Saontsin’ Añahare Tsefanià 1

Tsefanià

1 Niheo amy Tsefanià* ana’ i Kosý ana’ i Gedalià† ana’ i Amarià‡, ana’ i Kizkià§ faha’ Iosià* ana’ i Amone, mpanjaka’ Iehoda ty tsara’ Iehovà:

2 Toe ho faopaoheko ami’ty tarehe’

ty tane toy ze he’e, hoe t’Iehovà.

3 Ho mongoreko ondatio naho o bibio;

ho fongoreko o voron-dindìñeo,

naho o fian-driakeo,

naho o vato mahatsikapio

mindre amo lo-tserekeo;

vaho haitoako an-tane atoy ondatio,

hoe t’Iehovà. 4 Hatora-kitsiko ty tañako, am’ Iehoda naho

amo hene ondaty e Ierosalaimeo;

le haitoako ami’ty toetse toy

ty sisa’ i Baale,

naho ty tahina’ o mpisorom-

pahasiveo rekets’ o mpisoro’eo; 5 o mitalaho amy fifamorohotan-dindiñey an-tafo’eoo;

o mitalaho naho mifanta am’ Iehovà vaho mifanta amy Malkameo†;

6 o mitolike tsy mañorike Iehovào;

naho o tsy mipay Iehovà

vaho tsy mihalaly ama’eo. 7 Mianjiña am-piatrefa’ Iehovà, Talè;

fa antitotse ty andro’ Iehovà,

fa nihentseñe fisoroñañe

jabajaba t’Iehovà,

vaho hene tinendre’e o hambarà’eo. 8 Aa ie tondroke ty androm-pisoroña’

Iehovà, le ho liloveko o roandriañeo,

naho o ana-donakeo, vaho ze ondaty

misikin-damban’ambahiny iaby. 9 Amy andro zay ka, le ho fonga lafaeko

o mitsamboan-tokonañe

naho mampikobake ty anjomban-

talè’e am-pikatramoañe

vaho am-pamañahiañeo. 10 Ie amy andro zay, hoe t’Iehovà:

Inay ty kaikaike boak’an-dalam-beim-pìañe ao,

naho ty fangololoihañe

amy efetse faharoey;

vaho fandrihindrihiñañe am-bohitse ey. 11 Mangoihoìa ry mpimone’ i Maktese‡,

fa mibalake iaby o mpanao balikeo,

fa naito iaby o niragorago volafotio. 12 Ie amy andro zay, le ho kodebèko

am-pailo t’Ierosalaime;

le ho liloveko ondaty miagarègañeo,

ie manao ty hoe:

Tsy hanao soa t’Iehovà,

mbore tsy hanao raty. 13 Le ho kopaheñe o vara’eo,

naho hangoakoake o akiba’eo;

eka, handrafetse anjomba iereo

fe tsy himoneña’e,

hambole tanem-bahe

f’ie tsy hinoñe amy divai’e. 14 Toe an-titotse ty andro

ra’elahi’ Iehovà,

mitotoke vaho mihitrike,

ty feo mafaitse ty andro’ Iehovà,

ty hampangoihoy i fanalolahiy. 15 Andron-kaviñerañe i andro zay,

andro kankàñe naho faloviloviañe,

andro famaopaohañe

naho fampikoahañe,

andron-kamoromoroñañe

naho migoboñe, andro milodolodo

vaho ieñe mangeoñe, 16 Andro’ i antsivay naho ty hazolava,

amo rova fatratseo

naho amo fijilovañ’ aboo. 17 Hampalovilovieko ondatio,

hijimenjimeña’e hoe goa,

amy te nandilatse am’ Iehovà;

hikararàke hoe deboke ty lio’ iareo,

naho hoe forompotse o nofo’eo. 18 Tsy haharombake iareo

ty volafoti’ iareo ndra ty volamena,

amy andron-kaviñera’ Iehovày,

fonga ho forototoe’ ty afom-pamarahia’e

ty tane toy;

toe hampijadoñe’e figadoñañe,

eka, figadoñan-kankàñe,

amo mpimoneñe an-tane atoio.

*1:1 Tsefanià: Iehovà ro fitsolohako

†1:1 Gedalià: I Andrianañahare ro engeko

‡1:1 Amarià: hoe t’Iehovà; havañona’ Iehovà

§1:1 Kizkià: haozara’ Iehovà

*1:1 Iosià: ty afo’ Iehovà; ty fampijangaña’e

†1:5 Malkame: ty samposampo’ o nte-Amoneo

‡1:11 Maktese: leoñe; goledoñe laleke

DRAFT VERSION