1 Nle mmle oso di ami Paulo, bɛɛtɛ mi leeyo ta Kristo Yesu oso, di aye ba ninanle ni Yuda batii disi, kɔpɛ ɔlaa nta Yaa. 2 Lefũ lenu nlɛ, bitoonu mmle okle di Yaa lele mi ni sibualɛ ɛɛyɔ ɔkpɛ wɔ mmle eekpee mi di nnɛɛ kamɛ alɛ mbla ni kaamɛ lee. 3 Fɛ mmle okle di obe wɔ nintɔbafe ni lakpana kukũ kakui lakyesee ye nii, Yaa ladiki disibu nɔɔ le ɛɛbla eewofasa ni eetuo mi. 4 Nse bibaka kukũ ko mmle, bibanya mmle okle lenu owofalaa wɔ ninsi ni di Kristo kamɛ kasɔ. 5 Di obe wɔ nintɔbafe ni kamɛ batatɔkɔ otii kuonwii owofalaa wɔ mmle. Kafɔɔ nunua, Yaa lefe di Ninwuna nɔɔ suoto eediki eetuo batɔkyɛntɛ nɔɔ klekle ku ɔlaa babuɛtɛtɛ nɔɔ. 6 Owofalaa nwu ninle alɛ diefe ni di ɔlaa biene nwu nkpo suoto, batii ba ninanle ni Yuda batii ntɔbakple Yaa asaa baletɛ ku Yuda batii. Nfɛ bale suoto sina nwu nkpo sinwii kakyɛ kawo nɛ, mma kafɔɔ babawɛ kalekɔ di ɔlaa wɔ di Yaa labuɛ aatɛ ni batii nɔɔ, diefe ni di Kristo Yesu suoto.

7 Yaa lafe di nnwɔɔ omu nɔɔ osie suoto eele mi sibualɛ, ɛɛtɛɛ lɛkyɛsaa nɔɔ nwu ɛɛta alɛ lɛbakple ɔlaa biene nwu nkpo kpɛmblatɛ. 8 Ami ninle ɔnyɛntɛle di Yaa bafũbanutɛ bamuu kamɛ, kafɔɔ Yaa lɛyɔ lɛkyɛsaa le mmle ɛɛtɛɛ alɛ kayie lɛkya di lɛsaawɛ kplɛ le ninsi ni di Kristo kamɛ nta batii ba ninanle ni Yuda batii. 9 Yaa niekpee mi alɛ kata batii bamuu ntofo disibu nɔɔ le eewofasa ni kaamɛ nɔɔ diɛyɔ ni kaasɔ kakyekɔ. Nnwɔɔ ninle otii wɔ niɛbla ni lɛsaa biala nɛ. 10 Disibu nɔɔ niale alɛ diefe ni baafũbanutɛ kamɛ yi, situmi se simuu ku basientɛ ba ninkpe ni di osi katofo Yaa ninumbe kplɛ le niefe ni siisuku ate ate suoto. 11 Nle mmle niale disibu le ninnaa ni kaloo di Yaa omu labla aatɛ ni bia kasɔ kakyekɔ nɛ. Ninfɛ ɛɛta disibu le mmle lɛwa kaanya diefe ni di Saate loo Yesu Kristo kamɛ nɛ. 12 Di obe wɔ buɔbla ni onwii ku Kristo, buofũ nwɔ buonu ni oso, nfɛ bukpe sɛkambi munkyɛ Yaa nfũ ku otu okpee nɛ. 13 Nkpo oso kotikiti ye lekoto nlɛ, bitanta nnɛɛ lafee ye ta diobuo mi ni diisi lee oso, diekye dibawako ye dibu.

14 Nle mmle oso, lese akunkyi kɔpɛ ɔlaa nta Teete nɛ. 15 Nnwɔɔ kamɛ di lɛsaa biala le ninkpe ni di osi ku kasɔ ka mmle suoto lefũ leyooto di letembi ni ni kanya nɛ. 16 Kɔpɛ ɔlaa ntikiti Yaa lekoto nlɛ, ata Ninwuna nɔɔ dita ye osie nɔɔ wɔ ninsi ni leeklekle nɔɔ kamɛ diyii ye situ kamɛ pɔ. 17 Kɔpɛ ɔlaa nta Kristo kafɔɔ nlɛ, aadiki ye kasiɛ di situ lee kamɛ. Lɛɛbɔmbɔ lee kafɔɔ dise sidu osie kanya fɛ mmle koowoso nse ni sidu, 18 alɛ aye ku Yaa bafũbanutɛ bamuu katofo mmle okle di Kristo lɛbɔmbɔ lɛblɛfɛ ni ku mmle diɛtaka ni katoo ku mmle diɛkaana ni ku mmle diekyofo ni. 19 Yaa ata ye bitofo Kristo lɛbɔmbɔ kplɛ nwu nkpo niɛtaka katoo dilenke ni otii lɛsɔnu, alɛ Yaa letembi nwu nkpo kayii ye kamɛ pɔ.

20 Bitansa Yaa wɔ niɛyɔ osie nɔɔ ɔɔbla ni ɔkpɛ kaamɛ loo. Aafuo wo lɛsaa biala ɔbla ɔta anlenkeesa bia mmle munkaalɛ nii, ee bia nle munoonyu osuku buta nii. 21 Bitansa nwɔ di bafũbanutɛ kamɛ diefe ni di Kristo Yesu suoto ku nnle mmuu anu, diɛyɔ ni nunua, diesifi ni dinnaa ni kaloo. Diwa kaanya.