MA HEBRISE
Ɔko Gɔ Matsɛrɛ Masese Ma Hebrise
1
Ɣaa Ɔbi Ba Kayakpa Ɔɖo Ɣaa Makpabo.
1 I ɔwi gɔ lofe ame ne, Ɣaa ɔɖe bo mawa ika gbodzoo i siri agbãagbã iso ɔkigu i kanyamaɖidze iso. 2 Ɣɛɛ i ayi tsɔra wagbe ame ne, ɔ̃ɔɖe bo ika ɔkigu i ɔ̃ Ɔbi iso. Ɔ̃ iso i Ɣaa ɔki fiɛ ɔbara kayiiso fiɛ ɔ̃ iɖe ɔɖi sɔ ɔ̃aɖe ɔ̃ ara ku kawirikɔ̃ ne. 3 Ɔbi gɔgbe nsɛ ɔɖi ɔ̃ Ɔse ikpawaĩ ɔte fiɛ ɔɖe ɔ̃ ɔse kumiamia tutuutu ne. Ɔmɔɛ̃ kayi ɔto ala ɔ̃ itɔ̃me nɛ mba ɔle. Gɔ ɔfɔ kasukatsɛ ɔtã maturi awune akpi ɔro ne, ɔkpase ɔsɛ i Ɣaa gɔ nɖe Ɔle Ɔɖuɖu Sate kuɖearɔ̃ iso i kato. 4 Ɣaa ɔkɔlɛ Ɔbi kato ɔɖo Ɣaa makpabo lɛ kumɛgɔ ame i Ɣaa ɔtã wũ iyere nɛ lomɔ iɖo Ɣaa makpabo ire.
5 Alasɔ Ɣaa iiɣere ɔ̃ kpabo kuwɛ̃ ku ɔwi gɔ lofe sɔ,
“Wũ Ɔbi aɖe.
Nɔme ne, loɔkpese fɔ Ɔse.”
Fiɛ ɔ̃iɣere ɔ̃ kpabo kuwɛ̃ ana sɔ,
“Loaɖe fɔ Ɔse,
fiɛ aɖe wũ Ɔbi.”
6 Ɣɛɛ gɔ Ɣaa to ɔba ɔ̃apia ɔ̃ Ɔbi biete ɔwɛ̃ saã kayi gagbe iso ne, ɔɣɛ sɔ,
“Ɣaa makpabo ɔɖuɖu si masɔrɛ wũ.”
7 I makpabo iso ne, Ɣaa ɔɣɛ sɔ,
“Losu wũ makpabo lobara lɛ ɔwiri
fiɛ wũ maɖabo magbe ne, lobara ma lɛ ɔtɔ sinyagɛmi.”
8 Ɣɛɛ i Ɔbi iso ne, Ɣaa ɔɣɛ sɔ,
“Ɣaa, fɔ sigara ɔɖewi iibafe ɔnya.
Fiɛ asɛ aɖe fɔ maturi iso i ɔri bɔlɔlɔa iso.
9 Asɛ aɖɔɛ ira nɛ nse bɔlɔlɔ fiɛ atsiri nwa loiya tɔrɔrɔ.
Ne ɔso i fɔ Ɣaa ɔsɛra-ɔ sigara, ɔtã-ɔ kuwarɛ isoɣɔ nɛ lomɔ
iɖo fɔ malaa ire ne.”
10 Ɣaa ɔɣɛ ana i ɔ̃ Ɔbi iso sɔ,
“Bosate, i karɔ̃kasɛkɔ̃ ne, fɔ lobara karɔ̃
fiɛ fɔ arɔĩ asu abara ala kuɖokpo.
11 Ara wagbe ɔɖuɖu to aawɔ, ɣɛɛ fɔ ne, apia ɔwi biara,
ara wagbe to aaburi lɛ arapia.
12 Ato aakarĩ wã lɛ akatisɛ
fiɛ aafinikira wã lɛ kumɛgɔ masɛ mafinikira arapia.
Ɣɛɛ fɔ ne, ngbɔ ame aase ɔwi biara ne.
Fɔ akɔ na kawirikɔ̃.”
13 Ɣaa iiɣere ɔ̃ kpabo kuwɛ̃ sɔ,
“Sɛ i wũ kuɖearɔ̃ iso ngbe
gbɔgbɔɔgbɔ loatã atara ngba asia i fɔ matsirise iso.”
14 Iyɔ be i makpabo ɖe? Ma nɖe Siwarã dzɛ nsɛ sisɔrɛ Ɣaa fiɛ ɔsɛ ɔpia ma sɔ masɛ maabuai mma loana iɖi ne.