1 Mewö aka malgetmö, azi kun qetŋi Ananaias anömŋi qetŋi Safaira yetkön nup gölmeŋiraŋgö bahöŋi bohonŋi memegöra alohot. 2 Alohotka söŋgöröŋi kaiga azinöŋ moneŋ bahöŋi nanŋaŋgöra aŋgön köla asamböri anömŋan mi möt teköi bahöŋi kun memba kaba aposol yeŋgö böröŋine alök.

3 Böröŋine alökmö, Pitönöŋ kewö jiyök, “O Ananaias, gi mönö wuanöŋgöra Satan qahö qetalnöŋga urugi kokolak qeza? Yaŋön urugi kokolak qeiga göŋön esapköba Uŋa Töröŋi isimkakalek ak waŋgiba nup gölmegö moneŋ bahöŋi aŋgön köla asambötzan? 4 Gi miaŋgö toŋi aknöŋi, nalö miaŋgöreŋ mi nangi buŋaya ahök me? Aiga nup gölmegi bohonŋi megetka söŋgöröŋi kayöhi, moneŋ mi mönö göhö buŋaya ahök me? Gi mönö wuanöŋgöra urugan keu jöhöba yuai ki akzan? Gi muneŋ jiba mewö miaŋön ambazip qahö tilipköm neŋgizanmö, Anutu nanŋi mönö tilipköm waŋgizan!”

5 Mewö jiiga keu mi möt sasauba tala gölmenöŋ geba kömuyök. Mewö kömuiga ambazip pakpak miaŋgö buzupŋi möta sömbu mötmöt ketaŋi aket. 6 Kömuiga azi gwabö yeŋön kota qamötŋi memba esuhuba aŋguba anda löm kölget.

7 Aua karöbut teköiga anömŋan yuai asuhuyöhi, mi qahö möta kayök. 8 Kaiga Pitönöŋ anömŋi Safaira kewö qesim waŋgiyök, “Iŋiri nup meme gölmeŋiri bahöŋi bohonŋi memegöra alohotka moneŋ kayöhi, mi miaŋgö dop me qahö? Mi jinöŋga mötpi!”

Qesim waŋgiiga kewö meleŋnök, “Moneŋ mi ölŋa miaŋgö dop kayök.”

9 Mewö meleŋniga jim waŋgiyök, “Iŋiri mönö wuanöŋgöra urumohok aka Kembugö Uŋa Töröŋi tilipköm waŋgizahot? Mötnöŋ, apkan kömuiga azinöŋ memba anda löm köljei, yeŋön mönö naŋgu ki dopdowigetka kourukŋi mötzan. Yeŋön gi mewöyök esuhuba aŋgum gihiba anme.” 10 Mewö jiiga miaŋgöreŋök tala Pitögö könaŋe geba kömuyök. Kömuiga azi gwabö yeŋön kota qamötŋi miwikŋaiba memba aŋguba anda apŋaŋgö qöhöröŋe löm kölget. 11 Löm kölgetka urumeleŋ kambu jömukŋi yeŋön möta awöwöligetka buzupŋi sehiiga körek pakpak mötketka sömbu mötmöt ketaŋi aket. Mewö.

12 Mewö aketka Anutugö kukösumŋan aposol inahöm eŋgiiga nup memba böröŋini ambazip qakŋine algetka Anutunöŋ aiwesök aŋgöletot meiga sutŋine gwötpuk asuhuget. Ambazip Jisös möt narigeri, körek yeŋön jöwöwöl jikegö tohoŋ uruŋe öŋgöba kiŋ Solomongö sombem söranŋambuknöŋ tokoba kambu mohot aka malget.

13 Mewö tokoba malgetka ambazip tosatŋan keŋgötŋini möta ziriŋziriŋ aketka kunŋan totokoŋine qahö öŋgöyök. Mewö qahöpmö, ambazip kambu yeŋön göda gwötpuk qem eŋgiba malget. 14 Mewö tokoba malgetmö, töndup ambazip sehisehiŋi yeŋön kambuŋini toroqem eŋgiba malget. Azi aka ambi kambuŋi kambuŋi yeŋön Jisös möt nariba uruŋini meleŋgetka kambuŋinan qariba sehiyök. 15 Aposol yeŋön nup mewö megetka ambazip sehisehiŋan ölöwaket. Mewö ölöwakeraŋgöra aka tosatŋan kawöl ambazip eŋguaŋgita kululu köla aŋguba köna göraŋe mewöyök dum möhamgöba möki tumbula miaŋgöreŋ al eŋgiba kewö jiget, “Pitönöŋ kaba neŋgoŋgitmawi, imutimutŋan mönö nalö miaŋgöreŋ yeŋgöreŋök kungö qakŋe öŋgöi ölöwakawak!”

16 Mewöyök taon aka miri Jerusalem siti liliköba tat anjei, mieŋgöreŋök ambazip kambu gwötpukŋan öröba kaget. Mewö kaba ambazip kawöl eŋgöhöyöhi aka ömenöŋ töŋöt memba* Töŋöt mi kewö: Ömenöŋ numbuŋi möwöngöiga keu bök malja. kölköljiŋjiŋ ak eŋgigeri, mi eŋguaŋgita kaba kaŋgotket. Kaŋgotketka körek yeŋön ölöwaket. Mewö.

17 Mewö aka malgetka jike nup galöm bohonŋan aka yaŋgö suŋgurumurupŋi Sadyusi (Jike nupkö kapaŋkölköl) pati naŋgöm waŋgigeri, körek yeŋgö irimŋini seholiiga urupik aket. 18 Urupik aka aposol eŋgömemba jöhöba gawmangö kösö mire al eŋgiget. 19 Al eŋgigetmö, suŋgem miaŋgöreŋ ahögetka Kembugöreŋ garata kunöŋ kösö miri naŋguŋi öröba eŋguaŋgita yaigep eta kewö jiyök, 20 “Mötket! Iŋini mönö anda jöwöwöl jikenöŋ öŋgöba ambazip jeŋine kinda malmal dölökŋaŋgö könaŋi pakpak aukŋe jigetka mötme.”

21 Mewö jii möta miri giaŋiiga jöwöwöl jikenöŋ öŋgöba kinda Buŋa keu kusum eŋgiget. Mewö kinda kusum eŋgigetka jike nup galöm bohonŋi aka alaurupŋan naŋgöm waŋgigeri, yeŋön aŋgota jike kaunsöl kambu aka Israel jitŋememeurup köl öröm eŋgigetka mohotŋe tokoget. Tokoba kinda opotöröp tosatŋi aposol eŋguaŋgitpingö melaim eŋgigetka kösö mire anget. 22 Angetmö, i miaŋgöreŋ qahö miwikŋaim eŋgiba öne liliŋgöba kösohotŋini kewö alget, 23 “Nini ölŋa kösö mire aŋgota naŋguŋi köhöikŋi kötökŋi kölget kini wahip azinöŋ naŋgunöŋ kingetka ehin. Mi ehinmö, naŋguŋi öröba öŋgöba miaŋgöreŋ azi kun qahö miwikŋaizin.”

24 Mewö jigetka jikegö kiripo galöm bohonŋi aka jike nup galöm bohonŋi yeŋön keu mi möta uruŋini lalalulu siksauk aiga jiget, “Opopoŋ! Merak mewö asuhuba könaŋgep kunbuk supapköiga denöwö akapuk!” 25 Mewö jigetka kunŋan kota kewö jii mötket, “Mötket, azi kösö mire al eŋgigeri, yeŋön mönö jöwöwöl jikenöŋ kinda ambazip Buŋa keu kusum eŋgize!” 26 Mewö jii mötketka jikegö kiripo galöm bohonŋan opotöröp eŋgömeiga anget. Anda “Ambazipnöŋ köt gila neŋgubepuk!” jiba keŋgötŋini möta lolonŋanök jöwöwöl jikenöŋ öŋgöba aposol eŋguaŋgita kaget.

27 Mewö eŋguaŋgita kaba jike kaunsöl kambu yeŋgö jeŋine alget kingetka jike nup galöm bohonŋan kewö qesim eŋgiyök, 28  * Mat 27.25“Iŋini Jisösgö qetŋe keu kun kude kusum eŋgime! Neŋön mewö jiba soŋgo köhöikŋi al eŋgiinmö, keu miaŋgö ölŋan mönö denöwö asuhuyök? Eŋön mönö toroqeba kusum eŋgiba mala Jerusalem siti ki Jisösgö keunöŋ kokolak qegetka maljin. Aiga azi miaŋön kömumba sepŋi mokoiga eŋön neŋgöra kewö jimakze, ‘Yaŋgö keuŋan mönö Juda neŋgö qakŋine öŋgöyöha ahöza.’ ”

29 Mewö jiyökmö, Pitö aka aposol tosatŋan kewö meleŋget, “Neŋön ambazip eŋgö jimkutukutuŋini tem kölbingöra aka Anutugöreŋ keu andö qeinga qahö dop kölma. Qahö! 30 Anutunöŋ nanine ambösakonurupninaŋgö bemŋina akza. Iŋini Jisös ip kembaŋe möndöba qegetka kömuyökmö, Anutunöŋ i mem gulii wahörök. 31 Anutunöŋ i mem guliba waŋgita öŋgöi nanŋi böröŋi ölŋe ali tatza. Euyaŋgöreŋ tari Anutunöŋ siŋgisöndoknini mosöt neŋgimamgöra kuŋgui Pom Kembunini aka Amötqeqe Tonini akza. Mewö aka Israel könagesö urumeleŋ ak neŋgimamgö mötza. 32 Nini yuai mi eka keu pakpak mi naŋgöba jiba dangunuŋi aka kinjin. Uŋa Töröŋan mewöyök keu mi naŋgöba jimakza. Anutunöŋ Uŋa Töröŋi ambazip jitŋi tem köl waŋgimakzei, mönö yeŋgö uruŋine ala buŋa qem eŋgiza.”

33 Pitönöŋ keu mewö jiiga jike kaunsöl kambu yeŋön mötketka uruŋini sounöŋ qesiŋqesiŋ ewö qesiŋnök. Qesiŋniga uruŋini könöp jeiga aposol eŋguget kömumegö mötket. Mewö.

34 Mewö mötketmö, Farisi (Köna keugö kapaŋkölköl) azi kun qetŋi Gamaliel yaŋön jike kaunsöl kambu yeŋgö sutŋine tarök. Yaŋön Köna keugö böhi azia mali ambazip pakpak göda qem waŋgigetka jitŋememeŋina ahök. Mewö aka wahöta aposol eŋguaŋgitketka yaigepŋe geba borom kun mambötmegöra jim kutuyök.

35 Mewö jim kutui gegetka jitŋememe alaurupŋi kewö jii mötket, “Israel aziurup, iŋini azi ki denöwö ak eŋgibeak, miaŋgöra mönö ölöpŋanök galöm mem aŋgume. 36 Mutuk emune azi kun qetŋi Teudas yaŋön wahöta ‘Nöŋön ketaŋamŋina akzal,’ jiiga merak (yara) yambu tosatŋi teköi maljin. Teudasnöŋ mewö jiiga azi 400:gö dop yambuk öröröŋ jöhöba mindiriba malgetmö, kunŋan qei kömui tosatŋan aziurupŋi imbi köl waŋgigeri, mi kuŋgum eŋgigetka buratigetka qeburuŋinan pömsöm qeba qahöwahök.

37 “Yaŋgö andöŋe Galili azi kun qetŋi Judas asuhuyök. Yaŋön takis memegöra ambazip qetŋini ohoba areŋgögeri, nalö miaŋgöreŋ asuhuyök. Asuhuba ambazip mölöwörim eŋgiiga karim akŋegöra suŋgurum alabaukurupŋi aket. Mewö aketmö, i mewöyök qegetka kömuyök aka tosatŋan suŋgurumurupŋi imbi köl waŋgigeri, mi kuŋgum eŋgigetka buratiget. 38 Mewö aiga nöŋön kewö jibi mötket: Iŋini mönö azi kieŋgö sileŋine yuai laŋ kude akŋe. Yeŋön nup ki megetka qeburuŋ ahuzawi, mi gölme ambazipkö mötmöt areŋineyök ahuza ewö, mi mönö sohoba pömsöm qeba qahöwakŋa. Miaŋgöra i mönö eŋgömosötketka etme. 39 Mi qahöwakŋapmö, Anutugö mötmöt areŋnöhök ahubawak ewö, eŋön mönö qeburuŋ mi jöhöbingö osime. Iŋini Anutu nanŋi qetala tuarenjoŋ ak waŋgiba malbepuk. Nanŋini könaŋini mewö miwikŋaibepuköra mönö galömŋini mem aŋgume!”

40 Gamalielnöŋ mewö jiiga goro keuŋi aŋgön köla wuataŋgöget. Mi wuataŋgöba aposol eŋgoholget kotketka opotöröpköra jigetka raukapaŋ (raurapaŋ) mem eŋgiget. Raukapaŋ mem eŋgigetka jike kaunsöl kambu yeŋön aposol mi Jisösgö qetŋe keu kun toroqeba jibepukö soŋgo köhöikŋi al eŋgiba “Eta anme,” jiget.

41 Mewö jigetka jike kaunsöl kambu mosöta anget. Könanöŋ anda kewö jiget, “Jisösgö qetköra aka qetbuŋanini mewö mem sohozei, mi Anutunöŋ mötza. Yaŋön nini sihimbölö mewöŋi mötpinaŋgö dop möta neŋgehiga ölöp dop kölja.” Mewö jiba uruŋinan miaŋgöra ölöwahiga söŋgaiget. 42 Söŋgaiba nup toroqeba memba silim dop jöwöwöl jikenöŋ öŋgöget aka miriŋi miriŋi miaŋgöreŋ anda Buŋa keu kusum eŋgiba malget. Jisösnöŋ Amötqeqe Toŋi Kraist akzawi, yeŋön miaŋgö Ölöwak Buŋaŋi jiba miaŋön ambazip uruŋini kuŋguba malget. Mewö.