1 Tsy mikafitse amy El-Sadai

o sa-o,

Akore te tsy mahaoniñe o andro’eo

o mahafohiñe azeo?

2 Ao ty mameve vorovoro:

ie mitavañe naho mampibotseke

lia-raike.

3 Roahe’ iareo añe ty borìkem-bode-rae,

vaho rambese’ iereo ho tsoake

ty vosi’ i vantotsey.

4 Ampisitahe’ iereo amy lalañey ty poie’e;

mitrao-pietake o rarake an-tane atoio.

5 Hehe te hoe borìke-ly

an-dratraratra añe

ty irembea’ iareo mitsindroke;

hera hamahan-kaneñe amo ana’eo

ty fatrambey.

6 Tatahe’ iereo ze haneñe an-kivok’ ao,

vaho timpone’ iereo

ty an-tanem-bahen-do-tserek’ ao.

7 Miboridañe t’ie mialeñe,

tsy aman-tsaroñe,

tsy amam-bodo amy hanintsiñey.

8 Len-oram-bohitse iereo,

vihineñe ty lamilamy

amy t’ie tsy amam-pipalirañe.

9 Eo ty mitavam-bode-rae am-patroa

vaho andrambesan-tsoak’ ty rarake.

10 Ampandenàñe tsy aman-tsikiñe

ty miboridañe,

tavane’ iareo ty taho’ o salikoeñeo,

11 ie mamboatse menake an-kijoly ao;

mandia am-piriritan-divay,

f’ie maran-drano.

12 Miñeoñeoñe an-drova ao ondatio,

mikoiake ty fiai’ o fereo;

f’ie tsy anesehan’ Añahare hagegeañe.

13 Mpiamo mpiola amo hazavàñeo,

tsy fohi’ iareo o sata’eo,

tsy imoneña’ iareo o lala’eo.

14 Mitroatse te mazava i mpañoho-dozay, hanjevoa’e o rarakeo

naho o poie’eo,

ie haleñe manao malaso.

15 Mandiñe mielizava

ty masom-panao havambañe,

hoe re: tsy honiñam-pihaino,

mbore honohonoe’e ty tarehe’e.

16 Ie añ’ieñe ro mampigorabak’ anjomba, antoandro migabeñe ao:

tsy fohi’ iereo ty hazavàñe.

17 Talinjom-piantantiritse ama’e

ty maraindray:

mahazats’ aze ty fampangebahebahan-

kamoromoroñañe.

18 Vore mikafo an-drano eo iereo;

fatra an-tane ty anjara’e,

tsy itsileañe ty mb’an-tanem-bahe’e.

19 Mamotseke ranom-panala

ty tariñandroke naho ty hain-tane:

zay ka ty kibory amo manan-tahiñeo.

20 Handikok’ aze i hoviñey;

an-kaehake ty fihinanan’ oletse aze

ampara’ te tsy tiahy ka:

ie pozaheñe hoe hatae i lo-tserekey.

21 Joie’e i betsiterakey,

tsy soa’e ty vantotse.

22 Kozozote’e amañ-ozatse ty fanalolahy;

mitroatse re le iatoa’ ia ty havelo’e.

23 Tolora’e fañarovañe, le iatoa’iareo;

mbore jilove’e o lala’iareoo.

24 Onjoneñe betebeteke iereo,

naho mifiotse añe;

afotsake naho atontoñe ao

manahake o ila’e iabio;

vaho miheatse hoe

t’ie lengom-boto-tsako.

25 Aa naho tsy zay,

ia ty hamente t’ie mavande

hampikoake i entakoy?