2 Hanoiñe an-kilala-kafoake hao

t’indaty mahihitse,

ho lifora’e tiok’atiñanañe hao ty fisafoa’e?

3 Hisafiry an-drehake tsy vente’e hao,

ndra an-dañonañe tsy hahasoa?

4 Eka, apo’o ty fañeveñañe,

sebaña’o ty fiambaneañe aman’ Añahare.

5 Anare’ o hakeo’oo ty falie’o,

joboñe’o ty famelen-kalitake.

6 Mamatse azo o falie’oo, fa tsy zaho;

eka talilie’ o fivimbi’oo.

7 Ihe hao t’indaty nisamaheñe valoha’e?

Nitoly aolo’ o vohitseo v’iheo?

8 Janji’o hao o safirin’ Añahare

miheotseo?

Haramamoe’o hao ty hihitse?

9 Ino ty fohi’o tsy fohi’ay?

Ino ty rendre’o tsy ama’ay?

10 Songa ama’ay ty maròy foty

naho ty androanavy bey taoñe

te aman-drae’o.

11 Maivañe ama’o hao ty fañohòan’ Añahare,

naho o navere’e mora ama’oo?

12 Ino ty mampihelañe ty arofo’o?

vaho mampandofiry o fihaino’oo?

13 T’ie tsambolitioe’o aman’Añahare

ty arofo’o,

ie anga’o hiakatse am-palie’o

i saontsy zay.

14 Ino t’indaty, t’ie halio?

I nasaman’ampelay, t’ie ho vañoñe?

15 Ingo, ndra o masi’eo tsy iatoa’e

mbore tsy malio am-pivazohoa’e

o likerañeo.

16 Àntsake ty lo-tsereke naho ty maleotse,

ie mpitohoke tahiñe hoe rano!

17 Hataliliko azo, janjiño;

vaho ho taroñeko o nitreakoo—

18 O saontsi’ ondaty mahihitseo,

ty tsy naeta’e boak’ aman droae’ iareo;

19 Ie am’ iereo avao

ty nitolorañe i taney,

ndra ty renetane tsy nihelañe

am’iereo ao.

20 Ampikoretohe’

ty farare’e lomoñandro

ty lo-tsereke,

voaiake o taoñe nahaja

ho a’ o mpisenge-herio.

21 Feo mañebake

ty an-dravembia’e ao;

ie manintsin-dre,

te ivotraha’ ty malaso.

22 Tsy iantofa’e

te hibalike boak’amy ieñey,

toli’e i fibaray.

23 Mirererere mipay hanen-dre ami’ty hoe; Aia zay? Apota’e te am-pità’e

i andro mimoromoroñey.

24 Ampangebahebahe’

ty haloviloviañe naho hasotriañe,

miambotrak’ ama’e hoe mpanjaka

veka’e hihotakotake.

25 Amy te natora-kitsi’e aman’Añahare ty fità’e,

mitoandratoandra amy El-Sadai.

26 Horidaña’e ami’ty hagàn-kàto’e,

amy hateven’ angozim-pikalan-defo’e.

27 Amy te kinope’e solike i tarehe’ey,

vaho pinako’e havondrahañe ty leme’e;

28 Itoboha’e o rova mangoakoakeo, añ’anjomba tsy fimoneñañe,

ie veka’e ho votre.

29 Tsy ho mpañaleale re,

tsy ho nainai’e ty fijangaña’e,

tsy midrodretse mb’an-tane o ampemba’eo.

30 Tsy hibolitira’e i ieñey;

haforejeje’ i lelan’ afoy o tora’eo,

vaho hampihelaña’ ty kofòm-palie’e.

31 Ee te tsy hiatoa’e ty hakoahañe,

hamañahia’e vatañe;

fa hanambezañe aze ty tsy vente’e.

32 Ho henek’ aolo’ ty andro’e zay,

vaho tsy handrevake ty tsampa’e.

33 Hahifi’e i valobo’e mantay

manahak’ i vahey,

vaho hahintsa’e i voñe’ey

hambañ’ amo oliveo.

34 Fa hangoakoake ty fivavea’

ty tsy aman-Kake,

vaho ho forototoe’ ty afo

ty kijà’ o mpanao vokàñeo.

35 Ie mampiareñe hakalitahañe,

naho mampiboloañe hakeo,

vaho famañahiañe

ty ihentseñan-tro’e.