82
Maaron iyaon yes pooza to taan
Mbouŋ to Asap
1 Maaron ileep ila niia to ghamuuŋ pooz, ve yes daaba to nugh sambam tilup zi ila naagho.
pa savsaveeŋ, ve igabiiz zi pa uraat toozi. Ighe:
2 “Yam tane, eez tsiam to ghamuuŋ pooz, iduduuŋ mako. Pale ŋeez o apul ŋgar tana?
Saawe tau daaba to taan tigharaat saveeŋ to tamtamon, yam apul zi tivolvool to zeran sasaghati.
3 Yam aat apaburigin zi, leso tigharaat saveeŋ to yes tau tapirizi imbool ve yes parooŋa, le iduduuŋ mon.
Ve tiyooz pa yes tau tileep ila pataŋani loolo, ve yes tau lezi uleeŋ eta mako na, ve tiuul zi pa pataŋani toozi.
4 Tauvene yes tau tapirizi imbool, ve yes mbolaaŋa,
yam irau matamim pazi, ve agham mulin zi ila zeran sasaghati nimazi.
5 Eemon yam aghamgham tauvene mako.
Lemim ghilalooŋ mako. Ŋgar tsiam ivot soone.
Laghooŋ tsiam, yam ataghon ŋgar to ndoroom.
Tauta ŋgar ve tutuuŋ naol tau timin puughu pa lepoogh poia izi taan na, yam avaghamunia le isaghat kat. * Mbo 11:3
6 Onoon, muuŋ yau nawaat gham naghe ‘zimaronŋa.’
Ve nasaav payam naghe: ‘Yam asov amin Maaron Tiina Tau Iliiv Zimaronŋa Tisov na natŋa.’ * Yo 10:34
7 Eemon yam pale asov amatmaat raraate imin eval tiina to taan.
Pale atap imin yes daaba to taan, ve lemim ezamim muul mako.”
8 O Maaron, uburig ve ughur atuya pa zeran sasaghati tau tileep izi taan na.
Pasaa, nughmariŋ to taan tomania gabua toozi, ene yo tsio mon.
*82:1: Zeran ŋgara siriv tighe zimaronŋa tau mbouŋ tane isavi zi, ene aŋela siriv tau Maaron ighur zi to tiŋgin nugh nugh. Aŋela tawe, tauta tighamgham pooz pa yes daaba to taan. Maaron iyaon zi pasaa, tipaburigin yes daaba to taan to tigham pooz poi itaghon ŋgar duduuŋa mako. Yes tipul daaba to taan tigham ŋgar sasaghati naol.