1 א Ondaty nahatrea hasotrian-draho

amy kobain-kaviñera’ey.

2 Niaoloa’e naho nampomba’e

mb’an-kamoromoroñañe ao

fa tsy mb’an-kazavàñe.

3 Toe nafote’e amako lomoñandro

lomoñandro ty fità’e.

4 ב Nanoe’e hambo’e o nofokoo

naho o holikoo;

sindre pinekapeka’e o taolakoo.

5 Nanoa’e hàlañe, nañarikatoha’e afero

naho haloviloviañe.

6 Nampitobohe’e an-toetse maieñe

ao raho, hoe lolo-ela.

7 ג Narindri’e ao tsy hahafionjoñe;

nanoe’e mavesatse o silisilikoo.

8 Aa naho mikoikoike hipay imba,

le sikadaña’e alafe ao i halalikoy.

9 Nikalaña’e am-bato vinañe o liakoo,

nampikelokelofe’e o oloñolokoo.

10 ד Hoe amboa romotse mamandroñe

ahy, hoe liona añ’etaketak’ ao.

11 Natsile’e iaby o fombàkoo,

naho nirimidrimite’e ty sandriko;

nanoe’e babangoañe.

12 Fa nabitso’e ty fale’e, le nohara’e amako ty ana-pale.

13 ה Nampitrofahe’e ambaniako ao

o ana-tsotsòke boak’ an-trañon’

ana-pale’eo.

14 Fa finjè’ondatikoo raho,

bekobekoa’ iareo lomoñandro.

15 Finaha’e hafairañe

vaho natsafe’e vahon-tsoy.

16 ו Finoifoi’e am-bato o nifekoo;

nalembe’e an-davenok’ ao raho.

17 Nampihankàñe’o

lavi-panintsiñañe ty haveloko;

nihaliñoko ze o hasoa zao.

18 Le hoe raho, Fa modo ty

haozarako, ty fitamàko am’ Iehovà.

19 ז Tiahio ty haloviloviako

naho ty hasotriako,

ty vahon-tsoy naho afero.

20 Toe tiahi’ ty fiaiko,

vaho mibotrek’ amako ao.

21 Ty hoe ty apotam-pitsakoreako,

mampitamà ahiko, te

22 ח le lia’e tsy mijihetse ty fiferenaiña’ Iehovà

tsy mb’ia hilesa o fiferenaiña’eo.

23 Vao boak’andro;

ra’elahy ty figahiña’o.

24  Iehovà ty anjarako, hoe ty troko,

aa le ie ty fitamàko.

25 ט Soa t’Iehovà amo mahaliñe azeo;

amy arofo mipay Azey.

26 Mahasoa ondatio te mitama,

t’ie handiñe am-pianjiñañe

ty fandrombaha’ Iehovà.

27 Hasoa am’ondatio ty mivave

ty jokan-katora’e.

28 י Angao re hiambesatse am-bangiñe

ao, hianjiñe,

amy te ie ty nandafik’ aze.

29 Hatoho’e an-debok’ ao ty falie’e,

hera ama’e ty fitamañe.

30 Soa re te hatolo’e amy mandrara-

tehak’ azey ty fiambina’e;

angao ampiliporeñ’ inje.

31 כ Fa tsy hañito nainai’e t’i Talè.

32 Aa ndra t’ie ty mampioremeñe,

mbe hiferenaiña’e

amy hafatraram-pikokoa’ey.

33 Tsy mora ama’e ty mandafa,

ndra ty mandilo o ana’ondatio;

34 ל Ie ampidemoheñe am-pandia,

ze mpirohi’ ty tane toy;

35 ie tsy omen-to ondatio añatrefa’

i Andindimoneñey,

36 ie ampikeloheñe ty enta’ ondatio—

tsy arofoana’ i Talè hao?

37 מ Ia ty nitaroñe naho nahafetsake zao,

naho tsy i Talè ty nametse?

38 Tsy boak’am-palie’ i Abo Tiañey hao ty hankàñe naho ty soa?

39 Akore ty itoreova’ondaty veloñeo,

o lahilahio ty amo tahi’eo?

40 נ Antao hañotsohotso hitsoke

o lalan-tikañeo,

vaho himpoly mb’am’ Iehovà mb’eo.

41 Antao hañonjoñ’ arofo am-pitàñe mb’aman’Añahare an-digiligy añe.

42 Toe nandilatse zahay naho niola;

toly ndra tsy napo’o.

43 ס Nikolopok’ an-kaviñeran-drehe

te nañoridañe anay;

tsy niferenaiña’o t’ie nanjamañe.

44 Nisaron-drahon-dRehe,

tsy himoahan-kalaly.

45 Nanoe’o romoromo’e naho forompotse zahay

añivo’ o kilakila’ndatio.

46 פ Songa midañadaña falie ama’ay

o malaiñ’anaio.

47 Fa nifetsak’ ama’ay ty hebakebake

naho i koboñey,

ty famongorañe naho fandrotsahañe.

48 Mitsiritsioke rano o masokoo,

amy fandrotsahañe

i anak’ampela’ ondatikoy.

49 ע Midoandoañe mañambane

o masokoo,

vaho tsy mijihetse, tsy mitroatse,

50 Ampara’ te mivazoho mañambane

t’Iehovà,

mitalake boak’ an-dikerañe añe.

51 Mampihontoke ty troko o masokoo

ty amo hene anak’ampelan-drovakoo.

52 צ Fa nikehe ahy hoe kibo,

tsy amam-poto’e o malaiñ’ahio.

53 Naitoa’ iareo an-koboñe ao ty fiaiko,

vaho nandretsa-bato amako.

54 Nandipotse ty lohako o ranoo

vaho nanoeko ty hoe: Opo raho!

55 ק Kinanjiko ty tahina’o ry Iehovà,

boak’ an-koboñe loho lalek’ ao.

56 Jinanji’o ty feoko;

ko aeta’o amy ravembia’oy

i fitoreokoy hahafikofohako.

57 Nitotok’ ahy Rehe amy andro

nikanjiako azoy; le hoe Rehe:

Ko hemban-drehe.

58 ר Ry Talè, nañalañalañe’o

o entan’ aikoo;

fa jineba’o ty fiaiko.

59 Ry Iehovà, fa nivazoho’o

ty nasarañ’ ahy; ehe izakao.

60 Fa nioni’o ty fitrotrofiaha’ iareo

naho ty fikitroha’ iareo amako.

61 ש Fa jinanji’o ty inje’ iareo, ry Iehovà,

naho o fikililia’ iareo ahy iabio,

62 Ty fivimbi’ o nitroatse amakoo,

ty fikinià’ iareo ahy lomoñandro,

63 Vazohò iereo te miambesatse,

naho t’ie miongake;

zaho bekobekoa’ iareo.

64 ת Mbe hondroha’o, ry Iehovà,

ty amo satam-pità’ iareoo.

65 Kolopofo ty arofo’ iareo,

ametsaho fatse!

66 Horidaño an-kaviñerañe

vaho mongoro

ambanen-dikera’ Iehovà eo.