2 Mafaitse ty toreoko henaneo,

taña-miletraletra ty amy hatreontreoko.

3 Ehe te napotako ty hahatreavako Aze,

hiheovako mb’am-piambesa’e mb’eo.

4 Halahako aolo’e eo ty amako,

vaho hatsafeko veroke ty vavako.

5 Ho azoko ty entañe havale’e ahy,

vaho ho rendreko ty hitsara’e.

6 Hatreatré’e ami’ty hara’elahin-kaozara’e hao?

Aiy, f’ie ho haoñe’e.

7 Mete hilahatse ama’e ty vañoñe,

hamotsorañe ahy nainai’e

amy Mpizakakoy.

8 Hehe te mionjon-draho, f’ie tsy eo,

midisa-voly, fa tsy isako,

9 ie mitoloñ’an-kavia, tsy treako,

ie mitolike mb’àn-kavana,

tsy rendreko.

10 Fe arofoana’e ty lala fombàko,

ie fa nitsoeha’e le hiboake hoe volamena.

11 Nahafitinoñe i lia’ey ty tomboko,

nifaharako i lala’ey vaho tsy nitsile.

12 Tsy nisitahako o nafèm-pivimbi’eo;

nahajako o tsaram-palie’eo

mandikoatse ty anjara rimako.

13 F’ie tsy roe tsy telo,

ia ty hampitolik’ aze?

anoe’e iaby ze satrin’arofo’e.

14 Ie ro mañeneke o atolots’ ahikoo:

maro ty fanoe’e hoe zay.

15 Aa le hirevendreven-draho

añ’atrefa’e eo;

zaho mitsakore, le añeveñako.

16 Ampianifan’ Añahare ty troko,

ampangebahebae’ i El-Sadai,

17 Toe tsy naitoañ’ añatrefa’ i ieñey raho,

naho nisaroña’e an-tareheko i fimoromoroñañey.