2 Iheveo hey raho le hitoroako te mbe aman-ko volañeñe hañonjonañe an’Andrianañahare.

3 Hitoha hilala tsietoitane añe raho,

tolorako havantañañe i Mpitsene ahiy.

4 Toe aman-kila o entakoo;

vaho ama’o i aman-kilala fonitsey.

5 Inao maozatse t’i Andrianañahare,

naho tsy mirihy;

ie fatratse an-kaozaram-paharofoanañe.

6 Tsy tana’e ho veloñe o tsereheñeo,

fe omei’e to ty tso-troke.

7 Tsy asita’e amo vantañeo o fihaino’eo;

fa ampiambesare’e ho nainai’e

amo mpanjaka am-piambesa’eo,

vaho onjone’e.

8 Aa ie mirohy an-tsilisily,

naho nivahoran-kasotriañe,

9 le itaroña’e o sata’ iareoo

naho o fiolà’ iareoo, te mitakeboke.

10 Sokafe’e hianatse o ravembiao,

vaho lilie’e te hiambohoa’ iareo

o tsy havokarañeo.

11 Ie mañaoñe naho mitoroñ’aze,

le amam-bokatse ty higadoña’ o andro’eo vaho am-pierañerañañe o tao’eo.

12 F’ie tsy mañaoñe,

le ho zamanem-pibara,

hiantantiritse tsy aman-kilala,

13 ie mañaja si-manty,

tsy aman-Kàke an-troke;

tsy mikaike olotse te rohiza’e.

14 Robak’ an-katora’e ty sandri’iareo,

ty fiai’ iareo an-karapiloan-do.

15 Haha’e am-pisotria’e ty misotry;

anokafa’e ravembia i forekekeñey.

16 Eka, tinao’e boak’ an-jitse rehe

mb’an-tameañe tsy aman-tindry;

naho lifo-tsafo’e ty hazotso

am-pandambaña’o eo.

17 F’ie nañeneke ty fizakañe

o rati-tserekeo;

fiihine’ ty zaka naho ty hatò.

18 Itaò tsy hanigìk’ azo hañivañiva

ty habosehañe,

vaho apoho tsy hampitsile azo

ty habeim-bokàñe.

19 Hahatohañ’azo tsy ho am-poheke hao o vara’oo?

ndra ze hene hafatraran-kaozara’o?

20 Ko salalaeñe ty haleñe,

ie aitoañe an-toe’e ondatio.

21 Miambena, tsy hitoliha’o ty haratiañe;

toe ie ty nijoboñe’o,

fa tsy hasotriañe.

22 Inao! onjoñe’ ty haozara’e t’i Andrianañahare

Ia ty mpañoke mañirinkiriñe Aze?

23 Ia ty nanendre ty lala homb’e?

Ia ty mahafivolañe ty hoe:

Tsy soa o nanoe’oo?

24 Tiahio hey ty hañonjonañe

o fitoloña’eo, o fisaboa’ ondatio.

25 Hene nahaisake ondatio;

talakesa’ ondaty an-tsietoitaneo

26 Inao! jabahinake

t’i Andrianañahare,

tsy taka’ ty hilalan-tika;

tsy hay volilieñe ty ia’ o tao’eo.

27 Aonjo’e o pilipiton-dranoo;

ampanjaria’e orañe i evoñey;

28 Le ampikojojoahe’ o rahoñeo,

hitsopatsopake, hañerek’ am’ondatio.

29 Hete! Ia ty maharofoanañe

ty fiboelea’ o rahoñeo?

ty fangotroha’ i sokemitraha’ey?

30 Oniño te ampivarakaihe’e ama’e o fitsipela’eo vaho ampoa’e

ty vaha’ i riakey.

31 Ie ro izaka’e ondatio;

naho añeneña’e mahakama.

32 Safora’e helatse o fità’eo,

naho lilie’e hitomboke.

33 Mitalily aze i ampi’ey,

amo añombeo t’ie ho avy.