2
1 Aa naho eo ty fañosihañe amy Norizañey, ke eo ty fañohòañe an-koko, ke eo ty fitraofan-kina amy Arofoy, he eo ty halèm-po naho fiferenaiñañe, 2 le henefo’ ty haehako am-piharoan-drehake naho am-pikokoañe raike vaho mifampipiteha arofo naho fivetsevetse. 3 Ko manao inoñe am-patitiañe naho firengeañe kòake, fe mifampiasia an-trentram-po; 4 Ko sindre mañambeñe o azeo avao, fe ampiraoraò ondatio. 5 Itsakoreo an-troke ao i tam’ Iesoà Norizañeiy, te
6 Ie nihambam-bintañ’ aman’ Añahare,
tsy naereñere’e te hitavane
ty fihambañañe aman’ Añahare,
7 fe finao’e ty fañòva’e,
le nandrambe ty vinta' ondaty,
vaho nampihambañeñe ami'ty mpitoroñe.
8 Ie tendreke te hambam-bintañe ama’ ondaty, le nirè-batañe,
nivohotse an-kavilasy—
eka navetrake amy hatae ajaley!
9 Toly ndra nonjonen’ Añahare,
vaho tinolo’e ty tahinañe ambone’ ze kila añarañe,
10 soa te hitongaleke amy Iesoà
ze kila ongotse
an-dikerañe añe
naho an-tane atoy
vaho ambane’ tane ao,
11 vaho hiantoke
te Iesoà Norizañe ro Talè ze hene fameleke
handrenge an’Andrianañahare Rae.* Ies 45:23
12 Ie amy zao, ry rañetseo, ie mivohotse nainai’e, tsy ami’ty fiatrefako avao, fa àntsake henane te tsy eo, le mifanehafa ami’ty fandrombahañe anahareo, am-pañeveñañe naho fineveneverañe† Sab 2:11; 13 toe mitoloñe ama’ areo t’i Andrianañahare hilozoha’areo toloñe amy ze satri’e soa. 14 Hene ano, tsy miñeoñeoñe tsy mandietse,
15 soa tsy hanan-kakeo, tsy hanan-tahiñe, fa ho anan’ Añahare tsy aman-kandra añivo’ ty tariratse mengoke naho miola toy‡ Its 32:5, mipelatse hoe failo ami’ty voatse toy, 16 mivontititse amy tsaran-kaveloñey, hampirebeke ahy an-tsa’ i Norizañey t’ie tsy nilay tsi-vente’e vaho tsy nilesa te nifanehake. 17 Eka, ndra t’ie ampidoañeñe hoe ènga-rano ami’ty fisoroñañe naho fitoloñañe amo fatokisa’ areoo, le mbe mifale naho mitrao-pirebeke ama’ areo iaby. 18 Aa le mifalea ka vaho miharoa firebeke amako.
ty Amy Timoty
19 Misalala am’ Iesoà Talè ao raho, te hampihitrifeñe mb’ama’ areo mb’eo aniany t’i Timoty, hampanitsiñe ahy t’ie mitsanoñe ty ama’areo. 20 Fa tsy amako ty mañirinkiriñe aze ami’ty fahimbaña’e miatrake anahareo, 21 toe mipay ty aze avao i maroy, fa tsy ty a’ Iesoà Norizañey. 22 Fohi’ areo ty namentea’e vatañe, ie hoe anake aman-drae’e te nitraoke amako amy fitoroñañe i talili-soaiy. 23 Aa le salalaeko ty hañitrike aze aniany naho fa fantako ty amako. 24 Le iantofako amy Talè te homb’eo aniany ka raho.
Ty Amy Epafrodito
25 Toe sinafiriko ty hampihitrike i Epafrodito rahalahiko mb’ama’ areo mb’eo, mpifanehake naho lahindefo mpiamako, ie toe ìra’ areo naho mpiatrak’ ahiko, 26 ie nijagobo ty ama’areo, naho nalovilovy te jinanji’ areo ty amy fatindri’ey. 27 Toe niheta’e re ho nivetrake, fe niferenaiñan’ Añahare, le tsy ie avao fa zaho, hera ho nanahelo an-kontoke. 28 Aa le nihavoa raho te nampolieñe ama’areo, soa t’ie isa’ areo indraike ro handia taroba, vaho hampanintsiñe ahy ka. 29 Aa le rambeso amy Talè an-kaehake vaho onjono ondaty hoe zaio; 30 amy te ho nametrake aze i fitoloña’e amy Norizañeiy, ie namoy-ay hañeneke i tsy nilefe’ areo amy fiatrahañe ahikoy.
DRAFT VERSION