Fobitro Injil Shorif 25 nombor sifara
tisra Hannan
Forisiti
Alla Pakor hukume Hozrot Isa al-Mosir sahabi Hozrot Hannane (ra:) siṭir aḳare ou sohifa leḳsoin. Leḳar ḳalo tan nam na ḳoia ḳali ‘hou murobbi’ ḳoia forisoe disoin. Hozrot Isae dunia taki behesto toshrif neoar onuman 50–60 bosor bade ikan leḳa oise. Ikan oilo tan leḳa tin nombor siṭi, asta Injil shorifor maze hoḳol taki huru sifara.
I sohifaḳan Gous namor eḳzon mumin bair gese leḳsoin, ou baie kub memandari ḳorta, tain eḳzon fakka imandar asla. Ar Ditrif name ek kobis beṭa asil, he netagiri ḳoria zomatre doḳol ḳorto saise, leḳoke tar birudde hushiari disoin.
Ou sifarar 11 aeato ase, “Ze manshe nek kam ḳore he oilo Allar bonda, ar zegie bod ḳam ḳore, he to Allar doroshon faise na.”
Ermaze ase,
(1) Hozrot Gousre salam ar tarif 1:1–8 aeat
(2) Bonḍo Ditrifor netagiri ar Dimitri bair shunam 1:9–12
(3) Bidaei salam 1:13–15
1
Hozrot Gousre salam ar tarif
1 Allai hokor ḳatire ami zare mohobbot ḳori, amar maear dust Gousor gese, ami hou murobbie ita leḳram.
2 O maear dust, ami dua ḳoriar tumar hokkolta zanu shoṭik babe sole, aro saiar tumar dil zela bala tumar shoril-gotro zanu ola bala taḳe. 3 Tumar oḳan taki ḳoezon mumin bai aia ḳoila, Allai hokor befare tumi bule mozbut aso, ikan hunia ami kub kushi oisi. 4 Amar aolad oḳol Allai hokor fote solra hunia kushi lager, ikan taki boṛo ar kunu kushir ḳobor oe ni?
5 O maear dust, tumar osina hou musafir baiainre zela ḳezmot ḳorso, ita to ḳaṭi muminor ḳam. 6 Tumar maea-mohobbotor ḳota tara zomator huru-boṛo hoḳolor samne ḳoise. Oḳon Allar kushi mafik tarare sohi-salamote faṭanir bebosta ḳori deo, te aro bala oibo. 7 Tara ḳali al-Mosir tobligo baroisoin, torikar baira manshor ges taki kunu shaijjo loisoin na. 8 Erlagi ou laḳan manshore shaijjo ḳora zorur, zate hok kamo amra-o shorik taki.
Bonḍo Ditrifor netagiri ar Dimitri bair shunam
9 Ami age zomator gese eḳan siṭi leḳslam, oile ḳobis Ditrife zomator netagiri ḳorto sae, erlagi he amrar ḳota hune na. 10 Oḳon he zeta ḳorer, ami aia hari ita hoḳolre zanaimu. He amrare ingsha ḳoria bout misa bodnam roṭaise. Ḳali ikan nae, mumin kunu baire he maner na, ar oinno zera manto sae, tarareo bada der, emonki zomat taki bar ḳori der.
11 O maear dust, tumi bod ḳamor ḳoredi na douṛaia borong nek kam ḳoro. Ze manshe nek kam ḳore he oilo Allar bonda, ar zegie bod ḳam ḳore, he to Allar doroshon faise na. 12 Zano ni, hoḳoleu Dimitri bair shunam gaira, emonki shoeong Allar hokeo en tarif ḳorra. Amra-o en tarif ḳorram, ar tumi to zano, amrar mukor ḳota hasa.
Bidaei salam
13 Baire, tumar gese leḳar boutta asil, oile ḳolome-ḳalie hoḳolta leḳram na. 14 Asha ase, kub zoldi tumar loge deḳa-shakkat oibo, ou shomoe mukamuki hoḳolta gof ḳormu. 15 Tumar dust oḳoleo tumare salam zanaisoin. Amrar hoḳol bondu-bandobre salam zanaio. Assalamu alaikum.