1 Leanöŋ Jeikobkö böratŋi Daina meyöhi, yaŋön nalö kunöŋ Keinan ambi seram eŋgekŋamgöra anök. 2 Aniga gölme miaŋgö azi kembuŋi Hamor yaŋön Hiwi könagesögö azia malök. Yaŋgö nahönŋi Sekem yaŋön Daina eka miaŋgöreŋök eksihim möta öröba mem bölim waŋgiyök. 3 Sekemnöŋ wölbötŋi Jeikobkö böratŋi Dainagöra pöröraköiga jöhöba urukalemŋan jöpaköm waŋgiba kelök keuŋan jiba tutuhum waŋgiba malök. 4 Tutuhum waŋgiba mala iwiŋi Hamor kewö jii mörök: “Iwini, gi ölöp ambi seram ki nöŋgö anömna akŋapköra keu nup meman.”

5 Nalö miaŋgöreŋ Jeikobkö nahönurupŋi yeŋön gölme köröŋe anda mirigö sömbupurupŋini galöm köl eŋgiba malgetka Sekemnöŋ Daina mem böliiga iwiŋi Jeikobnöŋ böratŋaŋgö keu buzupŋi mi mewö mörök. Mi mörökmö, mi mösamböta nahönurupŋan mire kaŋgotmegöra keu bök mamböta tarök. 6 Mamböta tariga Sekemgö iwiŋi Hamor yaŋön keu nup memamgöra Jeikobköreŋ kayök. 7 Kaba tariga Jeikobkö nahönurupŋan gölme köröŋeyök kaŋgotket. Kaŋgota miaŋgöreŋök yuai asuhuyöhaŋgö kösohotŋi mi kewö mötket: Sekemnöŋ Jeikobkö böratŋi mem böliba Israel könagesö sutŋine silik gamuŋambuk ahök. Silik mi kude ahakŋaŋgö dop ahök. Mi möta uruŋinan kömbuhiiga wösöbirik möta urupik aket.

8 Urupik aketmö, Hamornöŋ kewö jii mötket: “Nahöni Sekemgö uruwölbötŋaŋgö sihimŋi mi eŋgö nenböratŋinaŋgöreŋ mösölatiba tatza. Miaŋgöra ölöp jim tekögetka Dainanöŋ yaŋgö anömŋi akawak. 9 Ölöp nembuk nenböraturupnini utekutek aka aŋguin anda kaiga malbin. Mewö ölöp qenaqena aka malbin. 10 Mewö aka ölöp neŋgö sutnine tata malme. Nini gölmenini ki mi qahö aŋgön kölbinmö, iŋini ölöp miaŋgöreŋ laŋ anda kaba sihimŋinaŋgö dop gölme kitipŋi kitipŋi buŋa qem aŋguba miriŋini memba nembuk aŋgumnep-qaŋgumnep aka malbin.”

11 Mewö jiiga Sekemnöŋ Dainagö iwinenurupŋi yeŋgöra kewö jiyök: “Nöŋön eŋgö jeŋine ak-kömukömu miwikŋaimamgö möta qesim eŋgizal. Miaŋgöra i me waigö qesim niŋgimei, nöŋön mi ölöp eŋgimam. 12 Ambi bohonŋi aka kalem memba kaba eŋgimami, miaŋgö qötöŋi mi ölöp sihimŋinaŋgö dop memba öŋgöme. I me waigö qesim niŋgimei, nöŋön mi ölöp eŋgimam. Keuni kötŋi ki: Eŋön mönö jim teköba nenböratŋini niŋgigetka nöŋgö anömna akŋa.”

13 Sekemnöŋ nenŋini Daina mem böliyöhaŋgöra aka Jeikobkö nahönurupŋi yeŋön isimkakalek qakŋe Sekem aka iwiŋi Hamor meleŋ etkiba 14 keu kewö jigetka mötket: “Azi kungö sileŋe Anutugö aiwesökŋi qahö yandigeri, nini nenböratnini azi mewöŋi ölöp qahö waŋgibin. Mewö ahinga gamumamusumnöŋ qaknine öŋgöbapuk. Miaŋgöra nini i waŋgibingö osizin. 15 Iŋini silik mohok-kun kewö aketka neŋön urumohot akin: Mutuk Anutugö aiwesökŋi mi aziurupŋini pakpak eŋgö sileŋine yandiget teköiga nini maljin ewö akŋe ewö, mönö nenböratnini ölöp eŋgibin. 16 Mewö aketka ölöp embuk nenböraturupnini utekutek aka aŋguin anda kaiga malbin. Mewö ölöp eŋgö sutŋine tata könagesö kambu mohok aka malbin. 17 Mewö malbinmö, Anutugö aiwesökŋi sileŋine yandibingö urumohot qahö akŋe ewö, nini mönö nenböratnini waŋgita kungen anbin.”

18 Keu mewö jigetka Hamor aka nahönŋi Sekem yetkön keu mewöŋi miaŋgöra mörohotka dop kölök.

19 Mewö mörohotka azi gwabö Sekemnöŋ iwiŋaŋgö saiwaurupŋi yeŋgö sutŋine tosatŋi eŋgoŋgita qetbuŋa ketaŋi memba malök. Yaŋgö urusihimŋan Jeikobkö böratŋaŋgöra gwötpuk ahöyöhaŋgöra aka keu jigeri, mi wuataŋgömamgö eksekpeksek qahö aka nalö qahö qem körii öŋgöyök.

20 Mewö aiga Hamor aka nahönŋi Sekem yetkön Sekem taongö azi alaurupŋi yembuk keu jibingöra taongö naŋgu kösutŋe totoko sombemŋine anda kewö jiyohot: 21 “Azi kieŋön nembuk ala ölöpŋi ak aŋgumakze. Miaŋgöra nini ölöp jim teköinga yeŋön neŋgö gölmenöŋ tata laŋ anda kaba miriŋini memba nembuk aŋgumnep-qaŋgumnep aka malbin. Yeŋön gölme kitipŋi memegöra tiŋi gwötpuk ahöza. Nini ölöp yembuk nenböraturupnini utekutek aka aŋguin anda kaiga malbin. 22 Nini silik mohok-kun kewö ahinga azi mieŋön nembuk malbingö urumohot akŋe: Anutugö aiwesökŋi mi azi mieŋgö sileŋine yandiget ahözawi, miaŋgö dop mi mutuk körek neŋgö silenine mewöyök yandiin teköiga nini ölöp yembuk könagesö kambu mohot aka malbin.

23 “Mewö ahinga yeŋgöreŋ mirigö sömbup kambuŋini aka sukinap yuaiŋini pakpak mi mönö nanini buŋaya akŋe. Miaŋgöra keu jigeri, mi ölöp möta imbi kölinga yeŋön neŋgö sutnine tatat dundumŋini miwikŋaiba malme.”

24 Mewö jiyohotka taongö kiripo naŋguŋe kaba tokogeri, yeŋön körek Hamor aka nahönŋi Sekem yetkö keugöra urumohot aka jigetka Anutugö aiwesökŋi mi Sekem taongö azi pakpak yeŋgö sileŋine yandim teköget.

25 Yandim tekögetka wehön 3:ŋi aiga miaŋgöreŋ uziŋinaŋgö sihimbölöŋi mi tok toroqeba möta tatketka Jeikobkö nahönŋi yahöt Simeon aka Liwai, Dainagö nenyahötŋi yetkön bimgö souŋiri ketaŋi memba taon miaŋgöreŋ saŋgabaŋga anda tihitŋini qahö möta tatketka wölaŋ bim qeba azi pakpak qaurapaŋ eŋguyohotka kömum teköget. 26 Hamor aka nahönŋi Sekem mi mewöŋanök bimgö sou ketaŋan etkuyohotka kömuyohot. Kömuyohotka Sekemgö mireyök nenŋiri Daina mi öröba eta waŋgita anohot.

27 Mewö ahotka Jeikobkö nahönurupŋan Sekemnöŋ nenŋini mem bölim waŋgiyöhaŋgöra aka taonöŋ kiŋkiŋgöba anda azi qamötŋini eŋgeka taongö sukinap yuaiŋi kiom qeba yoŋgorö meget. 28 Lama, meme, bulmakau aka doŋki kambuŋi kambuŋi aka öröyuaiŋini pakpak taon uruŋe aka gölme köröŋe ahögeri, mi pakpak kalöpköba mem teköget. 29 Sukinap yuaiŋini pakpak otoŋda ambimoröurupŋini körek eŋguaŋgita miriŋine yuaiŋini tosatŋi ahöyöhi, mi mönö kölolohoba kiom qeba yoŋgorö memba tököba anget.

30 Mewö aketka Jeikobnöŋ Simeon aka Liwai kewö jii mörohot: “Iŋiri mewö ahotka kahasililiŋ ketaŋaŋgö keuŋan mönö nöŋgö qakne öŋgöiga malmam. Gölme kiaŋgö toŋi Keinan könagesö aka Periz könagesö yeŋön mönö kazik möt niŋgiba malme. Nöŋgö könagesöni nini awamdökŋi maljin. Miaŋgöra yeŋön yarö aziurupŋini tokom eŋgiba qetala bim yarö gil niŋgime ewö, yeŋön mönö ölöp qaurapaŋ nuŋguba ni aka könagesöni ayuhum neŋgime.”

31 Jeikobnöŋ mewö jii mörohotmö, yetkön keu kewö jiyohot: “Kunöŋ neŋgö nenini köna ketaŋi ambi tandök ak waŋgiyöhi, nini mönö miaŋgö likepŋi meleŋ eŋgiinga dop kölja. “Mewö.