1 O ambazip sukinapŋinambuk, iŋini kezap ala keuni ki mötket: Kahasililiŋ sihimbölö qakŋine öŋgömawi, miaŋgöra mönö amburereŋ aka silata sahötme. 2  * Mat 6.19Moneŋ sukinapŋinan mönö gisahöba gororoŋgöza. Kezaploŋloŋ jijilukut yeŋön opo malukuŋini yöhöqöhötiba nemakze.

3 Iŋini nalö teteköŋi kewöŋe goul, silwö aka yuai tosatŋi qaknöŋ qaknöŋ qezaköget ahözawi, mi kahawet muetmuetnöŋ turum teköba törom (rust) memba ahöza. Törom kahawet miaŋön dangunu ewö ahöba könaŋini nalö teteköŋe kewö kondelma: Iŋini malmalŋini moneŋ inapnöŋ jöhöba mösöhögetka pömsöm qeiga ayuhume. Törom kahawet miaŋön mönö könöp bölam ewö sile busuŋini mewöyök mem bölima. 4  * Dut 24.14-15Ki mötmöriget: Nup meme ambazip nupŋine barö memba siri uret qözöla malgeri, iŋini yeŋgö töwaŋini ekbonep möta aŋgön kölget. Iŋini yeŋgöreŋ sahöt irikurukŋini mötze me qahö? Silatŋini miaŋön mönö Kembu Anutu, kukösum pakpakö Toŋaŋgö kezapŋe gem teköiga mötza.

5 Iŋini gölmenöŋ ki yuai könaŋi könaŋi sesegilgil buŋa qem aŋguba siyoŋsayoŋ qahö mala silegö sösöŋgai algetka nahömŋini dop köl eŋgiiga malget. Gölmegö kelök möriamŋan jöhöm eŋgiiga laŋ mala nem qarip ketaŋi aka malje. Anutunöŋ keuŋini jim teköiga eŋguget kömumeaŋgö nalöŋinan kam kuŋgumawi, mönö nalö miaŋgöra jöjöröba kelökŋinambuk aka malje. 6 Ambazip qewöloŋini qahö iŋini qahö tuarenjoŋ ak eŋgigetka töndup keuŋini jim teköba laŋ eŋguget kömumba malget.* Keu miaŋgö könaŋi kun kewö: Iŋini azi qewöloŋi qahö töndup keuŋi jim teköba qegetka kömuyöhi, yaŋön iŋini kunbuk qahö qetal eŋgimakza. Mewö.

7 O urumeleŋ alaurupni, iŋini Kembunöŋ kaŋgotmapköra mamböta nalö sutŋe kiaŋgöreŋ mönö mökösöŋda lömböt bisiba kinme. Mewö kinda kölkömöt azigö tandökŋi mötmörime: Yaŋön nene gölmenöŋ kömöta kinda ölŋi söŋgöröŋi öŋgöŋgöŋi asuhumapköra kapaŋ köla mambörakza. Kapaŋ köla mamböta mali maliga kie bedu nalöŋan kaiga kunbuk mamböriga kömunjaŋ kie uru nalöŋan kam kuŋgumakza. 8 Eŋön mewöŋanök mönö mökösöŋda lömböt bisiba kinme. Kembunöŋ kunbuk kamawaŋgö nalöŋan törizawaŋgöra aka mönö uruŋini qezaköba böŋ qeba kinme.

9 O urumeleŋ alaurupni, Anutunöŋ keuŋini jim teköi lömböt miwikŋaibepuköra mönö nanŋini sutŋine jimoŋgot kude aka uruŋinan irikuruk kude jim aŋgumakŋe. Mötket, jimtekötekö Toŋan mönö dopdowiba naŋgunöŋ kinja. Mewö. 10 Urumeleŋ alaurupni, kezapqetok ambazip yeŋön mönöwök Kembugö qetŋe Buŋa keu jigetka kahasililiŋ mem eŋgigetka möta töndup mökösöŋda lömböt bisiba kapaŋ köla malget. Eŋön mönö yeŋgö tandökŋini mötmöriba köna lasupŋini wuataŋgöba malme. 11  * Job 1.21-22; 2.10; Sum 103.8Tosatŋan kapaŋ köla lömböt bisiba mala luhut algeri, nini yeŋgöra “I-ia simbawoŋ!” jizin. Azi qetŋi Job (Hiobe) yaŋön kahasililiŋ möta töndup kapaŋ köla luhut alöhi, mi mötze. Luhut aliga teteköŋe miaŋgöreŋ Kembunöŋ ak kömukömu Toŋi aka neŋgehorimakzawi, yaŋön mönö oyaeŋkoyaeŋi waŋgiiga malök. Mönö mi mötmörime. Mewö.

12  * Mat 5.34-37O urumeleŋ alaurupni! Keu kötŋi mutukŋi kun ki jimam. Iŋini keu mi me mi jimei, mi jöjöpaŋ keunöŋ kewö kude jim köhöime, “Keuni ölŋi qahö akza ewö, Suep Toŋan ölöp lömböt ali qakne öŋgöma me gölme toŋan mereŋ mumbaköiga gölmenöŋ turum niŋgima.” Keu mi me jöjöpaŋ keu tosatŋi mewöŋi miaŋön mönö keuŋini kude jim köhöime. Mewö qahöpmö, oŋ-keugöra möta “Oŋ!” miyök jime aka qahöp-keugöra “Qahö!” jime. Pötagororoŋ keu jigetka Anutunöŋ keuŋini jim teköba likepŋi meleŋni qakŋine öŋgöma. Mewö.

13 Mötnarip ambazip eŋgöreŋök kunŋan qemjem-mamje-ŋambuk malja ewö, yaŋön mönö Anutu köuluköma. Kunŋan sösöŋgainöŋ malja ewö, yaŋön mönö liŋet köla Anutu möpöseima. 14  * Mak 6.13Eŋgöreŋök kunŋan kawöl yöhöi malja ewö, yaŋön mönö mötnarip könagesögö jitŋememe öröm eŋgiiga kaba Kembugö qetŋe kelöknöŋ sileŋe miriba yaŋgöra köuluköme.

15 Mötnarip qakŋe köulukögetka Kembunöŋ kawöl ambazip mi amöt qem waŋgii ölöwaka kunbuk wahötma. Siŋgisöndok aka kawöl miwikŋaiyök ewö, Anutunöŋ mönö siŋgisöndokŋi mi saŋgoŋda mosötma.

16 Mewö aiga Anutunöŋ amöt qem eŋgii ölöwakŋegöra mönö siŋgisöndokŋini jim miwikŋaim aŋguba bauköm aŋguba Anutugö köulukömakŋe. Ambazip solanŋi kunŋan uruŋi qezaköba Anutu köulukömawi, miaŋgö ölŋan mönö wewelipŋambuk asuhuma. 17  * 1 Kiŋ 17.1; 18.1Miaŋgö söpsöpŋi kun mi kezapqetok azi qetŋi Elaija (Elia). Yaŋön gölme azi naninaŋgö dowa malök. Yaŋön kie qahö kamapköra uruŋi qezaköba kapaŋ köla köuluköiga kienöŋ yambu (yara) karöbut aka köiŋ 6 miaŋgö uruŋe gölmenöŋ qahö erök. 18  * 1 Kiŋ 18.42-45Nalö mi teköiga kunbuk köuluköiga suep injaŋ köla kie yöhöba bedu meiga nene kunbuk töŋgöniba asuhuyök. Mewö.

19 Urumeleŋ alaurupni, eŋgöreŋök kunöŋ keu ölŋaŋgö könaŋi qiwitipköba jaŋjuŋ aniga kunŋan i miwikŋaiba köna ölŋe kunbuk waŋgita alma ewö, 20  * Qam 10.12; 1 Pitö 4.8miaŋgöra mönö kewö mötmörime: Siŋgisöndok ambazip kunŋan jaŋjuŋ könaŋe aniga alaŋan i miaŋgöreŋök waŋgiriga uruŋi löwörii kunbuk meleŋmawi, yaŋön mönö qahö kömum köhöima. Alaŋan i könöp sianöŋ gebapuköra aŋgön köl waŋgiiga Anutunöŋ siŋgisöndokŋi sehisehiŋi mi saŋgoŋda köl turuma. Mewö.