7
1 Lárigiñe sun cátei le, ába naríjin gádürü ánjeligu rára luágu gádürü larígei uboú, ágüdaajei gádürügubei garábali lun máfurun lan ni murúsun luágun múa, ni luágun barána, ni luágun ni ában tídibu wéwe. 2 Aríjatina gíñe ábanya ánjeli ñǘbinti lueígiñe oúbaü le ñígiñe lubeí láfuara wéyu láu liséyun Búngiu le wínwanbei. Ába lagúaragun ánjeli ligía láu umálali jéreti joun gádürü ánjeligu ja abíjubaña ubáfu lun jadǘgün wuríbani lun múa lúma barána.
3 —Madǘga jumá wuríbani lun múa, ni lun barána, ni lún buri tídibu wéwe daríme wíchuguni liséyun Búngiu luágu jerébe lánigu.
4 Agáamba numúti átiriñanu lan. san bián-wein-gádürü mílu jádaangiñe linébaanfaangu Israél.
5 Dúusu míluñanu jádaangiñe ladǘgawagun Judá,
dúusu mílu jádaangiñe ladǘgawagun Rubén,
dúusu mílu jádaangiñe ladǘgawagun Gad,
6 dúusu mílu jádaangiñe ladǘgawagun Áser,
dúusu mílu jádaangiñe ladǘgawagun Neftalí,
dúusu mílu jádaangiñe ladǘgawagun Manasés,
7 dúusu mílu jádaangiñe ladǘgawagun Simeón,
dúusu mílu jádaangiñe ladǘgawagun Leví,
dúusu mílu jádaangiñe ladǘgawagun Isacár,
8 dúusu mílu jádaangiñe ladǘgawagun Zabulón,
dúusu mílu jádaangiñe ladǘgawagun José,
jáma dúusu mílu jádaangiñe ladǘgawagun Benjamín.
Sarágu gürígia jarútu jadáüragun
9 Lárigiñe cátei le, ába naríjin sarágu gürígia lídaangiñetiña sun fulásu, sun rása, sun luwúyeri dimúrei lúma néchaani, rára jáña ligíbugiñe lála Búngiu ligíbugiñe Mudún. Gíbetiña gürígia jagía darí lun siñá lan jabájüdǘn, jarútu jadáüragun táu tubána fáluma jájaburugu. 10 Ába jagúarajan sun jagía láu umálali jéreti, ába jaríñagun.
Weíriti Búngiu, le ñúnbei luágu lála,
weíriti Mudún, luágu asálbaruni le rújamaalíbei woun.
11 Rára jáña sun ánjeligu geyégu láu lála lúma geyégu jáu weíyaaña mútu, jáma gádürü cátaña gabágaritiña jagía, ába jelémuchun dagá jagíbu múarugu ligíbugiñe Búngiu, ába jájuduragun lun, 12 ába jaríñagun.
¡Ítaralá! Rúalá uweírigu, lichú áu, eteíngiruni,
inébesei, ubáfu lúma érei
lun Wabúngiute lun sun dan. Ítaralá.
13 Ábati lálügüdünina ában jádaangiñe weíyaaña mútu jagía.
—¿Cátañasan ja, ja jarúbaña adáüragun? ¿Jalíagiñésan jayábin?
14 Naríñaga lun.
—Amǘrü jamúga aríñagei nun.
Laríñaga nun.
—Ja súfurijañabaña sarágu ja, ja chibá jamaalíbei jafígoun láu líta Mudún, jarúmagüda jamoún janígi láu. 15 Ligía ligíbugiñeñanu lubeí lála Búngiu esériwida lun, wéyuagu áriebu tídan lúban to siéluboun, loúnigirubaña Búngiu láu leréderun jáma. 16 Máfagun jáñame ilámaü, ni mágürabu, másürün láñame wéyu, mañáurijan láñame lárouga, 17 ladǘga loúnigirubaña lan Mudún le lubádubei lála Búngiu, ábame lanǘgüniña lárun dúna le íchugubei ibágari magúmuchaditi, ábame larágajani Búngiu sun águiraü lueígiñe jágu.