Ebaruwa eya Paulo yajojera
AWAGALATIA
Amangʼana ku owuimpi
Ebaruwa eno yajojwa no *Omutumwa Paulo mu emiaka egia 48–49 ni yawanga Antioki, lunyima ne ekiina ekinene ekia Yerusaleemu kiaikola (Awat 15). Yagitumra Awakristo awa amakaniisa aga ekitemo ekia Galatia ekiri *Eesia Ekitono mu ekialo ekia Awaruumi, aga waatanika mu olugendo lwawu olwa kuluweri olwa okulanzia *injiili. Ni waamala okuemao, Awakristo *Awayaudi awaaza mu amakaniisa gano, waalaganga Awakristo awatari Awayaudi mbwe kukaweere kulootu ni wairrwe *enyangu kandi warindre endagirra ezia Awayaudi zindi ziona.
Mu ebaruwa eno, Paulo awagaania mbwe ngakunigirizia otari Omuyaudi okuirwa enyangu kandi mbwe arinde endagirra nikwo awe Omukristo kuwuene. Amangʼana gano gaamunyaasiako ni Petro ni Baranabaasi, alala na *Awafarisaayo, nawuno wairana Yerusaleemu okuwurizania emberi owa *awagaaka awa ekaniisa ni wari ni Tiito ni Baranabaasi. Kwawa kutio aeniki Awakristo Awayaudi wano waagereranga owugawuuke. Paulo yawagaania na awalaga mbwe iye ari omutumwa kuwuene kandi mbwe Owukristo ngawuiyegeeke ku okuirwa enyangu nakuwa okurinda endagirra ezia Awayaudi yawa. Ni wuagala mala okuganya ku Yesu *Kristo owafwira awantu kandi awasiwula okuema ku okusu okwa Katonda yaazanga okuwaswawuka nakwo. Awoola mbwe wuno niwuo owuinunuzi owuaaza ku owusiza owua Katonda, ni ngʼani ku okukalawana kwifu okurinda endagirra. Ebaruwa eno elagana owuene owua munsi ku amangʼana aga Katonda mbwe awantu wanunulwa ni kuwitra ku owusiza owua Katonda ku okuganya ku Yesu Kristo engʼene.
1
Amakeezio agasookere
1 Ni inze Paulo, *omutumwa otaatumwa no omuntu nakuwa na awantu yaaya, no owatumwa ni Yesu *Kristo ni Katonda Soifu owaziusia Yesu okuema ku awafu. 1Kori 9:1–2 2 Mbajojera ebaruwa eno inywe awantu awaganyire ku Kristo awari Galatia, ni turi alala ni waamwifu woona awari ni inze eno. 3 Owusiza no owuolu owuema ku Katonda Soifu no *Omwami iifu Yesu Kristo wuwe ni inywe. 4 Yesu ono yaifumia okufwira owuoni wuifu kugere atutoole mu amawi aga ekialo ekiwi kino, mu okuagala okwa Katonda ori Soifu. Mari 10:45; Awaru 6:1–4; Gala 2:20; Efee 5:2; 1Timo 2:6; Tiit 2:14; Awaib 9:28; 1Yow 5:19 5 Katonda atuukre owunene wuona ku amiire goona. *Amin.
Ewulao injiili indi egawuuke
6 Ndi no okuluguula ino mbwe mureka Katonda owawaeta ku owusiza owua Kristo wuangu ino, ni muganya ku *injiili indi ensaasa. 7 Ngʼamboola otio mbwe erio injiili indi, ni mala mbwe wario awandi awawatawania ni wagarikira owuene owuri ku Kristo (wureke okumanyika). Awat 15:1, 24; Gala 5:8, 10; 2:4, 21 8 No omuntu-umuntu namba ifwe nakuwa *enyankoi oemere ku igulu, aizukiire awalanzizie injiili indi egawuuke ne eya ifwe twawalanzizia, Katonda amufuuwe! 9 Kiomo twamiire okuwoola, nintio mboola kandi mbwe omuntu wundi na awalanziizie injiili indi ensaasa egawuuke ne eya mwaganyako, Katonda amufuuwe! Awaru 9:3; 1Kori 5:2–5; 16:22 10 Owuo nyagala okuwa omulootu emberi wa awantu, nakuwa emberi wa Katonda? Kusi ngeezaania okusangaazia awantu? Kuweeko mbwe nkiageezaania okusangaazia mala awantu, kangato ngʼandi *omukurumu owa Kristo. Awaru 2:29; 1Thes 2:4–6
Paulo yaetwa okukorra Katonda
11 Waamwifu, nyagala mumanye mbwe injiili eya nyawalanzizia, ngʼana amangʼana aga omuntu nio owavumbuka nago, yaaya. 12 Inze injiili eno ngʼankagituukra ku omuntu yaaya, lwona owulao owangerera injiili. Ni nyagituukra ni kuema ku Yesu Kristo mu owusasuko.
13 Inywe mwamiire okuwurra kiomo owulamu wuange wuawanga ni nyawanga mu ediini eya *Awayaudi. Mumanyire kiomo nyanyaasianga ekaniisa eya Katonda wululu kandi kiomo nyageezaania okukiona. Awat 8:3; 26:4–5; 1Kori 10:32 14 Nyawanga emberi eya amakula gange goona mu amangʼana aga ediini iifu eya Awayaudi kandi nyalwanranga endagirra ezia waasoifu no owuvuya owungi. Awat 21:20; 23:6 15 No olwa Katonda, owantengeka ni nkiari mu enda eya ngʼinaifu kandi anyeta ku owusiza wuae, yaomereziwua Isaa 49:1, 5 16 okunsaasurra Omuzia waae, kugere ndanzie injiili yaae ku awantu awatari Awayaudi, nganyakawuuzia omuntu ekintu yaaya. Awat 9:3–5, 15; 1Kori 15:10 17 Lwona nganyakagia Yerusaleemu okuwona awaa-nsookra okuwa awatumwa inze ni nkiari, ni ao-ao nyafuma ngia mu ekialo ekia Araabu nikwo nyairana Damaskaasi kandi lunyima.
18 Kandi emiaka isatu ni giamala okuwita, nyagia paka Yerusaleemu okumanyana geeza ni Petro* Olugiriiki luwoola *Keefa. kandi nyawa nae ku amiire ikumi ni itaanu. Awat 9:22–28 19 Ni ngʼanyakawonana na awatumwa wandi yaaya, ni mala Yakoobo wamwawu Omwami Yesu. 1Kori 15:7 20 (Mbalaga emberi wa Katonda mbwe amangʼana aga mbajojera, ngagari aga owuweeyi yaaya.) 21 Nikuemao lunyima nyagia mu ewitemo ewia Siiria ni Siliisia. Awat 9:30 22 Awantu awa amakaniisa aga Yudeea awari ku Kristo, waawanga ni watammanyire. 23 Waawurra-uwurra mbwe: “Omuntu owatunyaasianga oria, nyingeeno alanzia okuganya okwa yageezaanianga okuona.” 24 Kandi waatondowola Katonda ku ekiaikola mu owulamu wuange.
1:1 1Kori 9:1–2
1:4 Mari 10:45; Awaru 6:1–4; Gala 2:20; Efee 5:2; 1Timo 2:6; Tiit 2:14; Awaib 9:28; 1Yow 5:19
1:7 Awat 15:1, 24; Gala 5:8, 10; 2:4, 21
1:9 Awaru 9:3; 1Kori 5:2–5; 16:22
1:10 Awaru 2:29; 1Thes 2:4–6
1:13 Awat 8:3; 26:4–5; 1Kori 10:32
1:14 Awat 21:20; 23:6
1:15 Isaa 49:1, 5
1:16 Awat 9:3–5, 15; 1Kori 15:10
*1:18 Olugiriiki luwoola *Keefa.
1:18 Awat 9:22–28
1:19 1Kori 15:7
1:21 Awat 9:30