1 Mutuk Abrahamgö nalöŋe bödi asuhuyök. Mewöyök Aisakö nalöŋe mi kunbuk asuhuba gölme dop köla ahöyök. Mi asuhuiga Aisaknöŋ mosöta Filistin yeŋgö kiŋ kembu qetŋi Abimelek yaŋgö miriŋi qetŋi Gerar miaŋgöreŋ anök. 2 Anda maliga Kembunöŋ asuhum waŋgiba kewö jiyök: “Gi Ijipt gölmenöŋ kude anman. Gölme ki buŋagi akŋapkö jim kutuyali, mönö kiaŋgöreŋ tata malman.

3 Nöŋön iwigi Abrahamgöra jöhöjöhö keu waŋgiba mi jöjöpaŋ keunöŋ jim köhöiyali, mi mönö galöm kölbiga ölŋambuk akŋa. Nöŋön gölme pakpak ki mi gi aka göhö gwölönarökurupki yeŋgö buŋaya qem eŋgimam. Miaŋgöra ölöp gölme kiaŋgöreŋ tata kian malnöŋga nöŋön göbuk mala kötuetköm gihibiga malmam.* Jen 22.16-18 4 Nöŋön gwölönarökurupki ahumsehip eŋgibiga qötöŋinan suepnöŋ könakembagö seŋgelau tat anjei, mönö mieŋgö dop akŋa. Mewö aketka gölme pakpak ki mi yeŋgö buŋaya qem eŋgimam. Göhö gwölönarökurupki yeŋgöreŋök kungöra aka nöŋgö kötumötuetnan mönö gölmegö könagesö kambuŋi pakpak yeŋgö qakŋine öŋgöiga oyaeŋkoyaeŋ akŋe. 5 Nöŋön kewögöra mewö akŋam: Abrahamnöŋ nöŋgö keuni tem köla malök. Jöjöpaŋ keuni, jimkutukutu keuni aka köna keuni waŋgiali, yaŋön mi pakpak wuataŋgöba malök.”

6 Anutunöŋ mewö jiiga Aisaknöŋ toroqeba Gerar taonöŋ tata malök. 7 Maliga gölme miaŋgö aziŋi yeŋön anömŋaŋgö qesim waŋgigetka kewö jiyök, “I mi nena. “Mewö jiba uruŋan kewö mötmöriyök: “Rebekagö kaisoŋgolomŋan eksihimŋambuk akzawaŋgöra azi mieŋön mönö yaŋgöra aka ni nuŋguget kömumbileŋbuk. “Mewö mötmöriba “I anömna,” mewö jimamgö keŋgötŋi möta malök.* Jen 12.13; 20.2 8 Aisaknöŋ miaŋgöreŋ nalö köröpŋi mala kota nalö kunöŋ anömŋambuk susuhuba aŋgum aŋguyohotka Filistin yeŋgö kiŋini Abimelek yaŋön jeŋgenaŋnöhök yaigep ui geiga i etkehök. 9 Etkeka Aisak oholi kaiga kewö jii mörök: “Mötnöŋ, yaŋön mönö göhö anömgi akza. Mönö wuanöŋgöra ‘I mi nena,’ jinöŋ?” Mewö möta kewö meleŋ waŋgiyök: “Ni yaŋgöra aka nuŋguget kömumbileŋbuköra mötmöriba mewö jial.”

10 Meleŋ waŋgiiga kiŋ Abimeleknöŋ kewö jiyök: “Göŋön mönö wani kimbia ak neŋginöŋe? Nöŋgö aziurupni yeŋgöreŋök kunŋan mönö amqeba göhö anömgabuk ahöbawak. Mewö asuhuiga göŋön kondotnöŋga siŋgisöndokö keu lömbötŋan mönö neŋgö qaknine öŋgöbawak.” 11 Mewö jiba könagesö kambuŋi pakpak yeŋgöra jimkutukutu kewö al eŋgiyök: “Kunŋan kun azi ki me yaŋgö anömŋi mem bölim etkimawi, i mönö kömupkö buŋaya jim teköinga kömuma. “Mewö.

12 Aisaknöŋ gölme miaŋgöreŋ nene nup köl kömöriga Kembunöŋ kötuetköm waŋgiiga yambu miaŋgöreŋ kötŋi kömöri, mi 100:kö dop sehiba asuhuyök. 13 Mewö asuhuiga töhötmöriam ketaŋi ketaŋi miwikŋaiba maliga sukinapŋan toroqeba qariba öŋgöiga kindiŋbirik azi qetbuŋaŋambuk ahök. 14 Yaŋgöreŋ lama, meme (noniŋ) aka bulmakau kambuŋi kambuŋi mi asuhuba sehiget. Mewöŋanök welenqeqeurupŋi gwötpuk eŋgömeiga malget. Miaŋgöra Filistin yeŋön mi eka könahiba körögisigisi aka andöqeqe keu jiget. 15 Andöqeqe keu jiba iwiŋi Abrahamgö welenqeqeurupŋan o löm yaŋgö nalöŋe esigeri, mi pakpak gölmenöŋ qem turum teköget.

16 Mewö asuhuiga kiŋ Abimeleknöŋ Aisaköra kewö jiyök: “Gi kukösumgabuk aka gwötpuk neŋgoŋgizanaŋgöra mönö kölolohoba neŋgömosöta kungen anman.” 17 Mewö jii möta gölme mi mosöta Gerar öruenöŋ (rueruenöŋ) anda geba opo seri koumŋi möröreŋgöba kuŋguba miaŋgöreŋ tata malget. 18 Tata mala o löm iwiŋi Abrahamgö nalöŋe esigetmö, Abraham kömuiga Filistin yeŋön qem turugeri, mi Aisaknöŋ jiiga kunbuk esim luluŋda möhamgöget. Möhamgögetka iwiŋan o löm qetŋini qeröhi, Aisaknöŋ mi mewö kunbuk qerök.

19 Mewö qeriga welenqeqeurupŋan öruenöŋ o löm esiba mala o löm kun oŋi sarakŋi soksoköyöhi, mi miwikŋaiget. 20 Mi miwikŋaigetmö, Gerar yeŋgö lama bulmakau galömŋinan Aisakö lama bulmakau galömurupŋi yembuk könahiba aŋgururuk aka keu kewö jiget, “O mi neŋgöreŋa!” Nanŋambuk aŋgururuk keu mewö jigeraŋgöra aka Aisaknöŋ o löm miaŋgö qetŋi Esek (Aŋgururuk) qerök. 21 Miaŋgö andöŋe o löm kun kunbuk esigetka miaŋgöra mewöyök aŋgururuk aket. Mewö akeraŋgöra aka o löm miaŋgö qetŋi Sitna (Kerök-kerök) qerök.

22 Mewö qeta gölme mi mosöta anda o löm kun kunbuk jii esiget. O löm miaŋgöra aŋgururuk keu qahö asuhuiga miaŋgöra qetŋi Rehobot (Tiŋi ölöpŋi) qeta keu kewö jiyök: “Merak Kembunöŋ tiŋi ölöpŋi neŋgiiga ölöp gölme kiaŋgöreŋ mala ahumsehip akin.”

23 Mewö jiba miaŋgöreŋ mala mosöta Berseba mire anök. 24 Berseba aniga suŋgem miaŋgöreŋ Kembunöŋ asuhum waŋgiba kewö jiyök: “Nöŋön iwigi Abrahamgö Anutuŋi akzal. Nöŋön göbuk mala kötuetköm gihiba malmam. Miaŋgöra keŋgötki kude mötman. Nöŋön nup azini Abrahamgöra aka göhö gwölönarökurupki ahumsehip eŋgibiga qötöŋinan öŋgöŋgöŋi akŋa.”

25 Mewö jiiga Aisaknöŋ jöwöwöl alta kun miaŋgöreŋ memba Kembugö qetŋi qeta köuluköyök. Köuluköba opo koumŋi möröreŋgöba kuŋguba tata malget. Mala jiiga welen aziurupŋan o löm kun miaŋgöreŋ esiget. Mewö.

26  * Jen 21.22Aisaknöŋ Berseba maliga nalö kunöŋ kiŋ Abimelek yaŋön Gerar taon mosöta yaŋgöreŋ kayök. Gorojiji alaŋi Ahuzat aka yarö kambuŋaŋgö suahö galömŋi Fikol yetkön yambuk mohotŋe kaget. 27 Kagetka Aisaknöŋ kewö qesim eŋgiyök: “Iŋini kerök möt niŋgiba gölmeŋineyök közöl niŋgigetka töndup mönö wuanöŋgöra nöŋgöreŋ ki kaze?”

28 Qesim eŋgiiga kewö meleŋget: “Kembunöŋ göbuk kinjawi, nini mi aukŋe ek kutuba mötzin. Miaŋgöra kewö mötmörizin: ‘Neŋön göbuk jöhöjöhö akingö sihimnini mötzin. Ölöp gi aka neŋgö sutnine jöhöjöhö aka mi jöjöpaŋ keunöŋ jim köhöininga kewö ahöma: 29 Nini kahasililiŋ kun qahö ak gihiinmö, nalö dop ölöpŋi ak gihiba gömosöringa luainöŋ mirigi mosöta anda kaba malnöŋ. Miaŋgö dop göŋön mewöŋanök nini yuai bölöŋi kun kude ak neŋgiba malman.’ Nalö kewöŋe Kembunöŋ kötuetköm gihiiga maljan.” 30 Mewö jigetka Aisaknöŋ közölömbuaŋ mözözömgöba ohoba aliga nene kuluŋ nemba tatket. 31 Tata ahöba söŋan ömandiŋe wahöta jöhöjöhöŋini jöhöm aŋguba mi jöjöpaŋ keunöŋ jim köhöiget. Jim köhöigetka Aisaknöŋ i melaim eŋgiiga luai qakŋe mosöta anget.

32 Angetka wehön miaŋgöreŋök Aisakö welen azi yeŋön kaba o löm kun esigeri, miaŋgö kösohotŋi i jigetka kewö mörök: 33 “Nini o miwikŋaizin. “Mewö jigetka möta o löm miaŋgö qetŋi Siba qerök. * Siba keu miaŋgö könaŋi yahöt: jöjöpaŋ keu aka sewen. Jen 21:31 Miaŋgöra taon miaŋgö qetŋi mi nalö kewöŋe mewöyök toroqeba Berseba qerakzin. Mewö.

34 Isonöŋ yambuŋi 40 aiga Hit ambi yahöt anömyahötŋa etkömeyök. Qetŋiri Judit, iwiŋi qetŋi Beri aka Basemat, iwiŋi qetŋi Elon. 35 Ambi mietkön Aisak aka Rebeka urukömbuk aka wösöbirik keta bölökŋi miwikŋaim etkiba malohot. Mewö.