1 Haoño raho, ry mpañori-kavantañañe,

ry mipay Iehovà; itoliho i lamilamy

nampitserahañe anahareoy,

naho i koboñe nihaliañe anahareoy.

2 Haraharao t’i Avrahame rae’ areo,

naho i Sarae* Sarae: rakemba: bey; panjaka; ana’e maro nisamake anahareo

am-panaintaiñañe,

amy t’ie nirery avao te tinokako,

le nitahieko vaho nampitozantozañeko.

3 Fa nohoñe’ Iehovà t’i Tsione;

hene nampanintsiñe’e o tanan-taolo’eo,

naho nampanahafe’e amy Edene

o ratraratra’eo,

le hambañe amy golobo’ Iehovày o liolio’eo;

ho tendrek’ ao

ty firebehañe naho ty hafaleañe,

ty fañandriañañe naho ty feom-pisaboañe.

4 Haoño raho ry ondatiko,

toloro ravembia ry fifeheako;

fa hiboak’ amako ty Hàke, vaho havereko ami’ty havañonako ho failo’ ondatio.

5 Fa marine ty havantañako,

fa mionjom-beo ty fandrombahako,

vaho hizaka ondatio o sirakoo;

handiñe ahy o tokonoseo,

hiato ami’ty sirako.

6 Andrandrao mb’andikerañe eñe

o fihaino’ areoo,

le isao ty tane ambane atoy;

fa himosaoñe hoe hatoeñe o likerañeo,

naho hihamodo hoe saroñe ty tane toy,

naho hihomake hoe zay ka ondatio;

fe ho nainai’e donia ty fandrombahako vaho le lia’e tsy haitoañe ty havantañako.

7 Mañaoña ahy ry ­mahafohin-kavañonañeo, ry ondaty mitan-Kake añ’arofoo;

ko ihembaña’areo ty ifañembaña’ondatio,

vaho ko ilonjera’ areo o inje’iareoo.

8 Ie ho hanem-­bararaoke hoe lamba,

naho habotsen-oletse hoe volonañondry;

fe nainai’e kitro añ’afe’e ty havantañako,

naho pak’ an-tariratse tsitso’e añe

ty fandrombahako.

9 Mivañona, Mivañona,

mañombea haozarañe ry fità’ Iehovà!

Mivañona manahake o andro taoloo

manahake o tariratse haehaeo.

Tsy Ihe hao ty nampitsera­tserake

i Rahabae? ty nitomboke i fañaneñey?

10 Tsy Ihe hao ty nañamaike i riakey,

o rano’ i laleke mangonkoñeio;

mbore nanoa’o lalañe an-daleke ao

hitsaha’ o jinebañeo?

11 Aa le himpoly o vinili’ Iehovà fiaiñeo, higodañe an-tsabo mbe Tsione mb’eo,

nainai’e hilolohe hafaleañe, naho handia taroba an-kaliforan-kaehake, vaho hihelañe añe ty haoreañe

naho ty fiselekaiñañe.

12 Zaho, le Zaho ty mañohò anahareo,

Ia-mb’arè rehe te ho hembañe am’ondaty

tsi-mahay tsy hivetrakeo,

naho amo ana-ondaty nanoen-ko ahetseo?

13 Nihaliño’o hao t’Iehovà,

Andrianamboatse azo,

I namelatse o likerañeo

naho nañoreñe o faha’ ty tane toio?

ihe miriatsandry lomoñandro

ty amy haleveleve’ i mpamorekeke

mihentseñe handrotsakeiy!

Fa aia ty haromota’ i mpamolevoley?

14 Ho hahàñe aniany ty nasese-androhy;

tsy hizotso mb’ am-pihomahañe

mb’an-tsikeokeoke ao,

vaho tsy hieren-kaneñe.

15 Zaho Iehovà Andrianañahare’o,

ty mampivalitaboake i riakey

vaho nampitroñe o onja’eo—

Iehovà’ i Màroy ty tahina’e.

16 Fa najoko am-palie’o ao o volakoo;

naho nanakoñe azo

ami’ty talinjon-tañako,

hampijadoña’o i likerañey,

naho hañoreña’o ty tane toy,

vaho hanoa’o ty hoe t’i Tsione:

Ondatiko ‘n-iheo.

17 Mivañona, Mivañona,

mitroara ry Ierosalaime,

fa ninoma’o am-pità’

Iehovà i fitovim-piforoforoa’ey;

ie gineno’o reketse karafo’e

ty fitihem-pivembeñañe,

vaho nikapaihe’o.

18 Tsy eo ty hiaolo aze

ami’ty hatozantoza’

o anake nisamahe’eo;

tsy eo ty mañoho-pitañe aze

amo ana-dahi’e tsifotofoto nibeize’eo.

19 O raha roe zao ty hifetsak’ ama’o;

ia ty handala azo?

Ty fangoakoahañe naho ty fandrotsahañe,

ty kerè vaho ty fibara;

aia ty hañohòako azo.

20 Fa toirañe o ana-dahi’oo,

mifitake amo lohan-dala’o iabio,

hoe fanaloke tsinepake an-karato;

lifore’ ty fifombo’ Iehovà,

ty fañendahan’ Añahare’o.

21 Ehe janjiño zao ry mpisotry, naho

ry mpijike—fe tsy an-divay;

22 Hoe t’Iehovà Talè

naho i Andrianañahare’o milozoke

ty am’ ondati’eoy:

Hehe te rinambeko am-pità’o

ty fanovim-pivembeñañe,

naho ty fitovin-kaviñerako;

le lia’e tsy hinoma’o ka;

23 Fa hapoko an-taña’

o mamorekeke azoo;

o nanao ty hoe ami’ty sandri’oo:

Mibaboha handialià’ay;

le nampanahafe’o amy taney

ty lambosi’o, vaho amy damokey

hijelajelaña’iareo.