Hore añ’olon-tane’ i Edome.

38 Niañambone’ i Vohi-Hore mb’eo t’i Aharone mpisoroñe ami’ty lili’ Iehovà vaho nihomake eo ami’ty taoñe fah’efa-polo’ niavota’ o ana’ Israeleo an-tane Mitsraime ami’ty andro valoha’ i volam-pahalimey. 39 Ni-zato-tsi-roapolo taoñe telo’ amby t’i Aharone te nivilasy ambone’ i Vohi-Hore eo.

40 Jinanji’ ty mpanjaka’ i Arade nte-Kanàne mpimoneñe atimo an-tane Kanàne ao te nomb’ ama’e mb’eo o ana’ Israeleo.

41 Aa le niavotse nitobe e Tsalmonà añe iereo. 42 Ie nienga i Tsalmonà le nitobe e Ponòne. 43 Ie nienga i Ponòne le nitobe e Obòte. 44 Ie nienga i Obòte le nitobe e Ièha Aba­rìme añ’efe-tane’ i Moabe. 45 Nenga’ iareo t’Iìme vaho nitobe e Dibone-Gade. 46 Ie nienga i Dibone-Gade le nitobe e Almone-Diblataième. 47 Ie nienga i Almone-Diblataième le nitobe amo vohi’ i Abarìmeo aolo’ i Nebò. 48 Ie nienga i am-bohi’ Abarìmeo le nitobe a montombei’ i Moabe añ’olo’ Iardeney tandrife Ierikò. 49 Nitobe marine Iardeney iereo, mifototse e Bete’ ha’ Iesimòte pak’añ’Ala-Roi’ i Abele a montombei’ i Moabe añe.

50 Aa le nitsara amy Mosè t’Iehovà a montombei’ i Moabe añ’ olo’ Iardeney tandrife’ Ierikò eo, nanao ty hoe: 51 Taroño amo ana’ Israeleo ty hoe: Ie mitsake Iardeney mb’an-tane Kanàne mb’eo, 52 le fonga hanoe’ areo soike ze mpimoneñe amy tane aolo’ areoy, arotsaho o vato-sinoki’e iabio, ampiantò o sare tineno’ iareo iabio le demoho o tamboho’ iareo iabio; 53 ho tavane’ areo i taney vaho himoneñe ao, amy te natoloko anahareo i taney ho fanañañe. 54 Le ho zarae’ areo an-tsapake i taney ho lova’ o hasa­vereña’ areoo; ty maro ho tolora’ areo lova bey, le ty tsy ampe ho tolora’ areo lova kede; ze nitsatoha’ i tsapakey ty ho fanaña’ indatiy ho lova’e; ty amo fifokoañeo ty anjarañe aze. 55 Fa naho tsy hatao soike aolo’ areo mb’eo o mpimoneñe an-taneo le ho fatik’ am-pihaino’ areo, naho fitsipok’ an-deme’ areo o nisisa’ areo ama’eo, vaho hitsibore anahareo an-tane himoneña’ areo ao. 56 Le hanoeko ama’ areo i sinafiriko hanoeñe am’ iareoy.