1  * Apo 17.15Iŋini denöwö aka maljei, mi mötpingö mötkurumkurum ketaŋi ak bibihiba toroqeba öne malbingö osiin. Miaŋgöra nanirök Atens sitinöŋ malbitkö keu jöhöba 2 alaniri Timoti melaiziga eŋgöreŋ kayök. Yaŋön Anutugö nup memba netpuk Kraistkö Ölöwak Buŋa jim sehimakza. Yaŋön uru naŋgönaŋgö keu eŋgiba mötnaripŋini mem köhöimapköra kayök. 3 Anutunöŋ areŋnini jim teköiga tosatŋan aŋgösirip ak eŋgimakze, mi nanŋinak ölöp mötze. Eŋgöreŋök kunŋan köŋjiliŋ uruŋe koŋgwarak aka löwöribapuköra jiinga kayök.

4 Neŋön Tesalonaika embuk mala nalö miaŋgöreŋ eŋgöra qeljiŋe keu kewö jiin, “Kembugö jitsihitŋi tem kölinga ambazipnöŋ sesewerowero ak neŋgigetka wahöjaliŋ miwikŋaibin.” Mewö jiinga miaŋgö dop ölŋa asuhuyöhi, mi ölöp mötze. 5 Mewö asuhuiga esapesap Toŋan esapköm eŋgii löwöriba etketka nupninaŋgö ölŋan eta pömsöm qebapuk. Miaŋgöra denöwö möt nariba maljei, mi mötpingö mötkurumkurum ketaŋi ahin lömbörii kunbuk öne malmamgö osiba Timoti melaibiga qesiba mötmamgöra kayök. Mewö.

6  * Apo 18.5Mötkurumkurum aka malinmö, Timotinöŋ anda eŋgömosöta liliŋgöba kaba buŋaŋini ölöpŋi memba kaba kewö jiyök: Iŋini Kembu ölöp möt nariba urukalem ak aŋgumakze aka nalö dop neŋgöra mötmöriba ölöwahakze. Neŋön eŋgekingö sihimŋi möringa eŋön mewöyök nini neŋgekingö kapaŋ kölakze.

7 O urumeleŋ alaurupnini, neŋön sesewerowero köŋjiliŋ könaŋi könaŋi möringa nalö miaŋgöreŋ kaba möt narizeaŋgö kösohotŋi ölöpŋi jii mötziga keu miaŋön mönö ölŋa urukölalep ak neŋgiyök. Miaŋgöra nalö kewöŋe eŋgöra aka amqeba luainöŋ ölöwaka maljin. 8 Iŋini Kembubuk qekötahöba böŋ qeba kinmeaŋgöra neŋön mönö ölŋa köhöiba maljin. 9 Eŋgöra aka Anutugö jemesoholŋe önöŋi qahö söŋgaimakzini, sösöŋgai pakpak miaŋgöra mönö denöwö Anutu möpöseiba saiwap jiinga dopŋe akawak?

10 Neŋön suŋgem asak urunini qezaköba kapaŋ köla kewö köulukömakzin, ‘Anutu, mönö bauköm neŋginöŋga Tesalonaika anda jesöŋgöröŋini eka mutulaŋgöba mötnaripŋinaŋgö yuaigöra osizei, mönö mi eŋgibin. Keu mi ölŋa.’

11 Mewö köuluköinga Anutu Iwinini nanŋi aka Kembunini Jisös yetkön mönö köna mesat neŋgiyohotka ölöp eŋgöreŋ kabin. 12 Toroqeba kewö köulukömakzin, ‘Nini urukalem önöŋi qahö ak eŋgimakzini, Kembu göŋön mönö urukalemgi toroqeba kondel eŋginöŋga sutŋine sehiiga kondel aŋgumakŋe aka ambazip pakpak kondel eŋgimakŋe. 13 Kembu, göŋön mönö uruŋini mem köhöimakŋan. Kembunini Jisös göŋön könaŋgep könagesögi sarakŋi pakpak yembuk kunbuk kamani, nalö miaŋgöreŋ Tesalonaika yeŋön sarakŋi köpösihitkö keuŋi qahö Iwinini Anutugö jeŋe kinme.’ Mewö köulukömakzin.