2 मिनु परमप्रभु यावे, इन परमप्रभुमी इन कली गेशो सहरमी सुइ वोंइश मुर मीश मुरुमी परमप्रभु यावे, इन परमप्रभु आ ङोंइती मरिम्‍शो पा आ कबल कली प्रोंइशा, ब्‍यवस्‍था १३:७-१२ 3 मेकोपुकीमी देवी देवता खोइश्‍शा, मेको आन कली ठेयब सेल्‍शा, नां, तास्‍ला, सोरुल आन ङोंइती बाप्‍शा गोम ‘मपन देंशो’ पाम्‍तेक्‍म हना, ब्‍यवस्‍था ४:१९ 4 मिनु मुरपुकीम मेको आन पर्बम इन कली शेंताक्‍म हना, गेपुकीम रिम्‍शो पा खोदील निदील पा हिल्‍लो पचा माल्‍नीनी। मिनु मेको थमा पा इन इस्राएलमी मोदेंशो ग्रांग्रा दिचा ङा गेय पशो बाक्‍त हना, 5 मेको मोदेंशो ग्रांग्रा पाइब वोंइश मुर हना यो, मीश मुर हना यो इन सहर रे ग्रुंइशा, फुल्‍लु आप्‍शा साइक्‍चा माल्‍नीनी। लेवी २४:१४ 6 साइक्‍चा पुंइसीब आन पर्बम मुर निक्‍शी नु सांमी ‘गो ताता, सांकछी दुम्‍ती’ देंतेक्‍म हना, ला साइक्‍चा दुम्‍ब। का ला सांकछी बाक्‍त हना साइक्‍चा मदुम्‍ब। ब्‍यवस्‍था १९:१५; १राजा २१:१०; हिब्रू १०:२८ 7 मेको आन पशो ताइब सांकछीपुकीमी नेल्‍ल क्‍येङा ङोंइती मेको आन कली साइक्‍चा, दे फुल्‍लु आप्‍चा माल्‍ब। मेको नोले ला नेल्‍ल अरुम पचा माल्‍नीम। मिनु मोपा गेपुकीमी मरिम्‍शो नेल्‍ल इन दाते रे ग्रुंइचा माल्‍नीनी।

8 मिनु इन सहरम मुर साइक्‍तीके, रू योक्‍तीके, तुम्‍मुतीके नु मारेइ मारेइ मचाप्‍चा ङा निसाफ बाक्‍त हना, इन सहर रे परमप्रभु यावे, इन परमप्रभु आ योव़शो बाक्‍तीकेम लचा माल्‍नीनी। 9 मिनु गेपुकी चढ़ेब, लेवी आ थर ङा मुर नु मेना गेय पाइब निसाफ पाइब कली ‘मार पचा’ दे हिल्‍लो पचा कली ग्रुम्‍थ लचा माल्‍नीनी। मेकोमी इन कली दोपा निसाफ पचा शेंनीम। २इतिहास १९:८,११ 10 मिनु परमप्रभु यावे आ योव़शो बाक्‍तीकेमी मेकोपुकीमी इन कली मार देंनीम, मेको मोदेंशो पा ठीक पा निसाफ पचा माल्‍नीनी। मिनु इन कली दोपा शेंदमे, मोपा होस पा पचा माल्‍नीनी। 11 मेको इन कली शेंशा अरेशो लोव़ नु निसाफ पतीके गे पचा माल्‍नीनी। मेको लोव़ नेंशा, ग्‍युरा नु पेरा गे मलने। 12 सुइम ठेयब लेश्‍शा, परमप्रभु यावे, इन परमप्रभु आ गेय पचा कली वोइश्‍शो चढ़ेब, निसाफ पाइब आन लोव़ मटिप्‍तु हना, मेको साइक्‍चा पुंइसीब। मिनु मोपा गेपुकीमी इस्राएली, इन दाते रे मरिम्‍शो नेल्‍ल ग्रुंइचा माल्‍नीनी। 13 मिनु मुर नेल्‍लेमी मेको नेंशा हिंशा मोदेंशो मपाइक्‍नीम।

14 मिनु गेपुकी परमप्रभु यावे, इन परमप्रभुमी इन कली गेशो रागी जाक्‍दीश्‍शा, इन के सेल्‍शा बाक्‍नीनु, गेपुकीमी ‘एर ओंथ ङा रागी रागी खोदेंशो पा आंइ कली यो पिप का वोइक्‍चा माल्‍नीक’ देंतीनी हना, १सामुएल ८:५-९ 15 परमप्रभु यावे, इन परमप्रभुमी योव़शो मुर कली ला वोइक्‍चा दुम्‍ब। इन लोक्‍ब आन दाते रे योव़शा पिप वोइक्‍चा माल्‍नीनी। अर्को जात ङा मुर पिप सेल्‍चा मदुम्‍ब, इन लोक्‍ब कली ला सेल्‍चा माल्‍ब। 16 मेकोमी शुश शारा आंम कली मवोदल। मिनु मेकोमी शारा ग्‍याप्‍चा कली मुर आन कली इजीप्‍त मसोइक्‍तल। मारदे हना परमप्रभु यावेमी ‘मेको लां गेनायो लेश्‍शा मलने’ देंत। १राजा १०:२६-२९ 17 मिनु परमप्रभु यावे रे ङोन मलल, दे मीश मुर शुश चाक्‍चा मदुम्‍ब। मिनु मेकोम आंम कली शुश सुन चांदी मखुप्‍तल। १राजा ११:१-८; १राजा १०:१४ 18 मिनु मेको पिपमी सासन पवानु, चढ़ेब, लेवी आ थर ङा मुर आन किताब रे परमप्रभु यावे आ अरेशा लोव़ किताब काम ब्रेक्‍चा माल्‍ब। 19 मेको लोव़ मेको नु बाक्‍चा माल्‍ब। मिनु मेकोमी परमप्रभु यावे, आ परमप्रभु कली मान पा हिंचा कली शेंसीचा कली मबेक्‍म सम्‍म नाक्‍त किंत किंत पढेचा माल्‍ब। मेको अरेशो लोव़ नेल्‍ल नु फुल्‍लुम मुशा ब्रेक्‍शो लोव़ होस पा पचा माल्‍ब। 20 मेकोमी आंम लोक्‍ब आन दा‍तेमी आंम कली ठेयब मसुदल। परमप्रभु यावे आ शेंशो लोव़ रे ङोन मलल। ग्‍युरा पेरा गे मलल। मिनु आं तौ चचपुकीमी इस्राएल ङा राज्‍य कली शुश नाक्‍ती सम्‍म सासन पामेक्‍ल” देंत। ब्‍यवस्‍था ५:२९