7
1 Zao ty natoro’ Iehovà, Talè, ahy, Ingo, namboare’e fifamorohotam-balala te nitovoañe i ampemba afaray, le hehe t’ie nandimbe ty fitataha’ i mpanjakay i tinogy an-doha-taoñey. 2 Aa naho hene nabotse’ iareo ze ahetse amy taney eo, le hoe ty asako tama’e,
Ry Iehovà, Talè, ehe apoho;
akore ty hahafijohaña’ Iakobe?
Ie kede.
3 Aa le napo’ Iehovà;
Tsy hanoeñe zay, hoe t’Iehovà.
4 Ie añe le inao ka ty naboa’ Iehovà, Talè: Heheke te kinanji’ Iehovà,
Talè ty zaka añ’afo;
finorototo’e i laleke beiy
vaho namototse nampigodrañe i taney.
5 Aa le hoe raho, Ry Iehovà, Talè, Aziro! iambaneako;
aia ty hijohaña’ Iakobe, ie kede?
6 Aa le nado’ Iehovà:
Tsy hanoeñe ka zay, hoe t’Iehovà, Talè.
7 Zao ka ty natoro’e ahy, ingo te nijohañe ambone kijoly nanoeñe an-tàlin-kahity eo t’i Talè, reketse ty talin-kahity am-pità’e ao. 8 Le hoe t’Iehovà amako, O Amose, ino o isa’oo? Le hoe raho, Talin-kahity. Aa hoe t’i Talè;
Hehe, hapoko añivo’ ondatiko
Israeleo ty talin-kahitiko;
tsy hiheveako ka.
9 Ho koake o toets’ abo’ Ietsakeo,
naho hanoeñe bijon-draha
o toe’ Israele miambakeo;
vaho hitroatse amy anjomba’ Ieroboame raho reketse fibara.
10 Nampañitrik’ am’ Ieroboame mpanjaka’ Israele t’i Amatsià mpisoro’ i Betele, nanao ty hoe, Nikinia azo t’i Amose añ’ anjomba’ Israele ao; tsy leo’ o taneo ze fonga saontsi’e. 11 Fa hoe ty asa’ i Amose,
Inao, hampihomahem-pibara
t’Ieroboame,
vaho tsy mete tsy hasese
mb’am-pandrohizañ’ añe
boak’ an-tane’e ao t’Israele.
12 Aa le hoe t’i Amatsià amy Amose, Ry mpioniñeo, akia, mitribaña an-day mb’an-tane’ Iehoda mb’eo, le kamao añe o mahakama’oo, vaho añe ty itokia’o, 13 fa ko mitoky ka e Betele ao, amy t’ie ty toe-masi’ i mpanjakay vaho rova-bei’ ty fifeheañe toy.
14 Aa le hoe ty natoi’ i Amose amy Amatsià, Izaho tsy mpitoky, tsy anam-pitoky, fa mpihare naho mpañalahala sakoa; 15 vaho rinambe’ Iehovà ami’ty fañarahañe i lia-raikey, le hoe t’Iehovà amako, Akia, mitokia am’ ondatiko Israeleo. 16 Janjiño arè ty tsara’ Iehovà: Hoe ty asa’o:
Ko mitoky am’ Israele vaho
ko mampipoke saontsy
amy anjomba’ Ietsakey.
17 Aa le hoe ty nitsarà’ Iehovà;
Ho tsimirira an-drova ao ty vali’o,
naho hampikorovohem-pibara
o ana-dahi’oo naho
o anak-ampela’oo,
naho ho zarazaraeñe ty tane’o;
naho hikoromak’ an-tane tiva eo rehe;
toe hasese mb’am-pandrohizañ’ añe
boak’an-tane’e ao t’Israele.
DRAFT VERSION