3
1 Songa namantañañe ty sa’e,
Sindre namotoañañ’ andro
ze nisatrie’e ambanen-dikerañe atoa:
2 androm-pisamahañe,
androm-pihomahañe,
androm-pamboleañe naho
androm-pañombotañe i namboleñey;
3 androm-pamonoañe,
naho androm-pañamelañañe;
androm-pandrebahañe mañambane
naho androm-pandranjiañe mañambone;
4 androm-pirovetañe,
naho androm-piankahafañe;
androm-pangololoihañe
naho androm-pitsinjahañe;
5 androm-pañiririñam-bato,
naho androm-panontonam-bato;
androm-pamejañañe naho
androm-pifoneñañe tsy hamejañe;
6 androm-pikodebeañe,
naho androm-pahamotsoañe;
androm-pañajañe
naho androm-pañariañe;
7 androm-pandrovitañe,
naho androm-panjairañe;
androm-pianjiñañe,
naho androm-pisaontsiañe;
8 androm-pikokoañe
naho androm-pihejeañe;
androm-pialiañe vaho androm-panintsiñañe.
9 Ino ty tambem-pieke amy nitromaha’ey? 10 Fa nitreako ty tolon-draha’ natolon’ Añahare amo ana’ ondatio, hitoloñañe. 11 Kila nanoe’e mañeva ty sa’e; vaho napo’e an-tro’e ao ty atao nainai’e donia, fe tsy ho taka’ ondaty ty fitsikarahañe ty satan’ Añahare boak’ am-baloha’e pak’am-pigadoña’e.
12 Apotako te tsy eo ty mahasoa ta t’ie hifale naho hinembanembañe naho mbe amañ’aiñe; 13 mbore falalàn’ Añahare te songa hikama naho hinoñe vaho hifale amo fitoloña’eo ondatio.
14 Fantako te tsy modo nainai’e
ze anoen’ Añahare;
tsy mete tompeañe vaho
tsy mete angalañe;
nanoen’Añahare zao,
hañeveña’ ondatio añatrefa’e eo.
15 Ze eo, le fa teo;
naho mbe ho avy ze fa teo;
vaho tsoehen’Añahare o horidañeñeo.
16 Mbore nizoeko ambane’ i àndroy,
amy toem-pizakañey
te eo ka ty haratiañe,
vaho amy toen-kavantañañey
ty haloloañe.
17 Hoe raho an-troko ao,
ho zakaen’ Añahare
ty vañoñe naho ty raty,
fa kila namotoaña’e ze safiry
naho ze hene fitoloñañe.
18 Hoe raho an-troko ao
ty amo ana’ondatio:
Mitsoke iareo t’i Andrianañahare
hahaoniña’ iareo te biby avao.
19 Hambañe ty toli’ondaty
naho ty toli’ o bibio;
Manahake ty fihomaha’ ty raike
ty hiantantirira’ ty ila’e.
Hambañe avao ty fikofò’ iareo,
aa le tsy aman-tombo’e amo bibio
t’indaty; toe fonga hakoahañe.
20 Fonga homb’an-toetse raike:
sindre boak’an-debok’ ao vaho
songa mibalike mb’an-debok’ ao.
21 Ia ty mahafohiñe ke
hañambone ty arofo’ ondaty he
hañambane mb’an-tane ao ty tro’ o bibio?
22 Aa le nitreako te tsy eo ty mahasoa
ta te hene mifale amo fitoloña’eo ondatio,
ie tambe’ iareo;
fa ia ty hampandrendrek’ aze
te inoñe ty hanonjohy añe?
DRAFT VERSION