49
Jeikob i giya le ŋgaŋga ghanjimwaewo
1 Amba Jeikob i kula vathavathaŋgiya le ŋgaŋga na i dage weŋgi iŋa, “Hu roghɨliŋaŋgo na wo ya utu e ghemi nevole the bigithan i yomara e ghemi mbaŋa muyaiko.
2 Wo hu rakamena na hu vandeŋe.
Ghino ramami Isirel.
3 Rubin, ghen naruŋgu virɨviva,
ghen lo vurɨgheghe. Na naruŋgwa ghen mbaŋa vamba tabwagha vara ghino.
Ghen u mevoro moli lo ŋgaŋgake wolaghɨye e tɨnenji.
Ghen u vurɨgheghe laghɨye moli.
4 Ghen ŋgorana ŋgonuŋgo vorughala. Ko iyemaeŋge maane vole lolo laghɨye moliya ghen.
Kaiwae va u vanaŋa rama ghandiye na maa u yavwatatawana rama le ghamba ghena.
Iyake ghamba monjina laghɨye e ghino.
5 Simiyon na ghaghae Livai,
va thɨ vakaiwoŋa lenji gaithɨ ghaghalithɨ na thɨ gabowe.
6 Maane ya ru e lenji utu thuwoleko.
Maane ya metha weiŋguyaŋgi e lenji nivako.
Kaiwae lenji gatemuru e tɨne thɨ gaboŋgiya gharɨgharɨ
na thɨ vuŋgi okɨs ghegheŋji vuvuye mwadiwo kaiwae.
7 Ya naŋgo weya Loi na i gura lenji gaithɨko,
kaiwae lenji gaithɨko i maramararu moli.
Ne ya rake orumburumbunjiko
na vethɨ yayaku Jeikob orumburumbuyeŋgi e tɨnenji.
8 Juda, oghaghaeke nevole thɨ taraweŋge.
Ne u laweŋgiya ghan thɨghɨya e numonji.
Oghaghana nevole thɨ kururu e ghen.
9 Juda iye ŋgoreiya laiyon nariye.
I unɨgha ghae na i njogha e ghambae.
I vamomoya gheghe na i ghena.
Maa lolo regha valɨkaiwae i vakaravoya riwae.
10 Juda ghauu ghɨmoghɨmoruniye ne thɨ tabo kiŋ.
Na orumburumbuye tha na tha nevole mbe thɨ mbarombaro vara.
Vanautuma na vanautuma ne thɨ mwaewowe
na thɨ kururuwe na thɨ ghambu.
11 I ŋgara le doŋɨki e vaen
Na e yaŋgaeko thovuye moli i ŋgara doŋɨkiko nariyewe.
Ne i thavwiya ghakwamakwama e waen sosoro.
12 Maramarae thɨ bwedi kivwala waen,
ŋiŋiye thɨ kaleva kivwala milɨk.
13 Sebulon ne i yakuŋa njighɨ ghadidiye
na ne i tabo vwaruvwaruru thovuye waŋgawaŋga kaiwanji.
Le ghamba mbaro ne ve wo Saidon.
14 Isaka iye i vurɨgheghe ŋgoreiya doŋɨki.
Mbaŋa riwae i bane ne i ghenethɨna ghaghadoweko.
15 Mbaŋa i thuwe le ghamba towoko i thovuye,
na thelauko le thovuthovuye,
amba i vathawo wakɨyeko na i thɨna ghabigiko.
Thɨ vavurɨghegheŋa na i kaiwo ŋgoreiya rakakaiwobwaga.
16 Den ne i mbaroŋaŋgiya le gharɨgharɨ
ŋgoreiya iye wabwi regha Isirel e tɨne.
17 Den iye ŋgoreiye mwata mamate
e kamwathɨ ghadidiye.
Iya i ghara hosɨko gheghe,
na hosɨko i wokiyatho rathathako e ghereiye.
18 O Giya Loi, ya roroghagha len vamoru kaiwae.
19 Ramban bwagabwaga ne thɨ laweya Gad.
Ko iyemaeŋge Gad ne i kivwalaŋgi na i vambeleyathuŋgi.
20 Asa le thelau ne i rau na une i thovuye.
Ne i thovuye moli na valɨkaiwae i mban na kiŋ ghae.
21 Napɨtalai iye ŋgoreiya diya wevo rakerakethu i ruku.
I ghambɨŋgiya le ŋgaŋga thovuthovuye na manɨune.
22 Josep iye ŋgoreiya vaen i rau wagiyawe.
Iye ŋgoreiya vaen i ndeghathɨ e mbwarowou ghadidiye.
Iye ŋgoreiya vaen yaŋgayaŋgae i mbuthu valaŋaniye baba.
23 Ghanji thɨghɨya thɨ gaithɨwana weinji lenji ghatemuru.
Thɨ ighaighaŋa e mbwenara na kinkin.
24 Ko iyemaeŋge Josep i du wagiyawe le kinko na mbwenarako.
Nɨmanɨmaeko thɨ vurɨgheghe.
Le vurɨghegheko i wo weya Jeikob le Loi Vurɨvurɨghegheniye.
Le vurɨghegheko i wo weya Sip gharanjimbunjimbu,
iye Isirel Varɨniye.
25 Rama le Loi i thalavuŋge.
Loi Vurɨvurɨghegheniye i mwaewo e ghen.
I mwaewo e ghen e uye i njama e buruburu.
I mwaewo e ghen e mbwa i voroma e thelauke tɨne.
I mwaewo e ghen e thetheghan lemoyo na e gamagai.
26 Mwaewo i mena weya rama i kivwala
mwaewo i mena e ouou teteuye.
Thɨ kivwalaŋgiya bigibigi thovuthovuye thɨ mena e bobokulu thɨ meghabana.
Valɨkaiwae mwaewoke thiyake thɨ yayaku Josep e umbaliye.
Valɨkaiwae thɨ yaku loloko iya i meghaghathɨ
weŋgiya oghaghaeko e ghamwae.
27 Benjamin ŋgoreiya mbugha njamnjam tagaithɨ.
Mbaŋambaŋa i ghana budakai me unɨghɨ.
Gougou i giya budakaiya me mban.”
28 Thiyake Isirel wabwiniyeŋgi. Lenji ghanaghanagha theyaworo na theghewo. Iyake ghalɨŋae weŋgi mbaŋa i giya le ŋgaŋga regha na regha ghanjigomwaewa ŋgoreiya regha iya valɨkaiwae.
Jeikob le mare na ghabeku utuniye
29 Amba Jeikob i dage weŋgiya le ŋgaŋga iŋa, “Mbaŋa ne ya garalawa na ya wa weŋgiya lo bodaboda kaerova thiya mare, tembene vohu bekuŋgova ŋgora bwebwe na oramae thɨ ghenawe. Ina e maŋgavarɨ, Eipron, iye rara Het le valɨvaŋga, 30 ina Makpela, Memri e boimaniyeko, Kenan e tɨne. Eibraham va i vamodo maŋgavarɨko iyako weya Eipron na le ghabubu. 31 Va thɨ bekuŋgiya Eibraham na levo Sera, Aisake na levo Rebeka, na vambe ya bekuva Leya iya e valɨvaŋgako iyako. 32 Thelauko iyako na maŋgavarɨko, va thɨ vamodo weya rara Het. Ne vohu bekuŋgowe.”
33 Mbaŋa Jeikob i giyavao le ŋgaŋgako ghanjimbaro, kaero i ghenava na e mbaŋako iyako i liya le waŋga.