1 रामाथाइम-सोफीम रे जाक्‍शो मुर का बाक्‍माक्‍त। मेको एफ्राइम ङा पहाड ङा सुफ आ खिं ङा बाक्‍माक्‍त। मेको आ नें एल्‍काना बाक्‍माक्‍त। एल्‍काना येरोहाम आ तौ, एलीहु आ चच बाक्‍माक्‍त। मेको आ शेर बाजे तोहु नु आ किकी बाजे जूफ माइश्‍शो एफ्राइम थर ङा बाक्‍माक्‍त। १इतिहास ६:१; १इतिहास १२:१९-२० 2 एल्‍काना के मीश निक्‍शी बाक्‍सा बाक्‍त। का आ नें हान्‍नाह नु अर्को आ नें पेनी‍नाह बाक्‍माक्‍त। पेनी‍नाह के आल बाक्‍मा बाक्‍त, तन्‍न हान्‍नाह के आल मबाक्‍माक्‍त। उत्‍पत्ती २९:३१ 3 एल्‍काना बर्स बर्सम आ सहर रे शिलो लाइबाक्‍माक्‍त। मेकेर मुर नेल्‍ल आन परमप्रभु यावे कली ठेयब सेल्‍शा, चढ़ेतीक चढ़ेचा कली लाइबाक्‍माक्‍त। मिनु मेकेर चढ़ेब एली आ तौ निक्‍शी होफ्‍नी नु फिनेहास बाक्‍सा बाक्‍त। मेको परमप्रभु यावे कली चढ़ेब बाक्‍सा बाक्‍त। यहोसु १८:१ 4 मिनु एल्‍कानाम चढ़ेशो नाक्‍ती आ मीश पेनी‍नाह आ तमी तौ नेल्‍ल आन कली चढ़ेशो थोव़क गेबाक्‍माक्‍त। 5 मिनु हान्‍नाह कली निक्‍शी भाग खोइ गेबाक्‍माक्‍त। मारदे हना एल्‍कानाम हान्‍नाह कली शुश दाक्‍बाक्‍माक्‍त। तन्‍न परमप्रभु यावेमी हान्‍नाह कली आल मथीब सेल्‍शो बाक्‍माक्‍त। 6 हान्‍नाह के आल मबाक्‍तीके आ सौतामी मेको कली आ थुं शुश खाइक्‍पाइश्‍शा, तोक्‍शा लोव़ पाइक्‍बाक्‍माक्‍त। मारदे हना परमप्रभु यावेमी हान्‍नाह कली आल मथीब सेल्‍शो बाक्‍माक्‍त। 7 मोपा एल्‍कानामी बर्स बर्सम परमप्रभु यावे कली चढ़ेथ लमेनु, आ सौतामी हान्‍नाह कली श्‍येत गेस ङा गेस पतीके हान्‍नाह ङाक्‍शा, मारेइ मजवा मब्‍ववा बाक्‍त। 8 मिनु आ वोंइश एल्‍कानामी मेको कली “हान्‍नाह, गे मारदे ङाक्‍स ङा ङाक्‍स बाक्‍ङे? मारदे मजवी मब्‍ववी? गे मारदे इ थुं खाइक्‍पाइक्‍नेवे? मार, गो इ कली १० जना तौ आन क्‍येङा यो शुश दाक्‍ब मनङा ङा?” देंमाक्‍त।

9 मिनु काले शिलोमी जने तूने थुम्‍मे नोले हान्‍नाह बोक्‍माक्‍त। मिनु परमप्रभु यावे आ ङोंइती लशा राम्‍माक्‍त। मेना चढ़ेब एली परमप्रभु यावे आ ताम्‍बु आ ओव़तीक नेक्‍था आ नित्‍तीकेम निश्‍शो बाक्‍माक्‍त। 10 मिनु हान्‍नाह आ थुं शुश खाइश्‍शा, ङाक्‍शा, परमप्रभु यावे कली पुना बाक्‍त। 11 मिनु मेकोमी कबल पा “मुर नेल्‍ल आन परमप्रभु यावे, गे इन वाइलीम, आं श्‍येत तशा, आं कली मिम्‍शा, मप्रेंताक्‍नी हना, आं कली तौ का गेयीनी। गो मेको कली मबेक्‍म सम्‍म परमप्रभु यावे, इन कली जिम्‍मा गेनुङ। मेको आ चां गेनायो मप्रेक्‍सीब मेकोम गेनायो अङगुर शांबु मतूब” दे कबल पवा बाक्‍त। आमोस २:११; न्‍यायाधीस १३:५ 12 मिनु मेकोमी परमप्रभु यावे आ ङोंइती पुंइस ङा पुंइस बाक्‍मेनु, एलीम मेको आ शोव़ हिक्‍शो कोव़शा बाक्‍माक्‍त। 13 हान्‍नाहमी आ थुंम ला पुंइशो बाक्‍माक्‍त। मिनु आ शोव़ हिक्‍साक्‍व हना यो, आ सेंदा मग्रूमाक्‍त। मिनु एलीम मेको कली दुक्‍शो मीश मुर का बाक्‍त, दे मिम्‍ता बाक्‍त। 14 मिनु एलीमी मेको कली “गे गेना सम्‍म मोपा दुक्‍शा बाक्‍नेवे? अङगुर शांबु तूचा प्रोनो” दे मदा बाक्‍त। 15 मिनु हान्‍नाहमी “आं प्रभु, गो थुं खाइश्‍शो मीश मुर का बाक्‍नुङ। गो मारेइ अङगुर शांबु मतूङु। गो परमप्रभु यावे आ ङोंइती आं थुं ङा श्‍येत नेल्‍ल शोव़ता। 16 आं कली मरिम्‍शो मीश मुर मसुइय्‍यीनी। आं थुं खाइक्‍तीके नु शुश श्‍येत जतीके गो मुल सम्‍म पुंइस ङा पुंइसन बाक्‍ती” देंमाक्‍त। 17 मिनु एलीम “इ थुं नाइश्‍शा लावो। इस्राएली आन परमप्रभुम इ पुंइशो लोव़ गेवल” देंमाक्‍त।

18 मिनु हान्‍नाहमी “गो इन शिशी ताइब दुम्‍ङल” देंमाक्‍त। मिनु नोले मेको लशा, आ वोंइश नु जवा तूङा बाक्‍त। मिनु नोले लेंशा आ थुं मखाइक्‍माक्‍त।

19 मिनु मेकोपुकी आ दीसा सुनी कना बोक्‍शा, परमप्रभु यावे कली ठेयब सेल्‍शा, आन खिं रामाह लेम्‍मा बाक्‍त। मिनु एल्‍काना आ मीश हान्‍नाह नु इम्‍माक्‍त। मिनु परमप्रभु यावेमी हान्‍नाह कली मिम्‍ता बाक्‍त। उत्‍पत्ती ३०:२२ 20 मिनु नोले हान्‍नाहम कोव़ज कुरशा, तौ का थिमाक्‍त। मेकोमी आ नें सामुएल वोदा बाक्‍त। मारदे हना मेकोम “गो मेको परमप्रभु यावे नु पुंइशो नङ” देंमाक्‍त।

21 परमप्रभु यावे कली बर्स बर्स ङा चढ़ेतीक चढ़ेशा, आंम कबल खाप्‍चा कली एल्‍काना आ खिं ङा मुर नु इर शिलो लमाक्‍त। 22 तन्‍न हान्‍नाह चहिं मेकोपुकी नु मलमाक्‍त। मेकोमी आ वोंइश कली “आलम दूध प्रोना नोले गो एको कली परमप्रभु यावे आ बाक्‍तीक चोव़दीनुङ। मिनु एको गेना हना यो परमप्रभु यावे आ ङोंइती मेक उइ बाक्‍ब” देंमाक्‍त। 23 मिनु मेको आ वोंइश एल्‍कानामी “गे मार दाक्‍ती, मेकोन पावो। मेकोम दूध मप्रोना सम्‍म खिं उइ बाक्‍को। परमप्रभु यावेम आ पशो लोव़ कबल” देंमाक्‍त। मिनु हान्‍नाह आलम दूध मप्रोना सम्‍म खिं उइ बाक्‍शा, थुल्‍शा, मेको कली कोल्‍पदा बाक्‍त। 24 मिनु दूध प्रोना नोले मेको आल लाइश्‍शा, शिलो लमाक्‍त। मिनु मेकोमी आ नु बर्स सां ङा ब्‍यफ का, एफाह का फस नु गर का अङगुर शांबु यो इर परमप्रभु यावे आ ताम्‍बुम लदा बाक्‍त। मेना मेको आल आइक्‍चन बाक्‍माक्‍त। एफाह का २२ लिटर बाक्‍ब। मेको ५ पाथी खोदेंशो बाक्‍ब।गन्‍ती १५:३,८-११ 25 मिनु मेकोपुकीम मेको ब्‍यफ साइश्‍शा, चढ़ेमे बाक्‍त। मिनु मेको आल कली एली आ बाक्‍तीक चाक्‍दीत्‍मे बाक्‍त। 26 मिनु हान्‍नाहमी मेको कली “आं प्रभु, गे ब्रोंइशा बाक्‍शो खोदेंशो पा, गो थमा लोव़ पाइनुङ। गो परमप्रभु यावे कली पुंइशा, इन ङोंइती राप्‍शा, बाक्‍ब मीश मुर नङ। 27 गो एको वोंइश आल आ पर्बम पुंइशो नङ। मिनु परमप्रभु यावेमी आं पुंइशो गेती। 28 मोपतीके गो एको कली परमप्रभु यावे कली जिम्‍मा गेनुङ। एको ब्रोंइशा बाक्‍म सम्‍म परमप्रभु यावे कली जिम्‍मा गेंसीशो बाक्‍ब” देंमाक्‍त। मिनु मेकोपुकी यो परमप्रभु यावे आ ङोंइती बाप्‍शा, मेको कली ठेयब सेल्‍मे बाक्‍त। १सामुएल १:११