1 لْشْي ندٍ سَمِسٌن نَشَ سِفَ تِمِنَ. مّننِ عَ نَشَ سُنفبُتُنيِ قِلِسِتَكَ ندٍ تٌ. 2 عَ تٌ فبِلٍن عَ بَبَ شْنيِ، عَ نَشَ عَ قَلَ عَ بَبَ نُن عَ نفَ بّ، «ﭑ بَرَ قِلِسِتَكَ سُنفبُتُنيِ ندٍ تٌ تِمِنَ. وٌ شَ نَ قٍن ﭑ بّ عَ شَ قِندِ ﭑ مَ فِنّ رَ.» 3 عَ بَبَ نُن عَ نفَ نَشَ عَ قَلَ عَ بّ، «مُنقٍ رَ عِ مُ فِنّ قٍن عِ نفَشَكٍرٍنيِيٍ يَ مَ، شَ نَ مُ عَ رَ وٌن بْنسْي يَ مَ؟ نَ مُ قِسَ قِلِسِتَكَ ندٍ بّ، نَ حَمَ سُننَتَرٍ؟» سَمِسٌن نَشَ عَ بَبَ يَابِ، «نَ قٍن ﭑ بّ. عَ تَن نَن نَقَن ﭑ مَ.» 4 عَ بَبَ نُن عَ نفَ مُ نُ عَ كٌلٌن نَ بِرِن كٍلِشِ عَلَتَلَ نَن مَ. عَ نُ نَ فٍرٍ قٍنقٍ قِلِسِتَكَيٍ رَ، بَرِ مَ نَ وَشَتِ عٍ نُ نَ عِسِرَيِلَكَيٍ يَمَرِقٍ.

5 سَمِسٌن نُن عَ بَبَ نُن عَ نفَ نَشَ فٌرٌ تِمِنَ. عٍ تٌ وّنِ بِلِيٍ يِرٍ لِ، يّتّ ندٍ نَشَ مِنِ سَمِسٌن مَ، عَ شَ عَ قَشَ. 6 عَلَتَلَ شَشِلِ نَشَ فٌرٌ عَ مَ عَلَكٌ عَ شَ نْ يّتّ عِبْودٍ عَ بّلّشّ رَ عَلْ سِ يْرّ، هَلِ فٍرٍ سٌسٍ يٌ تٌ مُ نُ نَ عَ يِ رَ. عَ مُ نَ قٍ قَلَ عَ بَبَ نُن عَ نفَ بّ. 7 عٍ نَشَ سِفَ وْيّندٍ نَ سُنفبُتُنيِ رَ، نَشَن بَرَ رَقَن سَمِسٌن مَ كِ قَنيِ.

8 نَ بِيَاسِ دَنفِ شَنبِ، سَمِسٌن نَشَ فبِلٍن تِمِنَ نَ سُنفبُتُنيِ يِرٍ، عَ شَ عَ قِندِ عَ شَ فِنّ رَ. بٍينُن عَ شَ عَ لِ، عَ نَشَ مِنِ كِرَ رَ، عَلَكٌ عَ شَ نَ يّتّ بِنبِنيِ مَتٌ. عَ نَشَ كُمِ تّي لِ نَا، عٍ تُرٍ نَ يّتّ شْرِيٍ لٌنفٌرِ رَ. 9 عَ نَشَ ندٍ تٌنفٌ عَ بّلّشّ رَ، عَ شَ عَ كْن كِرَ شْن مَ. عَ تٌ فبِلٍن عَ بَرِ مِشِيٍ يِرٍ، عَ نَشَ ندٍ قِ نٍيٍ قَن مَ. عٍ نَشَ عَ كْن، كْنْ سَمِسٌن مُ عَ قَلَ عٍ بّ نَ كُمِ كٍلِشِ دّننَشّ.

10 سَمِسٌن بَبَ قَن نَشَ فٌرٌ نَ سُنفبُتُنيِ شْنيِ. نَ تّمُي سَمِسٌن نَشَ شُلُنيِ تِ نَا، عَلْ سّفّتَلَيٍ دَرِشِ عَ رَ كِ نَشّ. 11 نَ سُنفبُتُنيِ شَ مِشِيٍ تٌ سَمِسٌن تٌ، عٍ نَشَ مِشِ تٌنفٌ سَشَن شِلِ نَشَن لُمَ عَ سّيتِ مَ. 12 سَمِسٌن نَشَ عَ قَلَ عٍ بّ، «ﭑ شَ تَالِ ندٍ سَ وٌ بُن مَ. شَ وٌ نْ نَ تَفِ رَبَدٍ ﭑ بّ بٍينُ يِ شُلُنيِ شِ سٌلٌقٍرٍ شَ بَ عَ رَ، ﭑ دٌنمَ نُن دُفِ تٌنفٌ سَشَن قِمَ وٌ مَ. 13 كْنْ شَ وٌ مُ نْ ﭑ مَ تَالِ تَفِ رَبَدٍ ﭑ بّ، وٌ كٍرٍن كٍرٍن مَ بِرِن دٌنمَ نُن دُفِ تٌقَنيِ قِمَ ﭑ تَن نَن مَ.» عٍ نَشَ عَ قَلَ عَ بّ، «عَوَ يِرٍ، عِ شَ تَالِ قَلَ. مُشُ مُشُ تُلِ مَتِشِ عِ رَ.» 14 نَ كُي عَ نَشَ تَالِ ندٍ قَلَ عٍ بّ، «نَشَن سٍ دٌنمَ، عَ دٌنسٍ رَ مِنِمَ. سٍ حْشُنمّ كٍلِشِ سّنبّمَ نَن مَ.» عٍ نَشَ نَ تَالِ قٍن شِ سَشَن بُن مَ، كْنْ عٍ مُ نْ نَ كٌلٌندٍ.

15 عَ شِ نَانِ ندٍ، عٍ نَشَ عَ قَلَ سَمِسٌن شَ فِنّ بّ، «وْيّن عِ شَ مْرِ بّ عَلَكٌ عَ شَ نَ تَالِ تَفِ رَبَ مُشُ بّ، شَ نَ مُ عَ رَ مُشُ قَمَ عِ تَن نُن عِ بَبَ شَ دٍنبَيَ فَندٍ. عَ مُ لَنمَ وٌ شَ مُشُ شِلِ بٍ، وٌ شَ قَ مُشُ مُحَ.»

16 سَمِسٌن شَ فِنّ نَشَ وَ قْلْ عَ شَ مْرِ يَ عِ، عَ عَ قَلَ عَ بّ، «ﭑ مُ رَقَن عِ مَ. عِ بَرَ ﭑ شْن، شَ نَ مُ عَ رَ عِ نَ تَالِ تَفِ رَبَمَ نّ ﭑ بّ نُ.» عَ نَشَ عَ يَابِ، «ﭑ مُ نَشَن قَلَ ﭑ نفَ نُن ﭑ بَبَ بّ، ﭑ نَ قَلَمَ عِ تَن نَن بّ؟» 17 نَ فِنّ نَشَ وَ سَمِسٌن يَ عِ شِ سٌلٌقٍرٍ بُن مَ، نَ شُلُنيِ تّمُي. شُلُنيِ لْشْي دْنشْي عَ نَشَ نَ تَالِ تَفِ رَبَ عَ شَ فِنّ بّ، بَرِ مَ عَ نُ نَ عَ تْورْقٍ تُن. نَ تّمُي نَ فِنّ نَشَ نَ تَالِ تَفِ رَبَ عَ شَ مِشِيٍ بّ.

18 بٍينُن سٌفٍ دُلَ تّمُي شِ سٌلٌقٍرٍ ندٍ، تَاكَيٍ نَشَ سَمِسٌن شَ تَالِ قَسَرِ عَ بّ يِ مَشْرِنيِ رَ، «مُنسٍ حْشُن كُمِ بّ، مُنسٍ سّنبّ فبٌ يّتّ بّ؟» سَمِسٌن نَشَ عٍ يَابِ، «شَ وٌ مُ ﭑ مَ فِنّ مَقُرُكُ نُ، وٌ مُ نْمَ ﭑ مَ تَالِ كُي كٌلٌندٍ قٍوٌ.»

19 نَ دَنفِ شَنبِ، عَلَتَلَ شَشِلِ نَشَ فٌرٌ سَمِسٌن مَ. عَ نَشَ سِفَ عَسِكَلْن، عَ شّمّ تٌنفٌ سَشَن قَشَ، عَ عٍ شَ دٌنمَيٍ نُن دُفِيٍ تٌنفٌ، عَ نٍيٍ قِ مِشِيٍ مَ نَشٍيٍ نُ بَرَ نَ تَالِ تَفِ رَبَ عَ بّ. نَ تّمُي سَمِسٌن نَشَ فبِلٍن عَ بَبَ شْنيِ، عَ شْنْشِ عَ حَاشِ رَ. 20 نَ كُي قِلِسِتَكَيٍ نَشَ سَمِسٌن شَ فِنّ قِ شّمّ فبّتّ مَ، شُلُنيِ بِنيّ قِشِ نَشَن مَ.