1 Babisɔ, bibu balofotɛ lee di Kristo osuku kanya, diekye nle mmle ninle lɛsaa biene le dikpe ni alɛ biɛbla ni nɛ. 2 “Bu teefɔ ku yaafɔ,” ninle kufiofa kasale ko beebuɛ ɔlaa beetikasa ko ni alɛ, 3 “Asaa amuu kamalɛ anta fɔ, fabasiɛ nkpa kaanale kaasɔ ka mmle suoto.”

4 Babibate, bitambla asaa ya nimakpee ni babi lee sɛblɔ. Kafɔɔ bienyu ma nwaa, binanfi ma di Yaa osuku suoto, biɛka ma kafɔɔ.

5 Balanle, biyɔ dibu ku lɛyɛkɛ bikyɔɔ basaate lee atoko kaasɔ ka mmle suoto, dieekye di situ lee kamɛ fɛ mmle okle minkyɔɔ ni Kristo ɔlaa atoko. 6 Bibla nle mmle, diele alɛ bayɛ boonyu ye ni, biomiɛ bilɛ biabuo ma ni anu oso. Kafɔɔ fɛ le Kristo balanle yi, bibla lɛsaa le di Yaa komiɛ ni bikyeko situ lee kamɛ. 7 Bibla sɛkpɛ lee ku situ biene fɛ balanle. Biɛbla sĩ fɛle Saate nwu biɔbla minta, kafɔɔ diele batii fukuti. 8 Binyuma bilɛ Saate nwu mata otii biala koto di ɔkpɛ biene wɔ ɛɛbla suoto, ale ɔlanle woo, aale ɔlanle.

9 Basaate, aye kafɔɔ bibla laakpanwu bita balanle lee, biediɛ ma lɛyɛkɛ kafɔɔ okpee. Diekye binyuma bilɛ aye ku balanle lee, Saate onwii ninkpe ye di osi, anannyu batii di anu aakanko nii.

10 Lɛyɛntɛle, babiloo, biwɛ osie di Saate nwu ku osie kplɛ nɔɔ nwu kamɛ. 11 Biyɔ Yaa akpɛsaa ya amuu ɛɛta ye ni bikpee, mmle okle bibafuo oyila mintĩi ni Abonsam kakyɔnkyɔ sisuku nɔɔ simuu. 12 Diekye diele batii buɔkpɛko. Kafɔɔ ninwuna kamɛ basientɛ ku ninwuna kamɛ banyayilatɛ ku kayi ka mmle ditunu kamɛ banyayilatɛ ku asaa kpile ɔbla anwuna ya ninkpe ni kɔɔfɛɛfɔ kamɛ di osi nikɔkpɛ. 13 Nkpo oso, biyɔ Yaa akpɛsaa nwu nkpo amuu bikpee alɛ nse dii kpile nwu nkpo lewo yi, biafuo oyila minkpɛ kakpɛ minaase kaase. Nii nni nkpo sɛma yi, biafuo okple oyila osie kanya.

14 Nkpo oso bilolaa suoto biyila biɛyɔ nwaako ɔlaa nwu nkpo binii ɔtɔ fɛ ofiamɛ. Biɛyɔ ɔsaabla tinini bifuusa nintɛɛ fɛ ntɛɛ kubi difunsaa. 15 Bielolaa suoto biɛyɔ atoko ɔkyɛ ole ɔlaa nwu nkpo obuɛ kafɔɔ bikpee ninkpaa fɛ ntokota. 16 Diɛkyakaa ni di n-ya mmle suoto yi, obe lele biyɔ ofũ onu biklee fɛle kubi difunsaa. Ni bibafuo ɔyɔ otĩi Abonsam kɔtaa ko ɔɔtaa ni ku ɔtɔ kanya oniisa. 17 Biɛyɔ Yaa didiki nwu nkpo bitukũ fɛ kakpɛ lɛbɔɔsaa lekoto. Biɛyɔ kafɔɔ Yaa ɔlaa nwu nkpo ninle ni Ninwuna kamɛ kapamĩi biklee osie kanya. 18 Bita Yaa Ninwuna nwu nkpo ditɔɔkpaa ye biɛtɔɔpɛ ɔlaa bitɔɔta Yaa obe lele, biɛkaalɛ nwɔ osie kanya bilɛ akyakaako ye. Nle mmle oso bita anu lee ate kesekese, biekpee okyiini, biɛtɔɔpɛ ɔlaa bitɔɔta di Yaa batii bamuu disi.

19 Bipɛ ɔlaa bita Yaa diisi nii kafɔɔ bilɛ, Yaa kayɔ ɔlaa nɔɔ ankpee mi kaanya mbuɛ nta batii ku sɛkambi, ndiki owofalaa wɔ ninsi ni di ɔlaa biene nwu nkpo kamɛ kayi. 20 Ɔlaa biene wɔ mmle oso nle tɔkyɛntɛ wɔ ninte ni leeyo di sɛkpɛnkyɛ kamɛ nɛ. Nkpo oso bipɛ ɔlaa diisi nii alɛ kafuo nwu obuɛ ku sɛkambi fɛ mmle okle dikpe ni lebuɛ nwu ni.

21 Obiloo bɔmbɔtɛ Tihiko wɔ ninle ni Saate kpɛmblatɛ biene, kamawa nfa amatɔkɔ ye fɛɛ mmle okle nte nii, ku mmle okle di asaa kote anfe ni di ɔkyɛ nii ninfũ. 22 Nkpo oso okpee kokpee nwɔ ɔkyɛ lee amatɔkɔ ye mmle okle bute ni ninfũ. Ankpee kafɔɔ ye ɔnyɛɛ.

23 Babiloo, Teete Yaa ku Saate Yesu Kristo ata ye atoko ɔkyɛ ole ku lɛbɔmbɔ ku ofũ onu. 24 Yaa sibualɛ disiɛko batii ba bamuu nimbɔmbɔ ni Saate loo Yesu Kristo ku lɛbɔmbɔ le ninnaa ni kase.