76
Ŋeer ee ipait Maaron pasaa, i iliiv koiŋa
Mbouŋ to Asap
Ŋeer tau imuuŋ pa mbouŋ na, aat isaav pa tamtamon to tirav gita ve timbou mbouŋ tane
1 Yes tau tileep izi taan sirivu to Yuda na, tiwatagh Maaron.
Ve yes tau tileep ila taan sirivu to Israel na, tipakuru paam, pa i eeza tiina.
2 Rumei to Maaron igheen izi Yerusalem.
Ve loloz Zion, ene Maaron niia to lepoogh.
3 Saawe tau koiŋa tigham malmal pani ta sewe, i iŋgoor polpolin paneegh natŋa tau yav ighanghan ila matazi na, tomania mbuzaagh toozi,
ve irav valaghin sigheu toozi.
Tauvene gabua toozi to malmal, i ivaghamun zi le tisov.
4 O Maaron, yo mbonarim tiina.
Yo paghunam ve ezam tiina kat. Uliiv loloz tintiina tau tigheen irau saawe.
5 Koiamaiŋa, zeran ariaŋazi. Tiroiroi mako.
Eemon yo uparav tomani zi le uliiv zi. Tauta tamtamon tsio tila tiyau gabua toozi to malmal isov imin lez.
Yo urav koiamŋa tisov timataar, ve patazi tivaghengheen ila taan.
Onoon, yes zeran ariaŋazi. Tirau kat pa ghamuuŋ malmal. Eemon irau tigham gabua eta mako.
6 Maaron to Yakop, yo uparoi zi ve uyaon zi,
le yes tau tilandoov hos tomania karis tisov titaptap tizi le timatmaat.
7 O Maaron, yo mon ta tamtamon tisov tiroiroi payo.
Pa ighe atem yavyav, sei irau iyooz ila naghom?
8-9 Yes tau koiazŋa tighamgham pataŋani pazi ve titatan zi na,
yo uyooz pazi, ve ugham mulin zi tisov.
Yo uleep sambam, ve aliŋam izilam ve usavia atuya tau pale ughuru pa koiazŋa na.
Ve saawe tau ughur atuya tana pazi, tamtamon tisov to taan tighita, le roiŋ igham zi, ve tineneeŋ mon.
10 Onoon kat. Aatyavyav to tamtamon paam, ene irau imin eez to utotoi tapirim. Tauta tamtamon tipait ghom.
Ve yes tau aatyavyav tsio ivaghamun zi mako na, yes pale tilivutin ghom, leso tisuŋ payo ve tipait ghom. * Igham 9:16; Ro 9:17
11 Yam tau ambu saveeŋ aghe agham gabua pa Maaron tsiam Yoova na, matamim iŋgal saveeŋ tsiam ve ataghoni.
Ve yam nugh nugh tau aleep agharau na, tauvene paam. Agham gabua tsiam popoia siriv ilam pa Ŋeer tau tamtamon tiroiroi pani.
12 Yes pooza tau tinumeer tauzi tapirizi na, Maaron itatan zi.
Tauta yes kinik to taan tiroiroi pani.