1 Haitoañe aniany, tsy amañ’aoly,

ty gan-katoke beteke endahañe.

2 Ie miraorao o vantañeo,

mirebeke ondatio,

fa ie mifehe ty lo-tsereke,

miñeoñeoñe ondatio.

3 Mahaehak’ an-drae

t’indaty mikoko hihitse,

fe mampianto vara

ty mpiaman-tsimirirañe.

4 Ampijadoña’ i mpanjakay an-katò

ty tane’e,

fe mihotrake t’ie mandrambe vokàñe.

5 Mandafike harato ho am-pandia’e eo

t’indaty mitsiriry rañetse.

6 Fiolàñe ty mamandrike i lo-tserekey,

fe misabo naho mirebeke ty mahity.

7 Haoñe’ ty vantañe ty zo’ o rarakeo,

fe tsy apota’ i lo-tserekey

i hilala zay.

8 Mamofotse ty rova,

ondaty mañivañivao,

fe mampivio-kabosehañe o mahihitseo.

9 Ie mifandietse ami’ty dagola

ty mahihitse,

le ifanampea’ ty filoroloroañe naho fanivetiveañe tsy mijihetse.

10 Heje’ o mpampiori-dioo ty vañoñe;

le i vantañey, paia’ iareo ty fiai’e.

11 Fonga abora’ i dagolay ty tro’e,

fe kalaña’ i mahihitsey

am-pianjiñañe ao ty aze.

12 Ie mañaom-bande ty mpifehe,

miha raty iaby o roandria’eo.

13 Ty fihambaña’ i rarakey

naho o mpamorekekeo:

Iehovà ty mañazava

ty fihaino’ i roe rey.

14 Ie mizaka o rarakeo an-kahiti’e

ty mpanjaka,

le hijadoñe kitro añ’afe’e i fiambesa’ey.

15 Mpanolo-hihitse ty kobay

naho ty endake,

fe manalatse rene

ty anake manao tsidaredare.

16 Ie mionjoñe o tsivokatseo,

mitombo ty fiolàñe,

fe ho sambae’ i vañoñey

ty fifotsaha’ iareo.

17 Lilovo ty ana’o, le hampanintsiña’e,

vaho hampinembanembae’e ty arofo’o.

18 Ie po-aroñarom-pitokiañe,

le hahifi’ ondatio añe

ty filieram-batañe,

haha ka ze mahatan-Kàke.

19 Tsy mahafanoro ty ondevo

t’ie saontsieñe avao,

ndra te azo’e tsy haoñe’e.

20 Inao t’indaty taentaeneñe

am-pisaontsi’e,

bey fitamàñe ty dagola te ama’e.

21 I mañaonkaom-pitoroñe

boak’amy faha-ajaja’eiy,

ro hanjo aze mpandova am-para’e.

22 Mpitrobo fitribahañe ty boseke,

vaho lako fiolàñe ty mpidabadoa.

23 Mamotsake ondaty ty habohaboha’e,

fe asiñeñe ty mpireke añ’arofo.

24 Malaim-batañe ty mpireketse

ami’ty mpampikametse,

tsanoña’e i sisìy, f’ie tsy mitalily.

25 Miafara ho fandrike

ty fihembañañe ama’ ondaty;

fe honjoneñe ty miato am’ Iehovà.

26 Maro ty mipay ty fañisoham-pifehe,

fa Iehovà ro ahazoa’ t’indaty to.

27 Tiva amo vañoñeo t’indaty tsy to;

fe veta amy lo-tserekey

ty vantañe am-pañaveloa’e.