1 Yöwöŋan aniga Jeikobnöŋ mewöyök könanöŋ aniga Anutugö garataurupŋi tosatŋan miwikŋaim waŋgiget. 2 Miwikŋaim waŋgigetka eŋgeka kewö jiyök: “I Anutugöreŋ yarö kambuya akze. “Miaŋgö dop gölme miaŋgö qetŋi Mahanaim (yarö kambu yahöt) qerök.

3 Jeikobnöŋ könanöŋ anda mala kolek aziurupŋi tosatŋi mutuk melaim eŋgii Edom kantrigö gölme qetŋi Seir miaŋgöreŋ datŋi Iso ekingöra anget. 4 Melaim eŋgiba kewö jim kutum eŋgiyök: “Iŋini mönö anda dat kembuni Iso kewö jigetka mötma: ‘Ketaŋamni mötnöŋ, ni welen azigi Jeikob. Ni ehoniri Labanbuk mala kota mal teköba nalö kewöŋe i mosöta kazal. 5 Miaŋgöreŋ mala bulmakau, doŋki, lama, meme (noniŋ) kambuŋi kambuŋi aka welenqeqe ambazip miwikŋaiba eŋgömemba könanöŋ kazal. O azi kembuni, nöŋön göhö jege ak-kömukömu miwikŋaimamgöra möta keu buzupni ki mutuk albi göhöreŋ kaza.’ ”

6 Mewö jim kutum eŋgiiga anda liliŋgöba kaba kewö jigetka mörök: “Nini datki Isogöreŋ anin. Yaŋön mönö aziurupŋi 400 eŋgömemba könanöŋ kaba göbuk aitoŋgöbingö jöjöröba malje.” 7 Mewö jigetka möta awöwöliba köŋjiliŋ ketaŋi mörök. Mewö möta kinda könagesöurupŋi yambuk kageri, mi aka lama meme kambuŋi kambuŋi, bulmakau kambuŋi kambuŋi aka kamelurupŋi mi mendeŋ eŋgiiga kambu yahöt aket. 8 Kewö mötmöriba mewö ahök: “Isonöŋ kaba yarö gila kambu kun eŋgum ayuhuma ewö, kambu kun yeŋön mönö ölöp ölöŋ köla anbeak.”

9 Mewö mötmöriba kewö jiba köuluköyök: “O Anutu, asani Abrahamgö aka iwini Aisakö bemŋiri, göŋön ölöp möt niŋgiman. Kembu, gi nangok keu kewö jinöŋ möral: ‘Gi mönö wahöta nangi gölmenöŋ liliŋgöba nangi tinitosolomurupki yeŋgöreŋ anman. Endu anöŋga nöŋön töhötmöriam gihibiga malman.’ Mewö jinöŋ möral. 10 Mönöwök nani öröpnanök memba Jordan o töwatŋi ki kutuba analmö, ölöp ahum sehiba merak liliŋgöba kambu yahöt aka ki kazal. Ni welen azigi etqeqeŋi aka malalmö, göŋön töndup keugi pöndaŋ wuataŋgöba ak-kömukömugi pakpak kondel niŋgiba malnöŋ. Ni eretŋi aka urukalemgi mi buŋa qem aŋgumamaŋgö dop qahö aka malal.

11 “Datni Isonöŋ könanöŋ kaba nani, nam aka moröurupnini nini neŋguba ayuhum neŋgibapuköra nöŋön keŋgötni mötzal. Miaŋgöra göŋön mönö bauköm neŋgiba yaŋgö böröŋeyök meköm neŋgiman. 12  * Jen 22.17Gi nangok keu kewö jinöŋga möral: ‘Nöŋön töhötmöriam gihiba gwölönarökurupki ahumsehip eŋgibiga qötöŋinan qariba köwetkö sakösiŋi ahözawaŋgö dop akŋa. Mi gwötpuk ketaŋi ahömawaŋgöra aka oyoŋoyoŋgö dop qahö. Keu mi ölŋa.’ ”

13 Mewö köuluköba suŋgemŋi mi gölme miaŋgöreŋ ahöyök. Ahöbagun sömbup kambuŋi kambuŋi mieŋgöreŋök datŋi Iso kalem waŋgimamgöra sömbup kewö kewöt mendeŋ eŋgiba nanŋinök al eŋgiyök: 14 Meme (noniŋ) ambiŋi 200, aziŋi 20, lama ambiŋi 200, aziŋi 20, 15 kamel 30 moröurupŋini juzunöŋ, bulmakau ambiŋi 40, aziŋi 10, doŋki ambiŋi 20, aziŋi 10.

16 Kambu mewö mewö kewöt mendeŋda kambu nanŋök nanŋök mi welenqeqeurupŋi yeŋgö böröŋine al eŋgiba kewö jii mötket: “Iŋini ölöp mutuk anda sömbup kambuŋi kambuŋi kieŋgö sutŋine tiriŋ kutuba eŋguaŋgita awataŋ anme.”

17 Mewö jiba kambu mutukŋi anmeaŋgö galömŋi kewö jim kutum waŋgiyök: “Könanöŋ angetka datni Isonöŋ miwikŋaim eŋgiba kewö qesim gihima: ‘Gi dagö welenqeqe azia akzan? Gi denike anmam jiba kazan? Sömbup wösöge anjei, mi dagöreŋa?’ 18 Mewö qesim gihiiga kewö jiman: ‘Mi welen azigi Jeikobköreŋa. Mi ketaŋamŋi Iso kalem waŋgimamgöra al eŋgii kaze. Nanŋak mönö andönine könanöŋ kaza.’ ”

19 Mewö jim kutum waŋgiba sömbup kambu 2:ŋi, kambu 3:ŋi aka sömbup kambu tosatŋi pakpak yeŋgö galömŋini andöŋine kageri, i mewöyök jim kutum eŋgiiga kewö mötket: “Iŋini datni Iso miwikŋaimei, mönö keu tandökŋi miyök jigetka mötma.” 20 Mewö jim kutum eŋgiba kewö mötmöriyök: “Nöŋön esapköba uruŋi memba eta ala kalem waŋgimamgöra sömbup kambuŋi kambuŋi melaim eŋgibi mutuk anme. Datnan mi eŋgeka uruŋi bönjöŋ köliga amöribawak. Uruŋi amöriiga ölöp nanak yaŋgö jemesoholŋe ösöŋ aŋgotpi siŋgisöndokni mosöta ala ak niŋgibawak. “Mewö mötmöriba toroqeba kewö jiget mötmapkö jiyök: “Göhö welen azigi Jeikobnöŋ mönö andönine ösöŋ kaza.”

21 Mewö jiba kalemŋi al eŋgii mutuk könanöŋ angetmö, nanŋak suŋgem mi opo koumnöŋ tatmam jiba miaŋgöreŋ tarök. Mewö.

22 Suŋgem miaŋgöreŋ Jeikobnöŋ wahöta anömyahötŋi, welen ambiyahötŋi aka morönahönurupŋi 11 mi eŋguaŋgiriga anda Jabok o sakŋi qöleqöleleiŋi kutubingö aket. 23 Eŋguaŋgiri o kutuba anda sukinap yuaiŋi pakpak buŋaŋi ahöyöhi, mi mewöyök memba an teköget.

24 An tekögetmö, Jeikobnöŋ nanŋök o likepŋe miaŋgöreŋ kunbuk tarök. Nanŋök tariga azi kunŋan kaiga yambuk suŋgem aum-möriba malohotka miri giaŋiyök.* Hos 12.3-4 25 Azi miaŋön luhut al waŋgimamgö osiba eka miaŋgöra Jeikob mi ikinŋe qeyök. Qeiga mohotŋe aum-möriba malohotka miaŋgöreŋ Jeikobkö ikin sihitŋan sulök. 26 Sihitŋan suliga azi miaŋön kewö jiyök: “Miri giaŋimamgö akzawaŋgöra mönö ölöp nömosötnöŋga anmam. “Mewö jiyökmö, Jeikobnöŋ kewö meleŋ waŋgiyök: “Ni qahö kötuetköm niŋgiman ewö, nöŋön mönö gi qahö gömosötpi anman.”

27 Mewö meleŋ waŋgiiga “Gi qetki niŋi?” jiba qesim waŋgiiga “Jeikob,” jiyök.

28 Mewö jiiga keu kewö jiyök: “Gi Anutu aka ambazip yembuk aum-möriba mala luhut al eŋginöŋ. Miaŋgöra göhö qetki mönö kunbuk Jeikob qahöpmö, Israel qetme. “(Israel Anutubuk aum-möriyök.)* Jen 35.10

29 Mewö jiiga kewö jiyök: “Gi ölöp qetki qetnöŋga mötmam. “Mewö jiyökmö, garatanöŋ miaŋön kewö meleŋ waŋgiyök: “Gi denöwögöra nöŋgö qetnaŋgöra qesizan?” Mewö meleŋ waŋgiba miaŋgöreŋ kinda kötuetköm waŋgiyök.* Kemb 13.17-18

30 Kötuetköm waŋgiiga Jeikobnöŋ kewö jiyök: “Ni Anutubuk mesohol köl aŋguba jeŋi törörök ekzalmö, töndup nehoriiga jebuk maljal. “Mewö jiba miaŋgöra gölme miaŋgö qetŋi Penuel qerök. (Penuel Anutugö jemesoholŋi) 31 Wehön jeŋan lök koriga Jeikobnöŋ Penuel gölme mi mosöta oŋgita kaba ikinŋi sulöhaŋgöra aka timkorik anök. 32 Azi miaŋön Jeikobkö ikin sihit toroqeqeŋaŋgö ginimuramŋe (bidororo) qeyöhaŋgöra aka Israel könagesö yeŋön nalö kewöŋe mewöyök sömbup nemba miaŋgöreŋ ikin sihit toroqeqeŋaŋgö ginimuramŋi mi tököba qahö nemakze. Mewö.