1 Anutugö wölböt nahönböraturupŋi akzeaŋgöra silikŋini mönö kapaŋ köla Anutunöŋ ahakzawaŋgö dop aka wuataŋgöba malme. 2  * Eks 29.18; Sum 40.6Kraistnöŋ jöpaköm neŋgiba malmalŋi neŋgöra aka köleŋda mosörök. Jöwöwöl ohogetka köwakŋan öŋgözapma, Anutunöŋ miaŋgö dop Kraist malmalŋaŋgö kalemŋi mi möt aŋgön köli wörönŋi umköhöwakŋambuk ewö aka yaŋgö jeŋe pukpuköiga söŋgaiyök. Iŋini mönö mewöyök urukalemnöŋ kinda Kraistkö dop jöpaköm aŋguba aka memba malme.

3 Serowilin, qewöloŋ aŋgöjörakŋambuk könaŋi könaŋi me yuai membagun membingö nepaqepalok (gridi) silikŋi mi Anutugö jeŋe qahö dop kölja. Miaŋgöra Anutugö ambazip sarakŋi akzeaŋgö dop yuai mewöŋaŋgö keuŋi kun mi sutŋine kude misiriba jigetka mötme. Saumbaŋ!

4 Aŋgögönahitnöŋ lösö keu imbiloŋloŋambuk aka uruqahö keu sinŋi sinŋi mi kude jime. Miaŋön uruŋini tölöhoiga qahö dop kölja. Miaŋgöra mi mönö mosöt teköba möpömöpösei keu jim sehiba malme.

5 Keu kötŋi ki mönö möt kömume: Kunŋan serowilin me qewöloŋ aŋgöjörakŋambuk me membagun membingö nepaqepalok köpösöŋgömakzawi, yaŋön mönö Anutugö bemtohoŋi buŋa qem aŋgumamgö osima. Ahakmeme miaŋön bem muneŋi me tandö lopioŋ möpöseim eŋgimakzeaŋgö tandökŋi akza. Mewö akzawaŋön mönö Kraist aka Anutu yetkö bemtohoŋ uruŋe aŋgotpingö osima.

6 Anutunöŋ siŋgisöndok mewöŋaŋgöra aka tembula irimsesewölŋi qeqetal ambazip yeŋgö qakŋine ali öŋgömakza. Miaŋgöra kunŋan keu omaŋi mewöŋi jiba kelök ala tutuhuba tilipköm eŋgibapuk. 7 Miaŋgöra ambazip mewöŋi mönö andö eŋguba yembuk köisirik kude malme. 8 Mutuk söŋaupuk malgetmö, nalö kewöŋe Kembubuk qekötahöba kinda yaŋgö asakŋambuk malje. Ahakmemeŋini mönö asakŋaŋgö buŋaya akzeaŋgö dop aka memba malme. 9 Asakŋaŋgö buŋa akzeaŋgö töhötmöriam ölŋi mi kewö: Iŋini ahakmeme ölöpŋi wuataŋgögetka Anutunöŋ keuŋini jim teköi solanime aka keu öl töhönŋanök jiba malme. 10 Wani yuai Kembugö jeŋe dop kölmawi, miaŋgö könaŋi mönö jaruba kewöta möt asarime.

11 Söŋaupkö ahakmeme gilipitŋi (ambetakŋi) aka memakzei, yembuk mönö köisirik kude toroqeba malme. Yeŋgö bölöŋamŋini mi mönö indela asakŋe ala jim eŋgime. 12 Tosatŋan siŋgisöndok tölapŋe ahakzei, mi mönö aukŋe jibingö gamuŋambuk akapuk. 13 Anutugö asakŋan siŋgisöndokŋini pakpak mem asariiga könaŋamŋini ölŋan mönö aukŋeyök asuhuma. 14 Asakŋaŋgö Toŋan mönö tölapŋaŋgö yuaiŋi pakpak indeliga asakŋe aukŋeyök ahöma. Miaŋgöra keu kun kewö jigetka ahöza,

15 Keu miaŋgö dop ahakmemeŋini mönö mötkutukutu qakŋe aka memba malme. Morop aka tönpin malbepuköra mönö ölöpŋanök galöm mem aŋguba malme. 16  * Kol 4.5Kewöŋe nalö bölizawaŋgöra aka urugö nup membingö köna kun ahumawi, nalö mi mönö kude mösöhöba ayuhumemö, ambazip qöhöröŋine anda ösöŋ qambaŋ köl eŋgime. 17 Miaŋgöra uruqahö ewö laŋ kude malmemö, Kembugö jitsihitŋi mi ölöpŋanök möt asariba kinme.

18 Wain o köhöikŋi nemba eŋololoŋ akepuk. Nanŋini imbi-imbi malgetka mötmötŋini bölöŋan asuhugetka söŋaup malmalnöŋ titeköba geba ayuhubepuk. Miaŋgöra eŋololoŋ akepukmö, Uŋan Töröŋan mönö uruŋini kokolak qemapköra kapaŋ köla kinme. 19  * Kol 3.16-17Mönö Buŋa keu eraum möta Sumbara (sam), möpömöpösei liŋet (omsa) aka urugö liŋet tosatŋi mi urukönömŋinan köla Kembu möpöseimakŋe. 20 Mewö me mewö asuhuiga miaŋgöra mönö Kembunini Jisös Kraistkö qetŋi qeta Iwi Anutu sundan saiwap jim waŋgiba malme. Mewö.

21 Kraistkö jitŋi oŋgitpepuköra keŋgötŋini möta mönö sutŋine keu bapŋe anan ak aŋguba malme.

22-23  * Kol 3.18; 1 Pitö 3.1Kraistkö ölŋi mi urumeleŋ könagesö. Yaŋön miaŋgö nöröpŋi aka Amötqeqe Toŋi akza. Miaŋgö dop azinöŋ mewöyök anömŋaŋgö nöröpŋi akza. Miaŋgöra ambi iŋini mönö Kembugö keu bapŋe anangö dop nanŋini apurupŋini göda qem eŋgiba keuŋini bapŋe anda malme. 24 Urumeleŋ könagesö neŋön Kraistkö keu bapŋe kinjini, miaŋgö dop ambi eŋön mewöyök mönö apurupŋinaŋgö keu pakpak wuataŋgöba malme.

25  * Kol 3.19; 1 Pitö 3.7Kraistnöŋ nanŋi könagesöŋi jöpaköm neŋgiba neŋgöra aka malmalŋi tököba köleŋnöhi, miaŋgö tandök azi eŋön mönö mewöyök anömurupŋini jöpaköba urukalem ak eŋgiba malme. 26 Kraistnöŋ könagesöŋi Buŋa keuŋan tök kutuba ambi buŋaŋi sarakŋi akingöra o ewö miaŋön saŋgoŋda mösoloŋanim neŋgiyök. 27 Yaŋön nini ölulup sorok akingöra möta uru sönuetnini mösoloŋaniba töwöt boromŋi kun qahö akingöra kapaŋ kölakza. Könagesö sarakŋi köpösihitkö keunini qahö akingöra mörakza. Kraistnöŋ kaba neŋguaŋgiriga asakmararaŋe eu aŋgoringa jihilalomŋan neŋguiga ambi buŋaŋi ewö nini nanŋi jemesoholŋe al neŋgiiga aködamuninambuk kinbin.

28 Azi iŋini mewöyök mönö Kraistkö tandökŋi mewöŋi wuataŋgöba anömurupŋini jöpaköm eŋgiba malme. Anömŋi jöpakömakzawaŋön mönö nanŋi köyan köl aŋgumakza. Miaŋgöra nanŋini sileŋini köyan köl aŋgumakzeaŋgö tandök mönö anömurupŋini köyan köl eŋgigetka dop kölma. 29 Kunŋan kun nanŋi sileŋi nalö kunöŋ kazik qahö ak waŋgiyökmö, körek neŋön silenini gumohoba köyan kölakzin. Kraistnöŋ mewöyök könagesöurupŋi nini sileŋi ewö keuŋan gumohoba köyan köl neŋgimakza.

30 Urumeleŋ könagesö neŋön Kraistkö ölŋi akzin. Neŋön Kraist ölŋaŋgö törömunŋi aka maljin. Miaŋgöra gumohom neŋgimakza. 31  * Jen 2.24Buŋa keu kun kewö ahöza, “Miaŋgöra azinöŋ mönö iwinamŋi etkömosöta anömŋambuk qekötahöba yahöt yetkön silemohot aka malmahot.” 32 Keu mi söpsöp keu tölapŋi. Mi Kraist aka urumeleŋ könagesö neŋgö uru jöhöjöhöninaŋgöra jiba ohozal. Keu areŋ miaŋgö könaŋi mi tölapŋi aka dutŋi gegeŋi. 33 Mewö akzapmö, eŋgöra keu mi kewö jizal: Iŋini mohot mohotŋan mönö mewöyök anömurupŋini nanŋini köyan köl aŋgumakzeaŋgö dop jöpaköm eŋgiba malme. Anöm eŋön mönö mewöyök apurupŋini göda qem eŋgiba malme. Mewö.