1 Nalö miaŋgöreŋ gölme bahöŋaŋgö (Galili prowinsgö) kiŋ Herod yaŋön Jisösgö qetbuŋaŋi mörök. 2 Mi möta welen-qeqeurupŋi yeŋgöra kewö jiyök, “Mi mönö Jon O-melun azia. Yaŋön mönö kömupnöhök wahöta nupŋi meiga aŋgöletot kukösumŋinambuk asuhumakze.” Waimanjat möta mewö jiyök.

3  * Luk 3.19-20Mi kewögöra jiyök: Herodnöŋ munŋi Filipkö anömŋi Herodias ölöŋ meiga Jon O-melun azinöŋ kiŋ jim waŋgiiga opotöröp melaim eŋgiiga anda Jon memba jöhöba kösö mire al waŋgiget. 4  * Lew 18.16; 20.21Jonöŋ Herodköra keu kewö jiyök, “Gi qambötki memba mala Köna keu oŋgitzan.” 5 Mewö jiiga Herodnöŋ Jon qeget kömumapkö mörökmö, könagesö yeŋön Jongöra mötketka kezapqetok azia malöhi, miaŋgöra könagesö yeŋgöra keŋgötŋi mörök.

6 Keŋgötŋi mörökmö, Herodkö ahuahu nalöŋan kaiga ketaurupŋan tokoba tatketka Herodiasgö böratŋan yeŋgö jeŋine danis aliga Herodnöŋ miaŋgö eksihimŋi gwötpuk mörök. 7 Miaŋgöra ambi seram miaŋön wani yuaigöra qesibawak, kiŋnöŋ mi tököm waŋgimamgö keu jöhöba keu mi jöjöpaŋ keunöŋ jim köhöiyök. 8 Mewö jim köhöiiga namŋan ambi seram mi kuŋgum waŋgiiga kewö jiyök, “Mönö qesinöŋga Jon O-melun azigö jölŋi yandigetka nöröpŋi memba ki kaba köndenöŋ niŋgima.”

9 Mewö jiiga kiŋgö uruŋan kömbuhiiga wösöbirik mörökmö, jöjöpaŋ keuŋan jöhöi ketaurupŋan mi mötketka yeŋgö jemesoholŋine etpapuköra möta nöröpŋi waŋgimegöra jim kutuyök. 10 Mewö jim kutuba opotöröpŋi kun melaiba jiyök, “Gi mönö kösö mire anda Jongö jölŋi yandiba nöröpŋi memba kaman.” 11 Mewö jiiga Jongö nöröpŋi köndenöŋ ala memba kaba ambi seram mi waŋgiiga memba anda namŋi waŋgiyök. 12 Jongö gwarekurupŋan miaŋgö buzupŋi möta anda qamötŋi memba qaksirigö köt köteŋnöŋ ala löm kölget. Löm köla anda keu mi Jisös jiget mörök. Mewö.

13 Jisösnöŋ Jongö kösohotŋi möta miri mi mosöta waŋgenöŋ öŋgöba gölme kötikŋi kunöŋ nanŋinök malbingöra anget. Ambazip kambu yeŋön miaŋgö buzupŋi möta taon aka miriŋini mosöta Jisösgö andöŋe wuataŋgöba gölme köna anget. 14 Angetka Jisösnöŋ waŋgenöhök eta ambazip kambulelembe eŋgeka yeŋgöra wösöŋi mörök. Wösöŋi möta sutŋine kawöl eŋgöhöi malgeri, mi mem ölöwak eŋgiyök.

15 Mewö aka mali mare aiga gwarekurupŋan Jisösgöreŋ kaba kewö jiget, “Böhi, nini gölme kötikŋi kiaŋgöreŋ malinga wehön jeŋan teköba gemamgö akza. Miaŋgöra gi ölöp ambazip kambu ki melaim eŋginöŋga miriŋi miriŋi mieŋgöreŋ anda numbu neneŋini söŋgöröŋi memba neme.”

16 Mewö jigetmö, Jisösnöŋ kewö jii mötket, “Yeŋön ölöp kiaŋgöreŋ tatme. Eŋön mönö nanŋinak i nene gumohom eŋgime.” 17 Mewö jii möta jiget, “Nini beret 5 aka söra yahöt miyök memba maljin.” 18 Mewö jigetka jiyök, “Mönö mi memba kaba niŋgime.”

19 Mewö jiba ambazip kambu mi kegwaŋ luplupnöŋ eta tatmegöra jim kutum eŋgiiga tatket. Tatketka beret 5 aka söra yahöt mi memba Suenöŋ ui öŋgöiga kötuetköba beret mindipköba gwarekurupŋi eŋgiiga ambazip kirip dop mendeŋda eŋgiget. 20 Mendeŋda eŋgigetka ambazip körekmakörek nemba nem timbireŋ aket. Nem timbireŋ aka nene kitipŋi kitipŋi mosötkeri, mi gwarek yeŋön qezakögetka sakap 12 miaŋgöreŋ geba kokolak qeyök. 21 Azi beret negeri, yeŋgö jaŋgöŋini mi 5000. Ambi nahönbörat yeŋgö jaŋgöŋini mi qahö meget. Mewö.

22 Neget teköiga Jisösnöŋ miaŋgöreŋök gwarekurupŋi jim kutum eŋgiba kewö jiyök, “Iŋini mönö waŋgenöŋ öŋgöba qeljiŋe o aŋgö kutuba likepŋe anme. Nöŋön ölöp nalö sutŋe ambazip kambu ki melaim eŋgibagun kamam.” 23 Ambazip melaiba eŋgubula kunduŋe öŋgöba nanŋök mala köuluköyök. Köuluköba mali mare aiga kunduŋe nanŋik kötikŋi tarök. 24 Tariga waŋgeŋinan lök o aŋgö bibiŋe köröwen aniga luhutnöŋ angeraŋgöreŋök gila kaiga sirinöŋ waŋgenöŋ giliga kekwilik anda kayök.

25 Mewö ahiga miri awöraŋgöiga (3-6 kilok) miaŋgöreŋ Jisösnöŋ o aŋgö qakŋe tiba tiba gwarekurupŋi yeŋgöreŋ kayök. 26 Kaba o aŋgö qakŋe tiba tiba kaiga gwarekurupŋan mi eka keŋgötporiŋ aka “Köwet Soŋgoriŋnöŋ kaza,” jiba sömbuŋini möta qeta silatket.

27 Qeta silatketmö, Jisösnöŋ miaŋgöreŋök keukeu jiba kewö jii mötket, “Alaurupni, mönö ewebibiŋinambuk saitiŋgit malme. Nanak kazal. Keŋgötŋini kude mötme.” 28 Mewö jii möta Pitönöŋ meleŋda kewö jii mörök, “Göŋön Kembuya akzan ewö, mönö ölöp jinöŋga nöŋön o qakŋe tiba tiba göhöreŋ kamam.”

29 Jisösnöŋ mi möta “Ölöp kanöŋ,” jiyök. Mewö jiiga Pitönöŋ waŋge mosöta o aŋgö qakŋe tiba tiba könahiba Jisösgöreŋ anök. 30 Könahiba anökmö, luhutnöŋ gwötpuk gili mi eka keŋgötporiŋ aka könahiba o uruŋe geba kewö qerök, “Kembu, bauköm niŋginöŋ.” 31 Qeriga Jisösnöŋ miaŋgöreŋök böröŋi böraŋda Pitögö böröŋe memba kewö jiyök, “Mötnaripki morörökŋi. Mönö wuanöŋgöra uruyahöt akzan?”

32 Mewö jiba bauköm waŋgii waŋgenöŋ öŋgöyohotka luhutnöŋ nöŋ qeba göröŋ alök. 33 Göröŋ aliga azi waŋgenöŋ tatkeri, yeŋön waikŋi memba möpöseim waŋgiba kewö jiget, “Alakŋa, gi Anutugö nahönŋa.” Mewö.

34 O aŋgö kutuba likepŋe Genesaret mire aŋgota waŋge mosöta saknöŋ geget. 35 Saknöŋ gegetka miri miaŋgö ambazipnöŋ Jisös möt kutum waŋgiget. Möt kutum waŋgiba keu algetka miri pakpak kösutŋe tatkeri, miaŋgöreŋ aniga buzupŋi möta kawöl ambazip körek eŋguaŋgita Jisösgöreŋ kaget. 36 Kagetka kinda Jisös malukuŋaŋgö suŋe misiribingö ulet waŋgiba malget. Misirigeri, körek yeŋön mönö ölöwak teköget. Mewö.