2 Janjiño o entakoo

ry androanavy mahihitseo,

anokilaño ravembia,

ry mahafohiñeo.

3 fa mitso-tsara ty ravembia manahake

ty fitsohan-dañilañy mahakama.

4 Antao tika hijoboñe ty soa,

hisafirian-tika ty atao fanjàka.

5 amy nanoe’ Iobey, ty hoe: Vañon-draho,

fe nasintan’ Añahare amako ty zoko;

6 handañirako hao i zokoy;

tsy mete melañe i trinofan-defoñey,

ndra t’ie malio-tahiñe.

7 Ondaty ia ty rahamba’ Iobe?

ie migenoke inje hoe rano,

8 ie mpifañosoñe amo mpitolon-karatiañeo le mitrao-pañavelo

am’ondaty mengokeo?

9 ie nanao ty hoe, Tsy vente’e ama’ondatio te ifalea’e t’i Andrianañahare.

10 Aa le janjiño raho, ry aman-kilálao,

Lavits’ an’ Andrianañahare

ty haratiañe,

naho amy El-Sadai ty fandilarañe.

11 Fa o sata’eo ty hanambeza’e ondaty,

o fitoloña’eo ro hanoly aze

ami’ty eva’e.

12 Toe tsy manao raty t’i Andrianañahare,

vaho tsy mañolake ty hatò

t’i El-Sadai.

13 Ia ty nampamandroñ’ aze ty tane toy,

vaho ia ty nampivave aze

ty voatse bey toy?

14 Aa naho nampoli’e ama’e ty fo’ ondaty naho natonto’e ama’e i tro’ey vaho i kofo’ey,

15 le fonga ho nitrao-pihomahañe ze atao nofotse;

vaho kila ho nibalike

ho lemboke ondatio.

16 Fe naho mahilala, janjiño,

tsendreño ty feo’ o entakoo.

17 Hifehe hao ty malaiñe to?

Hafà’o hao i Fanalolahy Vañoñey?

18 I manao ty hoe ami’ty mpanjaka:

Ry Votro,

naho amo ana-donakeo, Ty Piaroteñe!

19 Ie tsy miasy roandriañe,

tsy mañaom-pañaleale

mandikoatse ty rarake,

ie fonga satam-pità’e.

20 Mihomak’aniany iereo, te petsak’ale;

troboeñe ondatio le mihelañe añe,

asintake tsy am-pitàñe o maozatseo.

21 Fa amo sata’ ondatio o fihaino’eo,

vazoho’e iaby o lia’eo.

22 Tsy eo ty ieñe ndra ty

fimoromoroñañe hietaha’ o tsereheñeo.

23 Le tsy ifotoañan’ andro ty hiatrefa’ ondaty aman’Añahare ho zakaeñe.

24 Demohe’e tsy an-dohy o fatratseo,

le avotra’e an-toe’e eo ty handimbe aze.

25 Aa kanao arofoana’e o sata’eo,

le avalitaboa’e te haleñe,

vaho dorodoroe’e.

26 Lafà’e manahake o tsereheñeo

an-tameañe eo ho fisambàñe,

27 amy t’ie nitsile tsy nañorik’ aze,

le tsy teo t’ie nañaoñe o lala’eo,

28 toly ndra nampombae’ iareo mb’ama’e ty fitoreova’ o rarakeo

fa janji’e ty toreo’ o silofeñeo—

29 naho mianjin-dre, ia ty hanìñe?

Ie aeta’e ty lahara’e,

ia ty hahaisak’ aze,

ndra t’ie foko ndra te ondaty—

30 soa tsy hifehe ty tsi-aman-Kàke,

vaho tsy ho fandrik’ am’ ondatio.

31 Ia ty nanao ty hoe aman’Añahare?

Fa nililoveñe, zaho tsy nandilatse;

32 Anaro ahy o tsy treakoo;

naho niota faly, tsy hanoeko ka?

33 I satri’oy hao ty hamalea’e Azo,

kanao liere’o?

Ihe ‘nio ty hijoboñe, fa tsy zaho;

aa le saontsio o fohi’oo.

34 Hanao ty hoe amako ondaty mahilalao, Toe mahafijanjiñe ty androanavy mahihitse:

35 Misaontsy tsy aman-kilala t’Iobe,

vaho tsy hinotsohotso’e o enta’eo.

36 Ee te ho hereherèñe pak’am-para’e t’Iobe ie nanoiñe hoe ondaty lo-tsereke.

37 Tompea’e fiolàñe o hakeo’eo;

miteha-pitàn-dre añivon-tikañe eo,

le manovon-tsaontsy hatreatre’e

t’i Andrianañahare.